兩姊妹首爾行Day 2上 (慶熙大學, 馬場洞韓牛)

15.11.2016

今次首爾行是非常relax的, 雖然有plan 行程, 但根本沒想過要跟足, 最緊要唔可以趕.

所以每朝早都瞓要自然醒, 哈哈, 即係至少十點啦, 再慢條斯理梳洗, 十一點左右先會出到門. 因為有太陽時間短, 通常朝早節目會去景點把握時間影相.

呢日就先去慶熙大學 (Kyung Hee University) 參觀.  我識得幾個那大學的教授, 但就從未去過這校園. 好容易去, 坐一號線地鐡到回基站, 1號出口落樓梯, 旁就會有綠色一號巴士, 用T-money可以免費接駁(都記得要拍卡).  巴士只停三個站, 最後一個站就是慶熙大學.  校園大門我忘了影, 但唔緊要, 靚景在後頭.

近大門的一個紀念碑

滿地紅葉, 靚到暈!

我哋見到這些紅葉就狂影喪影

圖書館(好似係)都咁靚

幾斜的一段路

行到頂就見到教堂, 超靚呀!

好像是辦公大樓(admin building), 好歐陸feel.

慶熙大學實在太靚, 加上紅葉季節, 我哋影相影到唔拾得走, 足足影了兩個鐘先拾得離開.
回程我們決定行返回基站, 順便看看校園附近的地方.  馬路兩旁長滿銀杏樹.

之後就去馬場洞食燒韓牛午餐.  坐地鐡到馬場站, 二號出口直行至見到河後左轉再直行就到馬場洞畜牧市場的北門, 也是食店所在.  另一方法也是二號出口直行至油站, 左轉直行過咗馬場小學和中學就到市場南門.  兩個路線都差唔多, 我去時由南門入, 走時由北門走.

北門就是這樣的

裏面其實就係地下濕濕的街市, 味道都幾重, 好多肉檔, 主要賣牛肉.

好多牛雜

亦有豬肉檔

有啲檔口就四正好多, 有雪櫃雪好一包包已切好的牛肉, 這種檔口就會有樓上舖俾人買了牛肉後上樓開爐燒 (要收開爐費). 

已經成兩點幾, 好肚餓, 我哋懶得雞同鴨講去揀牛肉, 於是去了網上好多人介紹的龍門家.  當你面向北門, 右邊就會見到呢條巷仔, 行入去就會有好多間燒肉店.

龍門家的門口, 招牌上有大大張龍婆的相.

我們點了個最細的韓牛餐, 80,000won. 一大碟韓牛, 有多種不同部份的肉, 但沒深究是什麽了.

套餐還附送生牛肉, 生牛肝和生牛柏葉, 當然還有各種泡菜, 和用來包肉的菜, 辣蔥絲, 醬料, 蒜片等. 附餐還送上一小樽的可樂.

會講中文的侍應(從吉林市來韓國打工的)先放上錫紙給我先烤那刨得勁的肥牛片(上圖一卷卷那些)

生牛肉好好味.  生牛肝我無膽試, 細妹試了說好腥. 生牛柏葉我就試了好細的一塊, 無咩味.

燒完肥牛片, 侍應就拎開錫紙給我們繼續燒其他肉, 每隔一陣侍應又嚟換烤網, 食一餐飯換了無數次網.  牛肉全都好新鮮, 但又未算話十分好食, 或者由肉檔買的會更好, 因為可以揀高級啲的牛肉.  我們這餐的好像沒寫明是那一級的.

餐應內都幾簡陋, 但牆上貼滿龍婆上電視的相.

那吉林來的侍應好識做, 食完還送我們出門口和幫我哋影相.

順帶一提, 轉車時在地鐡站內(沒記錯是往十里站)見到這檔賣餅乾的, 好有趣, 各式餅乾曲奇就咁攤開給人揀, 價錢是以重量計.

我們貪得意買了些, 其中右下角有紫菜碎的好好味, 曲奇好香牛油味又鬆化.  你哋見到可以試下, 價錢幾平.