Luyi Happy Family: 兩姊妹首爾行 - Day 5 (昌德宫, 南山韓屋村)

首爾行已經寫到第八篇, 我怕你哋睇到悶. 不過, 悶都要唔可以俾呢個遊記爛尾的.

2016.11.18

在首爾的最後一日, 我本來好想早點起身, 早點出門(睇埋下面就知點解). 但係姨甥女朝朝晨早就morning call我細妹, 喊晒話掛住佢, 我都被嘈醒. 之後再瞓番, 醒時都成九點了.

將所有之前買的生果, 餅等食完做早餐後, 執好行李, check out, 將行李寄存在酒店的自助locker, 終於十點左右出門.

第一站要去在安國站的昌德宫, 入場費每人3千won, 逢星期一休息.

敦化門是昌德宫的正門.

昌德宫是朝鮮五大宫殿之一, 亦是保存得最好的一間. 被UNESCO 列為世界文化遺產. 建於1405年, 之後被日軍燒毁, 1610年重建. 可惜和其餘宫殿一樣, 1910年日軍佔領朝鮮期間, 又再被破壞, 現在只有三成是原來的建築, 其餘都是重建.

不過, 和景福宫比較, 我個人較喜歡昌德宫. 景福宫可能多遊客去, 修葺比較多, 可以見到油漆都非常光鮮, 感覺好人工化. 而且景福宫興建時有風水考量, 全部建築都向南北, 好整齊. 昌德宫就沒風水考量, 建築物都較隨意, 感覺較純樸自然. 昌德宫遊人較少, 影相都容易, 早知租韓服來昌德宫影相.

樂善齋, 皇后的居所.

通往仁政殿的仁政門

仁政殿, 皇帝會見文武百宫和接見外國使節的地方.

仁政殿的內部

熙政堂, 皇帝的寢殿.

忘了這是什麽地方

其實昌德宫最出名的是它的後花園, 叫做秘苑. 入口在昌德宫入面, 要另外買票入場, 而且一定要跟導覽團的, 不可以自己入內遊覽. 每日只有限量的導覽團, 有英, 中, 日和韓文的團. 一半的入場卷會放上網給訂講, 另一半就在當日出售. 網上訂票只可以參觀日期前的六日內訂, 不接受早過六日前的. 我本來已經mark好日子要訂, 六日前亦即我飛香港前一日, 當日忙得氹氹轉, 到夜晚才有時間上網, 但全部團都已滿額. 唯有嗰朝早去買, 但又遲了出門, 於是所有時間許可(夜機返港)的團(任何語文)的都已滿座, 只能望門興嘆.

行完昌德宫, 我們去明洞食午餐. 為了避開午飯人潮, 我們決定先去食甜品.

細妹日日都話要食士多啤梨, 但未係季節, 所以仍然賣得貴, 所有甜品店都沒賣士多啤利. 我們去明洞的Beans Bin, 叫了雜果waffle和mango coconut latte. 韓巢apps裏面有折扣卷, 不用印出來, 只需開手機給收銀睇就可以有八折優惠.

雜果waffle 上部份水果是罐頭水果, 士多啤梨換成青提子, 早知叫芒果waffle.

甜品做appetizer後, 就可以去食午餐了. 今次試咸興冷麵, 我要了水冷麵, 9千won 妹妹要了餃子湯, 8千won. 以為食清啲, 但原來餃子湯裏面有年糕的, 好飽肚. 水冷麵又好大碗, 食完已經好飽. 呢餐唔算太好食, 冷麵麵條好煙韌, 味道普普通通, 以前在弘大食韓燒時食的較好味. 餃子我哋覺得明洞餃子的較好味. 這店唯一我最鐘意的就是以湯代茶, 熱辣辣的牛肉湯, 好美味 (有味精的, 食完會口渴).

食完就做下運動, 行路去下個景點 - 南山韓屋村.

南山韓屋村在南山山腳, 離我住的酒店好近, 所以揀做最後一景點. 這裏是免費入場的, 裏面有傳統韓國和庭院, 展示朝鮮時代的生活.

另外有收費活動, 如租韓服和嚐茶, 週末還有手工藝如整弓箭和紙鞋, 但並非每個週末都有.

