2010 年 數算恩典

明天就是2011年了, 祝大家新年蒙恩, 主恩常在!

在2010年最後一天, 讓我來數算主的恩典.

感謝主, 今年重新積極參與教會生命小組, 能夠和主內弟兄姐妹互相鼓勵.

感謝主, 為我爸爸安排一個細心的醫生給予他最恰當的治療.

感謝主, 保守兩個寶貝兒子健康成長, 也為他們安排了明年要上的小學和幼稚園, 大仔 也越来越懂事. 

感謝主, 奶奶今年決志信主, 現在在上慕道班, 明年就可以受洗了.

感謝主, 祝福我一家, 今年一切平安.

感謝主, 讓我有機會繼續參與host family program.

感謝主, 在我對祂冷淡時, 祂仍沒放棄我, 每次回頭時, 祂依舊用祂大能膀臂擁抱我.

感恩再感恩的事還有很多...

當然還有在網上認識你們.

新年願望

- 我媽媽能接受福音

- 我爸爸的病情能受控制, 不要受病痛折騰

- 我和家人都能健康平安

- 大仔適應小學生活, 兩兄弟都有開心的學習

- 定時上主日學, 不再逃學

印尼椰汁糕, 糯米肉鬆卷 (食譜)

每次返到香港都會為香港家人弄些點心, 蛋糕之類, 可以氹吓小朋友, 大家又可以食得開心.

今次就整了印尼椰汁糕, 連香蕉葉和椰漿都由呢邊帶番去, 費事去到香港先揾.

呢款糕的食譜是我一個印尼華僑同事給我的, 她說印尼話叫nagasari, 但我家印印姐姐話nagasari係用糯米做.  上網查查, 似乎係應該叫hunkwe, 用綠豆粉加椰漿整的, 我加了蜀米粒.  呢款糕好滑好香椰汁味, 用蕉葉包所以仲有微微的蕉葉香, 凍凍哋好似食啫哩, 啲小朋友好鐘意食.

香港行(5)

俾聖誕節的幾篇插了隊, 終於輪到十二月香港行的完結篇.

十二月十四日

返新加坡前的一晚, 一家人決定提前食冬至飯.  嗰日下晝開始天氣開始轉凍, 到夜晚己經得番十度左右, 仲好大風.  既然天氣凍, 費事去遠的地方, 只到對面的一品酒樓食.

公公婆婆同啲孫仔一齊影相, 好開心呀.  到農曆新年時, 美國的妹妹帶埋佢兩個囝囝返香港, 六個孫一齊就更熱鬧.

兩老表又嚟擺甫士.

紅酒燴梨 red wine poached pear

最近買了red anjou pear (法國紅皮梨?), 姐姐試了話唔甜.  諗起雪柜裏有少少飲剩的紅酒, 不如就試吓整紅酒燴梨.

紅酒加相同份量的水, 加砂糖和蜜糖, 半枝肉桂, 檸檬皮和橙皮, 煮滾, 下已刨皮的梨, 慢火煮至梨夠淋.

一邊煮, 一邊聞到好香的紅酒加肉桂香味, 好想即刻倒來飲.

煮好後讓梨浸在紅酒汁裏雪過夜.

第二日食前才翻熱, 配雪糕食.

梨煮得唔夠軟身, 但有紅酒和肉桂味, 我覺得好正.  可惜Daddy一啲都唔欣賞, 話成碟最好味係嗰兩球雪糕. 

紅酒汁應該再煮滾至變成濃糖水淋在梨上, 不過我就直接倒來飲, 味道好似mulled wine, 甜甜哋, 飲完成身暖笠笠.  諗下其實mulled wine 的做法都係差唔多啫, 早知加埋丁香就仲似. 

佢令我諗起以前在英國成班學聚埋食聖誕大餐的情景, 好懷念! 

當時成廿人一齊, 大家分工合作, 焗火雞, 煮brussel sprouts, 預備mulled wine, 記得我負責整roast potatoes. 

