公幹@Manchester

今朝收到個消息, 一個大學同學啱啱昨日過身, 才三十幾歲, 留下三個年幼細路, 太突然.  希望她的家人節哀順變, 願主安慰他們.

時光倒流番去九月五日到八日.

本來唔諗住寫呢次公幹, 但因為全程過得好開心, 都寫一寫留紀念啦.

今次我哋有七個人同行, 柴娃娃的, 似去旅行多啲.

坐新航經Munich去Manchester, 在Munich的一個小時, 全部人要留喺機上.  到Manchester時才朝早八點幾, 在機場等另外兩個坐英航的同事, 再坐火車去市中心, 到埗時才未到十點.  酒店要兩點先可以check-in, 放下行李, 一行人諗住去飲早茶, 點知原來嗰邊酒樓要十二點先開, 咁去shopping 先啦.  因為星期日, 所有舖頭要十一點先開, 咁我哋成班就只好响市中心閒遊蕩.

Manchester 都有摩天輪喎.

一到十一點, 大家就各散東西去shopping.  我以為女仔鐘意買啫, 原來啲男同事買得仲勁.  個半鐘後會合去食午餐時, 已經有咁多收穫.

之後的兩日, 佢哋繼續瘋狂掃貨, 相比下我真係買得好少.  有個男同事, 由一件行李變三件, 佢話佢啲親戚朋友個個叫佢買嘢, 入Boots掃了二十罐防皺霜, 另外仲話要買一式一樣的銀包八個 (最尾揾唔到), 仲有其他...

同行有一個印度同事, 食齋的, 遷就他就唔食點心, 去了酒吧食Sunday Roast.  後尾個個都話係good decision, 因為勁抵食, 6.99 英鎊就有大大碟Sunday roast加飲品.  飲品可以揀啤酒, 汽水或茶, 咖啡, 個個都不停咁嗌好抵, 平時响新加坡一杯啤酒都幾孚咁既價錢啦.

舉杯暢飲!

呢碟齋既, 同事話好味.

Roast pork, yummy!  我食roast beef, 一樣好味, 最最好味係件Yorkshire pudding, roast potato 外脆內軟, 連啲青豆都係甜到漏的.

食飽飽後去check in, 一入房嚇一跳.  居然係學生宿舍, 好似以前响嗰邊讀書時住的, 好彩我自備了洗頭水等等.  唔怪得今次個會收費咁平啦.

開會幾日三餐全包, 餐餐都有前菜, 主菜同甜品, 食到飽到上心口. 

第一晚有晚宴, 响五星級酒店.  個包包好正, 好耐冇食poppy seed包.

前菜, 下面嗰團係couscous (一種非洲米食), 上面嗰塊大家睇個名都唔知係乜, 原來係塊食落好似肉的芝士.  食完呢碟都飽咗大半, 只有芝士好食.

主菜見到都唔開胃, 釀雞胸肉,  又乾又冇味, 從未食過咁難食的雞胸肉.

好彩個甜品為呢餐加番啲分, 超好味的apple and pear crumble with vanilla ginger ice-cream.  Apple and pear crumble 唔太甜, 個雪糕食到有薑味, 好香.

回程時又要停Munich一個鐘, 但要全部人落機, 仲要我哋拎晒手提行李添.

班儍佬响Munich一粒鐘都可以繼續買嘢, 我就冇咁好氣去揾嘢食.  本來想食currywurst (咖哩香腸) 但冇得賣, 不過有Munich出名的weisswurst (白香腸)和weissbier (啤酒), 同另一個同我一樣咁為食的同事點一份來吃, 呢度盛惠15歐羅, 抵到爛.  嗰兩包好似茄汁的係芥茉醬, 好特別的, 食weisswurst一定要配佢嚟食.

其實當時係英國時間未到中午十二點, 咁早飲啤酒, 我哋正一酒鬼, 哈哈.

成個trip就以德國香腸和啤酒作總結 - 開心, 滿足.