要趕着回酒店領行李去機場, 只匆匆地行了一圈就走了.

晚餐在機場內的food court (入閘後)食, 叫了一個大醬牛肉湯和一個豆腐海鮮湯, 每set 9千won, 不算貴, 味道亦不錯.

最後提提今次住的酒店, Hotel PJ Myeongdong. 訂酒店時細妹的首要條件是房要夠大, 但首爾內的酒店房普遍都好細(3-4星), 要價錢合理又要大的, 最後找到了這間. 這間在忠武路附近, 但不在遊客區和大街上, 旁邊都是平民住宅和小商店和地道食店, 就像在香港住在大角咀或深水埗的酒店而非彌敦道旁的一樣. 不過仍然算方便, 有機場巴士到, 還在三個地鐡站中間.

酒店離明洞不遠, 行路十幾分鐘就到, 但酒店有提供免費穿梳巴士, 日間去南大門, 明洞, 首爾站, 夜晚就去明洞和東大門. 離開時亦可以坐去忠武路的機場巴士站(其實行路也不過5分鐘).

我們住的是standard twin, 首爾酒店來說算好大間. 床是super single.

有衣櫃, 還有保險箱, 電水煲和雪櫃. 書枱還可以打開變成梳妝枱, 有塊大鏡的, 不過房內燈光好暗, 根本照唔到.

有梳化和茶几, 還有個大露台.

不過, 露台望出去是這樣, 所以我們都沒在外面坐過.

浴室都好大, 而且好光猛, 白燈, 還有一塊可化妝鏡, 化妝時睇得清清楚楚. 有提供即棄牙刷, 浴帽, 和化妝棉. 雖然是舊酒店, 但浴室仍然好乾淨, 沒有霉點.

有個大浴缸, 花酒夠水壓, 有基本的淋浴露, 洗頭水和護髪素.

酒店附近是平民區, 有好多細細間的本地食店, 樓下還有間便利店, 不怕揾唔到食. 唯一要嫌的就是房裏較熱, 冷暖氣似乎是中央調節的, 房裏的control無論我們怎樣按都是沒用的. 應該是可以和reception 講, 不過我本身怕凍多過怕熱, 覺得温度尚可接受, 所以就無叫佢哋較.

最後, 和大家分享今次的心得:

1. 一定要租wifi, 可以隨時上網揾資料, 亦可以用地圖揾地方. 我今次都一樣幫襯了Wifi Korea, 應該是最便宜的一間, 出發前上網預訂, 可以在仁川機場或酒店領取, 非常方便. 若在出發前一個月前訂, 還有15%折扣.

2. 韓巢地圖好好用, 有折扣卷, 有餐廳和景點介紹, 開住GPS, 還可以用navigation 功能.

3. 韓巢地圖的定點功能(location)有時唔係太準確, 有時亦會好慢, 所以我都有用Naver map.

4. 手機上最好也download個Subway Korea app, 方便揾地鐡路線.

4. 原來學識讀韓文字係有啲用. 之前有日突然心血來潮想知道究竟韓文的一橫一棟圈圈係咩意思, 上網找了幾個video 來看, 才知道那些一橫一棟其實就係拼音符號, 好似英文的ABC. 只要識得每個符號的拼音, 拼埋一齊就可以讀到. 還有韓文字原來有好多係源自中文和英文, 所以好多時讀出嚟後可以估到係咩意思. 就係咁, 我去到時就可以讀得出啲韓文字嚟叫嘢食了, 睇得明些少路牌和指示.

後加:
本來不打算秀戰利品, 不過有人問, 同埋以後我自己可以睇返當時買咗乜, 諗諗下都係快快手加埋呢幾張相.

今次買得好少, 因為冬天衫唔啱我, 食物方面其實好多呢邊都買到而價錢唔差太遠就費事咁辛苦抬, 所以主力都係買面膜. 相裏面是我和妹妹兩人的戰利品, 不過大部份是她的. 行李allowance每人23kg, 回程時我們的行李才17 和18kg, 今次蝕咗俾韓亞添.

高速巴士轉換站Goto Mall 內買的, 中間兩件就是我這次買的唯一兩件衫.