大大隻火雞點解凍呢?  我哋住學校宿舍或租屋住, 要同人share雪柜, 冇可能將隻火雞放落雪柜下格嚟解凍.  所以我朋友就將隻火雞先放入大水桶裏, 再放在車尾箱, 用了三天時間來解凍, 諗番起都幾搞笑. 

題外話:

啱啱個公司新來的清潔嬸嬸問我係咪本地人, 我答唔係, 佢話佢睇我都唔似.  哈, 乜我同啲波妹差咁遠咩?  佢其實都唔係第一個問, 有時坐的士坐lift都會俾人問, 就算我唔開口啲人都會知, 點解呢?

Boxing Day 2010

噚日Boxing Day, 我一向跟足傳統, 要呢日先拆禮物.

教會崇拜完返屋企, 第一件事就拎晒所有禮物出嚟.  大仔由上星期開始就日日同我講"Merry Christmas, can I open the presents?". 我話唔得, 一定要等26號.

Christmas dinner @ Mommy Dearest

多謝Mommy請我哋去佢屋企食Christmas dinner, 期待咗成個星期哩。

本來要帶埋兩個囝囝一齊去，咁囝囝們就可以同兩個靚姨姨AA和Mei Mei玩。可惜佢哋腸胃仲未完全好，唯有撇低佢哋喺屋企，我同Daddy自已去。

上年見到Mommy的聖誕火雞和火腿已經流晒口水，今年終於食到喇。Yeah!

呢隻係史上最強的燒火雞，皮脆肉滑勁juciy仲有炭燒香味，係我食過最好食的火雞。如果我冇見到隻火雞，我會以為自已食緊雞肉, 真係好好好好好好食架.  Mommy, 你下年再請我食過, 可以嗎?  我整唔到呢個standard.

Merry Christmas!

今年聖誕節因為兩個囝囝和Daddy都病咗，所以平安夜沒去教會聚會，覺得有啲失落。 咁多年每年平安夜都响教會過，今年喺屋企過，仲要食清茶淡飯，好唔慣。

好彩被Mommy Dearest邀請去佢度食Christmas dinner, 終於有啲聖誕氣氛。不過，下篇先post今晚食乜。

囝囝們星期三下晝開始病，我就星期四請childcare sick leave留响屋企湊佢哋，順便可以預備聖誕蛋糕和一些曲奇做禮物。

諗住Christmas dinner之後一定好漏，所以揀了Vanlily的伯爵奶茶檸檬慕絲蛋糕。

香港行(4)

今晚是平安夜, 祝大家聖誕快樂.
本來雄心萬丈想整個聖誕蛋糕嚟post, 但兩個囝囝都病咗, 發燒肚疴, 蛋糕做唔成, 只好繼續出香港遊記.

十二月十四日

今次返香港每日都過得好簡單但好充實, 朝早起身就去買外賣早餐. 日日都要諗買啲乜, 有時買茶餐廳, 有時買粢飯, 鍋貼, 有時係菠蘿包, 蛋撻.

香港行(3)

十二月十三日

上次帶囝囝返香港去了廸士尼, 囝囝話唔好玩, 去海洋公園好啲, 咁趁星期一人少就去啦.

我由細到大都好鐘意去海洋公園架, 有得坐纜車, 又有得睇魚, 仲有機動遊戲玩添.  個人覺得都係海洋公園好玩啲, 廸士尼樣樣嘢都排長龍, 成日都係得個等字, 海洋公園唔想排隊都可以去睇吓熊猫, 海獅, 魚之類.

坐地鐡去金鐘轉城巴, 到金鐘時己經午餐時間, 去海富中心的Spaghetti House食嘢先. 

呢間個經理我己經認得, 次次去都係佢, 好好招呼, 一坐低就拎啲玩具俾小朋友玩, 食完仲扭汽球俾兩個囝囝.

