香港行(4)

今晚是平安夜, 祝大家聖誕快樂.
本來雄心萬丈想整個聖誕蛋糕嚟post, 但兩個囝囝都病咗, 發燒肚疴, 蛋糕做唔成, 只好繼續出香港遊記.

十二月十四日

今次返香港每日都過得好簡單但好充實, 朝早起身就去買外賣早餐. 日日都要諗買啲乜, 有時買茶餐廳, 有時買粢飯, 鍋貼, 有時係菠蘿包, 蛋撻.

之後就帶小朋友去附近公園玩.

午餐有時外賣, 有時自己煮, 有時就出街食, 呢日就去咗奧海城的金滿庭食上海嘢.

食物水準普普通通, 下面只show一部份.

我覺得我自己整的酸辣湯好味啲, 呢度啲唔酸, 只係飲到辣豆辦醬味.  碟上海粗炒最好味, 不過好油, 但唔油又唔係上海粗炒呢.

食飽飽逛一逛, 樓下有兩隻Toy Story卡通裏面的three-eye, 好得意.  我最記得佢哋响卡通片入面圍住Mr Potato Head講"You saved our lives, we're eternally grateful", 好攪笑.  兩個囝囝好開心咁影相, 如果有牛仔Woody就更好, 因為細佬好鐘意Woody. 

夜晚就响屋企食住家飯, 一定有游水魚和菜.  嗰晚我媽媽買咗呢兩條叫細鱗的魚, 我第一次食呢種魚, 好好味架.  食咗幾日游水魚, 返到呢邊覺得所有魚都冇味.