哥哥六歲喇

哥哥聽日六歲生日, 提前昨日攪一個小型生日會.

可能因為已經學校假期, 家長冇check書包(我都冇再check囝囝書包), 所以只有兩個回覆, 一個嚟唔到, 一個星期五晚覆話嚟.  即係仲有四個可能臨時會出現, 咁叫我點去預備食物呢?

好彩時間訂在下晝兩點半開始, 下午茶時間可以隨便整幾樣點心.  不過都要一早七點幾就起身預備食物, 一邊整一邊好眼瞓.

先睇個蛋糕, 囝囝一早講好要同細佬一樣要Elmo cake, 不過上次細佬既係白朱古力熱情果啫哩蛋糕, 佢唔食白朱古力, 所以要黑朱古力.  個蛋糕花了兩晚時間來做, 咁啱之前幾日有蛋白剩玩macaron, 順便用埋來做圍邊.

兩點半,  未有人到.  三點左右終於第一個亦係唯一一個同學仔和她的爸爸媽媽到, 跟住囝囝以前的保姆和她的先生亦到了.  人少少都好既, 可以一齊坐喺餐枱度食下午茶.

近鏡睇吓啲嘢食, 上層有生果撻, 中層係custard puffs, 下層就有煎雞翼和chicken nuggets.  本來仲打算整三文治, mini quiches 和scones, 但見咁少人就費事整.  個三層架我吼咗好耐架啦, 响宜家買的, 上年賣29蚊, 星期三去時見到只賣19蚊, 唔買點對得住自己噃.

食完high tea就切蛋糕, 兩兄弟好得意呀.

和同學仔合照, 一月開始就讀唔同的小學, 未必有機會再踫面.

噚日收到的禮物.

個女同學仔鐘意玩男仔嘢, 同囝囝玩賽車玩到唔肯走, 要我和佢媽咪同佢講我哋有大家的電話, 以後仍可約出嚟一齊玩佢先肯走.

bear bear 都要一齊慶祝喎.

幕後花絮 - 大清早焗了一大堆puffs, 再煮一大碗的吉士醬, 我一邊唧吉士醬入啲puff度, 細佬一路拎嚟食.

做了24個mini fruit tarts, 撻皮焗好後掃上一層朱古力, 咁啲撻皮就唔怕俾啲餡整淋嘞.  上面唧入己打發的淡忌廉, 放上blueberry和士多啤梨, 客人都讚好味.  今次用了非高温處埋過的淡忌廉(thickened cream, not UHT), 易打發好多亦穩定好多.