三個大人兩個細路叫了三個套餐.

燒雞配墨魚汁飯, 啲飯好好味.

香港行(2)

十二月十一日

晚飯後個麻煩親戚走咗後, 啲細路就留响我細妹屋企玩.

細佬同大佢半年的表姐玩, 表姐仔笑起上嚟同佢姨媽(即係我)一樣咁甜噃, kekekeke.

表姐話要企埋一齊影棵聖誕樹喎.

香港行(1）

十二月十日坐SQ2返香港，到埗已經夜晚。

樟宜機場好多聖誕裝飾。

十二月十一日

返香港例牌要飲茶，去屋企對面的一品。

哥哥同公公婆婆影相，公公婆婆見到啲孫仔幾開心。

兩菜一湯 19.12.2010

我返嚟啦，我知你哋有掛住我嘅。

今次返香港好怱忙，因為全家一齊去，要陪我爸爸媽媽又要照顧啲細路，所以完全冇時間去約朋友。 所以香港的朋友們，對唔住冇揾你哋，我真係連打電話嘅時間都冇呀，下次返嚟先揾你哋啦。

今日朝早去教會，之後去shopping, 要幇囝囝買書包，又要買聖誕禮物，到處都人山人海，買完嘢都好攰， 晚餐就求其算了。

芥蘭心炒生魚片。呢邊要炒魚片魚的選擇唔多，生魚片就最容易買，亦都最平。生魚本身冇咩味，連腥味都冇，所以調味要夠重手， 而且醃時要落多啲生粉，炒出嚟先會滑啲。

蕃茄薯仔洋葱紅蘿蔔滾魚湯， 今次只用了四條沙尖魚，湯已經好濃好鮮甜。

最後仲有蒸肉餅，簡簡單單冇花巧但勝在好送飯。

板長@Plaza Singapura

之前見AA話板長壽司好食, 成日心思思想去試, 終於上星期二俾我等到機會嘞.

放工後去做facial, Daddy話出嚟陪我食飯, 滿心歡喜可以去試响Plaza Singapura新開的板長.

做完facial, sms 問Daddy到未, 佢居然話啱啱離開公司.  有冇攪錯呀, 咁我即係要等幾孚成粒鐘!

算喇!  我自己去坐低食先, 去到前面得兩個人排隊, 好快就入到去, 揀咗counter位, 邊等可以睇啲師傅整嘢食.

先叫幾款試試.  嗰日冇帶相機, 用手機影, 矇矇哋, 實物靚好多.

最上面係燒豬肉壽司, 豬肉好腍好好味.  下面就係蝦同秋刀魚, 蝦夠新鮮, 秋刀魚刺身第一次試, 有啲油甘味, 幾好食.

日式terriyaki鱸魚扒

仍身在香港, post住之前煮的住家菜先.

在超市見到一隻叫seabass既急凍魚柳做緊特價, 咁啱嗰個星期唔得閒去街市買新鮮魚, 就買包嚟試試.  Seabass中文應該係鱸魚, 但食落唔似平時食開嗰啲金目鱸.

一片片望落都幾靚.

細佬返playgroup

細佬由上年十月就開始每個星期六朝早會去playgroup, 參加源自英國的Tumble Tots. 

Tumble Tots 每次上堂45分鐘, 最初十五分鐘係physical play, 中心內會set up幾個station, 有啲係訓練佢哋既平行, 有啲就要爬樓梯, 有啲行斜坡, 諸如此類.

細佬己經玩到熟晒, 每樣都好有信心.  其實呢啲physical play除咗訓練佢哋既手腳活動外, 小朋友從中都會建立自信心.  細佬初時連爬樓梯, 穿山窿都唔敢架, 依家就乜都敢, 如果有新同學嚟, 佢仲會快啲去"示範"俾人睇添.

法式燉蛋 crème brulee

上次餃子夜整了mango hazelnut roulade, 用了五隻蛋白, 如何消化剩下的五隻蛋黃和淡忌廉呢?

