2015 團年飯 (附醉豬脷食譜)

今日年初六, 先祝各位

羊年快樂!　

吉祥如意！

心想事成！

身體健康！

今年初一剛好星期四，兩日公眾假期再加週末，連休了四日, 真開心.

雖然有四日假期, 但我由年廿九就開始日日煮到年初四. 

沒辦法, 作為唯一的新抱, 娘家又不在這邊, 煮飯任務只有我一個人做. 

今年團年飯八餸一湯, 我們一家加上奶奶和一個學生一起吃. 

發財好市, 今年煮得好味.

懶人餐 - 日式炸豬扒飯, 茼篙豆腐肉片湯

我家姐姐每個月的其中兩個星期都會放假, 她放假的日子, 晚餐當就由我來煮.

以前星期日由教會回家後還有會搓包, 做蛋糕, 晚餐又煮豐富的.  但近半年來都變得很懶了, 麵包不知道沒做多久, 蛋糕就算家人生日也不一定做, 晚餐就更加求其了.

當不想煮, 但又要滿足囝囝們時, 日式飯就最好不過了, 可以是炸豬扒, 牛井, 親子井, 照燒雞扒, 照燒魚扒等等, 總之肉放在日本飯上才淋汁, 囝囝們就會讚不絶口的.

某星期日就煮了炸豬扒飯, 豬扒只是半煎炸, 所以外層看起來不夠鬆脆, 但不想浪費油, 反正這樣的豬扒囝囝們也照樣收貨.  囝囝們要食到脆的豬扒, 所以蛋汁只能加在碗邊, 不可以讓豬扒沾到汁, 好煩!

我那天不想吃太多肉, 也不想吃煎炸物, 三仔爺食豬扒飯, 我只是吃白飯配菜湯. 煮這菜湯完全是為了食茼篙(春菊), 因為我太太太愛吃茼篙了, 囝囝們則最怕, 但茼篙是那晚唯一的蔬菜, 不喜歡也被逼要吃. 我懶得淆湯了, 只用了鰹魚粉, 滾菜, 加入豆腐和火鍋豬肉片, 有點像日本鍋物.  味道不錯, 清清淡淡的, 這樣吃我已經覺得很滿足. 

衣物再造

大家都知道我喜歡shopping, 就算去街市買餸都可能會趁機到附近的賣衫的小店逛逛, 見到便宜抵買的就會忍不住手.

幾個月前在一間專賣出口成衣的店見到這條紅色連身裙, 布料不錯, 下身設計我挺喜歡的, 只賣十大洋, 雖然不能試, 也買了回家.

試上身, 下身剛好, 很好看, 但上身就太大太鬆. 想着自己動手去改, 但一直沒時間也想不到怎樣弄.  十二月媽咪來新加坡時, 問她該怎麽改.  她說要改上身和袖口會很麻煩, 反正我喜歡的是下半身, 倒不如乾脆把它變成半截裙. 

這提議很好, 我己經有其他紅色連身裙, 但沒有紅色半截裙.  年尾唇病時沒心情出外, 在家閒着就動手了.

一分為二. (其實圖中的半截裙已改好, 只是放在一起補拍而已)

 以為要出動衣車, 原來只用手縫就可以了, 很快就做好了.

一不做二不休, 索性也加上兩條絲帶方便掛起來.

靚嗎? 

改造成功, 好有滿足感哩!

所以懂得一點點針線也很有用的, 尤其我喜歡上網購物, 買到不合身的衣服也可以自己稍微改一下.

豬扒拌忌廉芥茉末汁

年尾聚餐剩下的食材都清得差不多了, 就只剩下一點點的sour cream 和whipping cream.

於是消滅廚餘的最後一擊就煮了pork chops with cream and coarse grain mustard sauce (煎豬扒配忌廉芥末汁.

註: 這是一月頭煮的, 現在才寫而己.  忌廉開盒了, 不能留這麽久.

這道菜我好像很久很久以前介紹過. 是我當年在英國時英國朋友教煮的, 應該用法式忌廉(crème fraîche)的, 但沒法式忌廉時也可以用淡忌廉混合酸忌廉來代替.  不過酸忌廉不能煮滾 (會分離結塊, curdle), 所以我會等到煮好時才加入.

這道菜雖然是忌廉汁, 但因為加了帶酸的 crème fraîche或sour cream, 吃起來不會感覺肥膩.

材料:　豬扒, 洋蔥, crème fraîche, French coarse grain mustard

做法:
1. 豬扒用刀背剁鬆, 用鹽和胡椒粉來稍醃.
2. 洋蔥切塊.
3. 燒熱鑊, 加油, 煎豬扒至兩面金黃色, 將豬扒推到一旁, 加入洋蔥炒三至四分鐘至軟身.
4. 加入忌廉(crème fraîche, 或淡忌廉), 和適量芥末醬.  怕汁太濃太膩的, 可稍微加一點滾水, 加鹽和鮮磨黑椒粒調味.
5. 轉慢火加蓋煮至豬扒熟, 如用酸忌廉, 可於此時加入.

註:
1. 酸忌廉其實亦可和淡忌廉一起加入, 但火要轉細,全程只能微滾(simmering), 我試過都OK的, 當然最保險就是關火才加入.
2. 用淡忌廉和酸忌廉來代替crème fraîche, 比例應該是1:1, 但煮這道菜就可以隨意, 酸點淡點可自己調較. 我這次是把所有雪櫃來的淡和酸忌廉都用完, 沒在意比例.

