簡易酸辣湯 (附食譜)

今日下晝返香港喇, 勁興奮!

返去一個星期, 但我己經寫定幾篇blog, 你哋得閒就嚟睇睇啦.

星期六晚的餃子夜, 為了個鬼佬, 特別煮了酸辣湯做頭盆.

第一次整咋, 之前响網上揾食譜, 見有好多唔同做法, 揀了最容易的再自己修改, 就成了下面呢個簡易版. 我覺得效果和在鼎泰豐食到的好近似, 只係我的沒加蛋花.

我係邊煮邊試味, 所以冇分量.

材料:

紅蘿蔔, 冬菇, 筍, 瘦肉, 豆腐, 上湯(我用史x生罐頭雞湯), 黑醋, 白醋, 薑一片, 胡椒粉

做法:

1. 冬菇先浸軟.  所有材料切絲.  瘦肉用鹽, 糖, 豉油, 麻油和生粉醃片刻.
2. 煲內加油燒熱, 爆香薑片, 加紅蘿蔔絲, 炒幾下, 下冬菇絲和肉絲, 炒至肉絲轉色, 加入筍絲, 炒勻, 倒入適量滾水和上湯, 請試味再慢慢加入上湯以防過鹹.
3. 湯燒滾後, 等兩三分鐘, 加入白醋和黑醋, 滴少許麻油, 用生粉水埋芡, 最後加入豆腐滾一陣, 這時可打入蛋花.
4. 最後加入胡椒粉.

註:

1. 我煮時加了白醋一湯匙, 黑醋兩湯匙.  因煮時醋會沸發, 所以上桌前我再加黑醋.  醋份量請行試味再決定.
2. 呢個做法係冇用辣椒的, 辣味全靠胡椒粉, 但鐘意辣啲就可以自行加辣椒油或椒絲.
3. 我用的是盒裝豆腐, 註明是適用放湯和煮的, 比用來蒸的實少少.  加入豆腐絲後要輕輕攪拌以防攪碎豆腐, 所以我是先埋芡才加入豆腐.
4. 我這裏沒新鮮筍, 用了真空包裝的, 我覺得有少少酸味, 所以切絲後用水浸過才用.