最簡單方法, 整crème brulee, 照獨角仙的食譜, 加多一隻蛋就搞掂, 順便拎支封塵好耐的火熗嚟玩吓.

支火熗買咗成年幾, 用過一次咁大把咋.  拎番出嚟初頭都要睇番說明書先識點入gas.

其實我好鐘意玩火熗架, 好似細個時偷偷地响屋企玩火柴咁, 雖然家陣名正言順咁玩, 但玩火都係好刺激. 

叫Daddy帮我影我用火熗嚟燒啲糖, 佢搞鬼咁耐, 又要我唔郁得, 把火對住燒咁耐會燶架嘛, 所以上面佢碗就燒咗個大窿嘞. 

簡易酸辣湯 (附食譜)

今日下晝返香港喇, 勁興奮!

返去一個星期, 但我己經寫定幾篇blog, 你哋得閒就嚟睇睇啦.

星期六晚的餃子夜, 為了個鬼佬, 特別煮了酸辣湯做頭盆.

第一次整咋, 之前响網上揾食譜, 見有好多唔同做法, 揀了最容易的再自己修改, 就成了下面呢個簡易版. 我覺得效果和在鼎泰豐食到的好近似, 只係我的沒加蛋花.

我係邊煮邊試味, 所以冇分量.

材料:

紅蘿蔔, 冬菇, 筍, 瘦肉, 豆腐, 上湯(我用史x生罐頭雞湯), 黑醋, 白醋, 薑一片, 胡椒粉

做法:

1. 冬菇先浸軟.  所有材料切絲.  瘦肉用鹽, 糖, 豉油, 麻油和生粉醃片刻.
2. 煲內加油燒熱, 爆香薑片, 加紅蘿蔔絲, 炒幾下, 下冬菇絲和肉絲, 炒至肉絲轉色, 加入筍絲, 炒勻, 倒入適量滾水和上湯, 請試味再慢慢加入上湯以防過鹹.
3. 湯燒滾後, 等兩三分鐘, 加入白醋和黑醋, 滴少許麻油, 用生粉水埋芡, 最後加入豆腐滾一陣, 這時可打入蛋花.
4. 最後加入胡椒粉.

註:

1. 我煮時加了白醋一湯匙, 黑醋兩湯匙.  因煮時醋會沸發, 所以上桌前我再加黑醋.  醋份量請行試味再決定.
2. 呢個做法係冇用辣椒的, 辣味全靠胡椒粉, 但鐘意辣啲就可以自行加辣椒油或椒絲.
3. 我用的是盒裝豆腐, 註明是適用放湯和煮的, 比用來蒸的實少少.  加入豆腐絲後要輕輕攪拌以防攪碎豆腐, 所以我是先埋芡才加入豆腐.
4. 我這裏沒新鮮筍, 用了真空包裝的, 我覺得有少少酸味, 所以切絲後用水浸過才用.

八米＠義安城

上星期二晚和Daddy去義安城（Ngee Ann City)食飯，發現basement層的食肆唔同咗，多了幾間新的。

揀了這間叫八米的，見牆上掛着的相，呢間嘢响日本有好多分店的。

主要賣點好似係啲飯，有紅豆飯，三文魚碎飯，仲有唔記得咩飯。總之就每個餐都可以揀一款飯，望落似孚好健康，令我諗起响日本食到好好味的有味飯團。

要先去柜枱落order俾錢，侍應才帶我哋去坐低。

我叫的鹽燒saba套餐，片魚細到個嘴大啲都可以一啖食落肚。啲飯原來係糯米飯，唔覺有咩特別，完全冇味的，仲要好少，大食少少都唔夠食。碗湯超級鹹，啲配菜都係好一般。

開心星期日 2010.12.05

2010.12.05

Host family program個學生星期六晚在我家過夜, 星期日就同我哋一齊返教會.  其實佢依家每個星期都會來我教會參加崇拜, 感謝主讓她來呢邊留學亦給她機會接觸福音.