沒教養的小孩

今日不吐不快, 要用廣東話來寫.

噚日終於讓我見識到強國獨生子的厲害!

在舊公司認識的內地朋友(十年前已回國), 這星期來新加坡受訓, 順便帶她的八歲仔仔來玩. 十年無見, 再見面本來好開心, 好多計傾.

放工後去酒店揾佢, 原本打算快快食晚餐就返屋企, 因為還有其他嘢要攪, 最近亦好忙好攰.

酒店大堂見面後, 才知道她的仔仔仍未返到. 因為白天她要返工, 仔仔就托其他同事的隨行家屬帶出去玩.

咁先到她房裏邊傾邊等. 等到她仔仔返到, 一入門口, 見到我, 朋友叫佢叫aunty. 他望一眼, 擰轉面, 唔叫就唔叫, 其實佢入門口連自己媽咪都無叫一聲.

之後自己走去用咖啡機沖咖啡, 無錯, 一個八歲小朋友沖咖啡飲.  我見到都愣然, 問佢媽咪: "他喝咖啡?" 佢媽咪答: "是啊, 他喝的, 不可以嗎?"  暈低!

然後那小朋友就拎了塊餅乾坐在地板上食, 邊食邊玩手機, 上唔到網就發脾氣, 仲要同佢媽咪講嘢時係用眼尾去矋的, 而唔係正視的.

喺酒店房大概逗留了二十分鐘, 佢都未叫過我一聲, 亦未正眼望過我.  我心裏面已經勁火滾, 好想一巴聲過去.

好, 俾面佢阿媽, 我忍.

按捺住怒火, 我微笑對住佢 (好虛偽, 但好佩服自己忍功又升到更高層次), 問: "你想吃什麽? 中餐, 西餐, 日本餐, pizza, 或意大利麵?"
佢完全當無聽到, 唔望唔答, 吹漲!

餓到CC下, 終於可以出發去食飯.  已經無心機去諗, 求其過馬路去對面商場, 第一間見到就係和民, OK, 就食日本餐.  小朋友即講: "我不喜歡日本餐?"  好想講"家陣你俾錢呀?" 
"那你要吃什麽?"
"我要吃米飯!"
佢媽咪就氹話日本餐也有飯食, 然後才不情不願跟住入內坐低.

坐低後, 朋友再一次叫佢叫我, 都係唔叫.

落完order無幾分鐘, 小朋友就不停地嘈: "食物要來了嗎?" " 這麽久! 我餓!"

我們叫了個二人套餐, 侍應先上一碗白飯, 然後一碟燒魚, 其他食物仍未上時, 小朋友無叫大家食飯, 就自己拎起筷子扒飯夾魚. 佢媽咪勁唔好意思, 叫佢唔好喺咁夾要留啲俾人食, 當然佢又係當耳邊風啦.

食物都上齊, 我話一齊做謝飯祈禱, 朋友叫小朋友一齊祈禱, 小朋友又係啋佢都儍, 點都唔肯就繼續扒飯. 

我點了個豬頸肉飯, 是我細仔的至愛.  我仲好心夾一塊豬頸肉俾小朋友試, 佢夾起塊肉望兩望, 大大聲講: " 我不要吃!" 然後丟俾佢媽咪.  佢媽咪話佢平時食菜多, 唔鐘意食肉喎. 我嗰刻直情好似火山要爆發, 嬲到爆炸, 但仍然要忍!

小朋友自己一食完就話要走, 多謝都無一聲. 

本來星期六請佢哋嚟我屋企食飯, 依家有啲想求其响外面食算, 咁無教養的小朋友實在唔想佢出現喺我屋企.

明明我朋友是斯斯文文, 有禮貌有家教, 點解個仔會係咁呢?

今日諗起都仲好火滾. 

親子pizza

火腿食了兩餐還有剩, 雪櫃裏也剩很多之前用來煮焗意粉的芝士, 於是來個親子pizza, 把剩餘物消滅.

這次做薄批, 麵粉, 酵母, 鹽和水搓勻, 靜置一小時就可以用了.  本來買了罐裝的那種蕃茄醬, 試了一口味道真的不行, 於是臨時臨急自己煮, 只用了一罐罐頭蕃茄粒, 蒜蓉, 香草, 煮十幾分鐘再用攪拌機攪爛.

囝囝們可以自製pizza都好興奮.

 Hawaiian pizza未入爐前

 

消滅年終聚餐剩餘物資

聚餐時那隻大火腿吃不完, 之後要想法子去消滅它.

不久前在教會旁一間新開的日本麵包店食了一片quiche, 小小一片就要六, 七元坡紙. 

不如自己做吧, 切一點火腿, 加一些蘑菇, 簡簡單單就做成了ham and mushroom quiche, 好味又經濟.  看得出家裏的焗爐温度不均勻, 一邊深色一邊淺色.

 
聚餐那天沒有木砧板和carving knife, 切火腿切得好辛苦, 於是的起心肝去買一套.  剛好Robinson減價, 很開心的捧了一套回家, 那天晚上就立刻用, 真的超級好用.

 這帶骨火腿真的好味, 肉質爽口, 有點像燻蹄的感覺, 明年聖誕要再買.

那天晚上沒吃飯, 只有quiche, 沙律, 火腿和jacket potato (配sour cream 和bacon bits, 也是聚餐時剩的物資).