兩姊妹首爾行-Day3上 (南大門, 梨花洞壁畫村)

新年快樂!

繼續首爾遊記

16.11.2016

呢朝一早起身(其實係已經幾乎十點)就好興奮, 因為等咗四年終於可以再去南大門食燒餅啦!

四年前去開會時和同事去南大門逛, 見到呢檔賣燒餅的排長龍, 貪得意去排, 原來好好味.  之後就念念不忘呢檔啲燒餅.  後來再去首爾兩次都無時間去南大門行, 所以一直都食唔到.

坐酒店免費shuttle bus去到南大門, 即刻向gate 2前進, 見到檔口前條長龍就知去啱地方.

排了十幾分鐘就買到了, 一個蜜糖味(韓文寫蜜糖燒餅꿀호떡 , 但應該係黑糖), 一個野菜味(야채호떡), 每個1千won.  外皮酥脆, 裏面熱辣辣, 一向唔鐘意食炸嘢的我都食過翻尋味.  其實這種燒餅喺首爾好多街邊檔都有, 不過呢檔係唯一我見過有人排隊, 而又淨係賣燒餅的檔口. 

我和細妹一人一個燒餅做早餐, 但無嘢飲喎. 望見旁邊三文治檔有賣咖啡, 於是叫了一杯. 阿珠媽即場有即溶咖啡粉和creamer沖的, 700won一杯.  唔知點解我細妹係魚板控, 見到魚板就一定要食, 呢檔除咗三文治都有賣魚板, 佢又買了一串. 估唔到係好好味的, 佢又忍唔住食多串, 咁我就唔客氣拎啲湯嚟飲, 一飲不得了, 食過咁多檔魚板最好味的湯.  平時煮魚板的湯都係味精水加重胡椒味 但呢檔的係好清淡, 飲唔到味精味, 但有白蘿蔔的甜味.  

所以去南大門食燒餅的話, 可以順便食埋旁邊的魚板. 

我和細妹都覺得呢檔啲魚板勁好味, 於是我貪得意用韓文同阿珠媽講好好味(맛있어요).  佢聽見我講韓文就好開心, 即刻笑晒咁同我傾(佢英文幾好的). 原來她的囡囡在香港工作, 所以佢去過香港, 仲話好鐘意香港添, 跟住仲同我細妹熱情合照.

燒餅檔對面就是南大門(正確名稱係崇禮門).  2008年南大門被人放火燒毀, 用了五年時間才修復好, 所以上次我來南大門時睇唔到.

南大門的天花

崇禮門和光化門一樣有着古裝的守衛, 不過這裏的沒有換班儀式, 在固定時間時守衛們會入室內休息.

在崇禮門影完相後, 便回到南大門市場逛逛.  有點衝動想買裝湯的石鍋, 但之後仲有其他地方去, 都係費事拎住重嘢周圍行.

跟住就去呢日的主要景點 - 梨花洞壁畫村.  地鐡惠化站2號出口出來就會見到這個遊客中心, 可以入內攞張壁畫村地圖(要問職員拎的).

地圖上有齊所有主要壁畫的指示, 跟住行就可以睇晒, 好方便.

(click 入內可放大)

途中要行斜坡同好多樓梯, 記住着對舒服啲的鞋.

第一幅, 啲石頭畫到好立體.

沿路會經過駱山公園, 有好多呢啲雕像.

由山上望落山下民居

這地方其實是民居來的, 所以記得唔好大聲喧嘩啊.

呢幅喺橋底的, 壁畫村的地圖裏沒介紹, 但個人覺得幾靚.

因為附近居民投拆遊笿太多太嘈, 於是兩條樓梯上的畫已經被洗掉, 好可惜.

全程最鐘意呢張, 雖然唔係壁畫, 但見到咁大串汽球就覺得開心.

我哋行咗兩個半鐘先行完, 多斜路又多樓梯, 仲好好太陽, 越行越熱, 行行下連褸都除埋, 着一層衫都唔覺凍.