祟拜完就一齊食早餐, 她居然來了幾乎一年第一次食印度煎餅(roti prata), 我諗我要多啲約佢出嚟見識吓真正既新加坡喇.

細佬响度扭計.

餃子夜

2010.12.04

上星期四和host family program的兩個學生食完飯後, 約好星期六來我家包餃子, 因另一個學生已經去了中東field trip所以嚟唔到, 只有一個學生來. 

星期五下晝四點, Daddy又重施故技, sms: "聽日學生嚟食飯hor, 橫掂煮開, 我叫埋個美國同事嚟". 

本來平常一頓家常飯, 整多多餃子, 輕輕鬆鬆邊煮邊食.  但要請多個鬼佬嚟, 冇埋由就咁整碟餃子喺人面前就算架, 又要我臨急臨忙去張羅. 

星期五放工拿拿淋一個人去兩間超級市場入貨, 食完晚飯就即刻開工整醉雞.  我知, 又係醉雞, 我都煮到悶, 但咁last minute腦閉塞喇, 豉單啦.

星期六朝早陪完細佬去playgroup後就响廚房企足一日, 好彩學生下晝四點幾就嚟帮我手整餃子.

第一次搓咁多皮, 用了五杯粉, 搓麵糰都搓到手軟.  麵糰醒好後學生就啱啱到, 就由佢嚟負責碌一張張皮, 我就包餡. 

預備了西洋菜豬肉餡和韮菜豬肉餡.

又嚟雞飯buffet 2 Dec 2010

我的兩個host family program 的學生剛考完試，要慰勞她們一下， 就約她們上星期四食飯。

上次試了NUS Guild House 的 Cafe on the Ridge 的chicken rice buffet, 心思思想再食， 就帶佢哋去試。

兩個小妹妹每次出嚟都好開心，上年那個學生為每人預備了禮物。

哥哥收到盒顏色筆。

細佬就收個writing board。

芒果藍莓鮮奶慕絲卷蛋

為了星期日請客, 又順便練習, 就整了卷蛋作飯後甜品.

跟周老師的鮮奶水果蛋糕卷食譜, 用了芒果和藍莓.  今次蛋糕抹得平好多, 但爐温可能低了點, 表面會有少少痴手.  不過無所謂, 因為呢個蛋糕係用反卷的.  呢個食譜要先整牛奶慕絲, 比就咁用打起忌廉多個步驟但易卷好多.

芒果和藍莓整齊的排上蛋糕上, 邊邊特地唔抹上慕絲, 因為卷時啲慕絲都會唧向側邊.

卷好切開就係咁樣嘞, 卷法仍須多練習, 無論生果之前排得幾整齊, 卷時都係會推埋一邊.

周老師呢個食譜幾好, 9"x13"蛋糕只用80g忌廉, 唔怕肥, 糖份亦少, 唔會太甜.

人客都好鐘意食, 尤其啲小朋友.  朋友的囝囝平時唔鐘意食蛋糕但今次佢食咗兩片哩.



題外話:

某日响商塲見到有馬卡龍賣,

我同daddy講: 我想買嚟試吓呀.

daddy: 吓, 買嚟做乜, 你自己整嗰啲咁好食, 駛乜買呀!

我有冇聽錯呢, 我諗我發緊夢, 佢平時只會柴我台咋喎.

請客 28 Nov 2010

星期六下晝去剪頭髮和做hair treatment, 之後就一個人去超市入貨. 

突然收到Daddy 的sms : 朋友D話之後一個月都唔得閒, 聽晚嚟食飯得唔得?

聽晚?! 但呢個朋友被公司派去美國兩年, 成家人一齊去, 點都要請人食餐飯架, 聽晚就聽晚啦.

臨時決定就唔可以要求太高, 隨便幾樣家常小菜就算.

