2015年12月Bali Club Med (4)

2015.12.09

朝早食完早餐, 經過泳池邊見到這情景, 當時仍未有人游水的, 相信是某國人用嚟當晾衫架, 順便通宵霸位吧, 真丟架.

呢日我和Daddy玩得最多的一日, 將囝囝們放低喺kids club 和junior club 後, 我們就去了海邊報到學玩風帆. (要之前一日或大清早去先book 時間)  GO先在岸上教我們基本動作, 之後就輪流落水玩啦.  Daddy 運動從來都比我勁, 但今次我終於有一樣叻過佢啦!!!!  我全程無跌落水, 順利玩一圈回到岸上, 反而Daddy跌咗好多次呀, 可能我人矮重心低所以無咁易跌.  啲水清到見底架!

太好玩了, 玩完一個session即刻又book 多個下晝的來玩多次.

玩完風帆就去Zen pool 嘆下. Zen pool是個成人泳池, 兒童唔入得, 專俾啲想靜靜哋遊水曬太陽的人去.  泳池唔大, 但好靜好舒服.

最正係旁邊的吊床, 瞓喺度睇書飲嘢夠晒relax. 呢個泳池都可以叫嘢飲, 我叫了杯橙汁, 但杯邊好多沙好污糟, 最尾我無飲.

 Hea咗一陣又到午餐時間, 今日午餐一定要俾大家睇, 青瓜大餐.  頭盆有青瓜沙律, 成碟都係手指咁粗的青瓜撈乳酪(或沙律醬, 唔記得了), 好淡味.

仲有青瓜壽司, 呢個夠經典, 一片青瓜包住團飯, 仲要無味的白飯.

其他菜式, 右上角都有炒青瓜.  其實每日都是這樣, 同一種食材會煮成好多不同菜式. 好似有日係蘿蔔, 有日式蘿蔔菜式, 韓式蘿蔔菜式, 中式蘿蔔湯, 連西餐的雜菜都係蘿蔔, 而且係早午晚三餐都有的.

下晏晝無嘢做, 我哋決定去附近(唯一)的商場逛逛. 由酒店行路十幾分鐘就到, 唔想行可以坐的士, 沿途都有好多的士向我哋招手的.

酒店門口的雞蛋花

沿途街上好乾淨好靚, 人影都唔多個, 路上只有的士, 明顯係只有遊客才會到的.

有好多動物雕塑, 呢個係垃圾筒.

仲有三隻馬騮

終於行到喇, 呢個商場叫 Bali Collection.

除咗有間Sogo外, 仲有啲細細間賣衫賣紀念品等的店, 價錢係水魚價, 成個商場都無咩人行.

 有幾間餐廳酒吧, 我哋去時係下晝, 全部拍烏蠅, 可能夜晚先會有人幫襯吧.

 仲有Spa.

行咗個圈, 無乜好買, 最尾喺Sogo買咗支牙刷型BB cream掃. 當日呢款牙刷型化妝掃仍然好新, 我第一次見, 貪得意買嚟玩下. 印尼本地牌子的, 好似唔駛10蚊坡紙. 好用呢? OK 咁啦, 但有選擇仍然係用開的平頭掃上粉底順手啲.

返到酒店就去接囝囝哋, 哥哥喺junior club打緊乒乓， 細佬kids club 就玩泥沙.

晚餐我們在The Deck 訂了枱食晚餐.  The Deck 一定要前一日去訂, 因為座位唔多, 食a la carte 的.
前菜有seared tuna

 八爪魚沙律

 忘了是蕃茄湯還是蝦湯

主菜Daddy 和細佬都叫了鮮蝦意粉, 份量好細, 味道不過不失.

哥哥叫的辣椒蟹, 以為西餐式的, 點知係中式, 但用刀叉, 點食呀? 蟹殼仲要好硬, 成碟都唔太多肉食.  就咁一碟蟹, 無包無飯無麵送的.

我的主菜, 海鮮湯, 手掌咁大碗, 食完都唔覺有嘢落肚.

其中一款甜品

可以用兩個字總括呢餐, 把鬼! 食完個所謂3 course dinner我都仲好肚餓, 服務又差, 想揾人酌水都等好耐. 因為大家都仲餓, 所以要再去番主餐廳度食buffet.

呢晚的表演節目居然係揾kids club啲小朋友上去表演, 即係揾小朋友笨啫.

總結今次Bali Club Med 之旅, 康樂活動係最大可取之處, 因為地方大人相對感覺少啲, 想玩任何嘢都唔需要排好耐.  但服務同飲食都唔掂, 我一定唔會再去呢度, Bintan Club Med 好過呢度好多.

除咗第一篇提過房內維修問題和幾篇內都一直有講的嘢食差外, 我仲遇到以下的不快情況:

1. 有日早餐時, 我剛拿了碗粟米片, 經過廚房入口, 見到旁邊有間細房專門俾人整熱奶和BB食品的, 於是停步望多兩眼. 突然有個侍應經過撞到我, 於是碗粟米片就有一半倒了落地. 但佢居然無停低道歉, 仲繼續行下廚房. 我就成手都係粟米片同牛奶, 呆咗咁企喺度, 仲未嚟得切反應時, 有個廚房工人行過嚟清理地上的粟米片和奶, 完全當我無到.  我嬲到爆, 行過去揾個大廚投拆.  大廚sorry 都無聲, 帶我行返去我俾人撞到的地方, 指住間BB食物房, 同我講裏面有紙巾有得洗手.  呢啲咩服務態度呀!!!!!!

2. GO大部份都係本地印尼人, 待客方面真的有好大改善空間. 而且成個GO團隊似乎係新的, GO之間好多爭吵, 無咩team spirit.  當然佢哋自己嘈唔關我事, 但佢哋係响客人面前都嘈就好大問題囉. 好似有日kids club响沙灘玩, 我去接細佬時, 就見到個senior的GO鬧緊幾個新的GO, 一見到家長時就即時變笑臉, 但轉面又係咁鬧.  又有晚喺見到senior 的男GO鬧緊另一個. 再有次食午餐時, 印尼GO過嚟同我哋坐, 佢話佢係負責排舞的, 跟住就話自己幾叻其他GO跳得差之類, 作為客人, 真係唔想聽呢啲囉.

3. 負責reception 的鬼妹GO係十問十唔知的, 連酒店入面的地方名都唔知.

4. 上次去Bintan Club Med, 我記得我係無餓過, 只有食得太飽, 但今次我居然每日都有覺得餓的時候, 因為下午茶時段係無嘢食的, 正餐啲嘢食又唔多掂.

不過, 我係一年前去啦, 可能依家已經有改善.  點都好, Bali Club Med 已經俾我blacklist 咗.