鮑片扒西蘭花莧菜.  哈, 冇咁豪食鮑魚, 只係king oyster mushroom啫, 落油炒幾下, 加水加蠔油埋芡, 食落都幾好架, 個樣仲好見得人添. 

車厘茄藍莓酵素, 紅菜頭青瓜酵素

今次自己亂想出來的配搭 - 車厘茄配藍莓, 紅菜頭配日本小黃瓜.

我知紅菜頭有益補血, 就買來試.  家裏因為上次housewarming剩下日本小黃瓜, 就加埋一齊浸.  因紅菜頭和青瓜本身都唔係甜, 所以糖份量加得比平時多一點.

十一日後.  今次兩樽都好少泡泡, 反而車厘茄嗰樽有白色霉霉, Mommy Dearest講過白色霉霉係ok既, 但我都係第一次見. 青瓜好快就收乾晒水, 幾孚見唔到嘞.

窩心的囝囝

大仔是非常感情豐富的, 從小就會關心人, 會逗人開心.

上次到奶奶家食飯, 他叫我給他一張紙.

他拿了紙就趴在地上寫字畫畫, 說要送給"女麻""女麻".  "女麻""女麻"收到時多開心, 立刻放在玻璃柜內珍藏.

囝囝雖然大部份時間都好挑皮, 但有時都好抵鍚.

到奶奶家的特定節目 - 和猫猫玩.  但嗰日我隻肥猫好唔老黎, 唔肯同囝囝們玩.

囝囝們就轉移目標, 揾奶奶的瘦猫玩.  瘦猫好細膽的, 對住兩個熱情囝囝想逃跑又唔敢, 好可憐呀.

細佬仲拎住波波追住瘦猫要猫猫陪佢玩, 正儍豬, 隻猫又點會陪你玩波波吖.

泰式風味南瓜湯 (附食譜)

呢篇係特別為Meimei寫的.

上次她問我南瓜可以點煮, 咁我就即刻第二日就煮南瓜湯諗住post, 但撞啱囝囝生日, 所以拖到依家先post. 

我呢碗係參考泰菜食譜書的, 因為要遷就Daddy和囝囝們就走辣.

我用蝦殼和江魚仔來淆湯, 跟住加入乾葱碎(shallots)和蝦膏, 攪勻, 加入南瓜(切大塊), 煮至南瓜淋後才加入蝦, 用魚露來調味.  上桌前加入basil和黑胡椒.  應該用Thai basil但我當時冇, 就用了自家種的sweet basil, 影相就靚, 但唔多對味, 下次都係要用番Thai basil先得.

Meimei, 呢個就係我既簡化煮法, 希望你鐘意啦. 

原食譜用butternut squash, 我換成南瓜. 份量我冇跟食譜, 因我嗰時未買泰國蝦膏, 用了李x記的, 所以鹹度唔同, 魚露份量就自己因.

Northern butternut squash soup

朱古力慕絲榛子脆脆蛋糕 (食譜)

大仔今年的生日蛋糕, 上面裝飾是極沒創意的Elmo.

不過我覺得比上次整俾細佬既進步少少, 啲字寫得好少少, Elmo個鼻唧多一層, 望落立體少少.

蛋糕本體係朱古力慕絲榛子脆脆蛋糕, 參考幾個食譜砌出來的.  今次啲慕絲好滑, 個朱古力海綿蛋糕都好鬆軟, 脆脆就當然最好食.  唯一嫌慕絲甜咗啲, 但囝囝和Daddy又話ok喎, 佢哋兩個係嗜甜怪.  另一樣好睇唔好食既就係圍邊啲馬卡龍, 本身好好味,  外面脆入面煙韌, 但貼喺蛋糕邊一晚後就淋晒, 係咪要先搽一層嘢保護先痴上去呢?  有冇高人可以教吓我?  可能我要去外面買番個有馬卡龍圍邊既蛋糕嚟食吓先知.

泰式青咖哩雞 (附食譜)

星期六晚响Pasir Panjang Road間雜貨舖買了泰國小茄子和Thai basil, 第二晚就即刻用來煮青咖哩雞.

之前在我樓下的超市買了呢罐青咖哩醬, 上面有做法, 可惜全泰文.

囝囝生日飯 - chicken rice buffet

星期一囝囝正日生日, 我們去了NUSS Graduate Club裏面的Cafe on the Ridge食晚飯.

上個月發現嗰度平日夜晚和公眾假期前夕都會有chicken rice buffet, 囝囝至愛雞飯, 啱晒.

一入去就見到有一個燒味station 和生滾粥station, 即時要了一碟叉燒拼燒雞加雞腎.  成碟幾乎囝囝食晒, 我只試了雞腎.

生滾粥可以自己選料跟住即時煮, 幾多選擇, 有魚片, 牛肉片, 雞絲, 豬肉, 豬腸, 豬肝, 皮蛋, 豬肚.... 我要了一碗豬肝魚片, 啲粥底好綿好正, 連平時唔食粥既Daddy都食咗一大碗.

滿足的泰菜

囝囝生日party後, Daddy話我哋响廚房攪咗成大半日, 晚飯唔好煮出街食.

我鐘意食泰菜, 所以揀了一間泰國餐廳, 叫E-Sarn. 

曾經一個泰國朋友講過E-sarn係泰北一個地方, 啲嘢食出名辣的.  好多年前呢間舖仍喺Sixth Ave時我和Daddy去食過, 真係好辣, 但好好味好地道.

最近經過發現呢間已經搬咗去Pasir Panjang, 店內裝飾和舊店差不多, 坐得都好舒服.

六點出少少我哋就到, 所以仲未有人客.

叫了一碗細的海鮮冬蔭公, 夠兩個人分, 我和姐姐的, 因為都好辣吓但好味道, 成碗都係料.

哥哥六歲喇

哥哥聽日六歲生日, 提前昨日攪一個小型生日會.

可能因為已經學校假期, 家長冇check書包(我都冇再check囝囝書包), 所以只有兩個回覆, 一個嚟唔到, 一個星期五晚覆話嚟.  即係仲有四個可能臨時會出現, 咁叫我點去預備食物呢?

好彩時間訂在下晝兩點半開始, 下午茶時間可以隨便整幾樣點心.  不過都要一早七點幾就起身預備食物, 一邊整一邊好眼瞓.

先睇個蛋糕, 囝囝一早講好要同細佬一樣要Elmo cake, 不過上次細佬既係白朱古力熱情果啫哩蛋糕, 佢唔食白朱古力, 所以要黑朱古力.  個蛋糕花了兩晚時間來做, 咁啱之前幾日有蛋白剩玩macaron, 順便用埋來做圍邊.

冬瓜豆卜炆火腩, 冬蔭公

聽日就係大少爺六歲生日party, 呢兩日忙着預備, 好攰呀! 

我只答應囝囝開個小party, 所以只發了八張邀請咭給他的同學仔, 仲未有家長回覆要嚟, 家陣好擔心到時冇小朋友嚟囝囝就會好失望.    早知就攪大佢, 請埋我自己朋友啲細路啦, 依家先請人已經太遲.

上次housewarming dinner 皮焗得唔夠脆的燒腩, 唔怕嘥, 存了入冰箱, 一個星期後用來炆冬瓜豆卜.

大概話俾姐姐知點整, 佢話炆咗半個鐘左右, 豆卜和冬瓜吸晒啲味, 超好味.  除咗脆卜卜的燒肉皮外, 炆到淋晒的燒肉我都一樣鐘意.  囝囝們嗰晚食飯食得好快, 大仔仲難得添飯哩. 

响呢邊好難得炆火腩架, 因為呢邊外面買燒肉又貴又唔靚, 要自己整開燒肉有食剩先會用嚟炆咋.