2015年12月Bali Club Med (3)

2015.12.08

等咗成年先寫呢篇, 好多嘢都唔多記得了, 不過都快手寫埋留個記念啦.

之前一篇都講咗嘢食麻麻, 呢朝食第一餐早餐, 真係唔知揀邊樣好.

好多時去旅行我都偏向揀日, 韓式的, 今次都一樣, 不過啲嘢食好唔掂.

囝囝的炒蛋, 是廚師即時炒的, 居然炒到咁樣, 又嚡又有啲燶.

食完早餐就送囝囝們去小朋友的活動, 我哋兩個就可以有私人時間去hea.

上次去Bintan Club Med 時兩個仲細, 不肯去kids club. 今次細佬就好開心, 自己話要去, 因為可以去玩好多嘢, 又有其他小朋友一齊玩.

相中的時段是同時有幾樣活動進行中, 小朋友可以揀.  GO就帶住三個小朋友去玩射箭同打golf.

細佬射中紅心, 個樣幾得戚.

哥哥十一歲, 唔可以同細佬一齊去kids club, 要去junior club.  哥哥開始時好唔想去的, 所以朝早集合時都無哩神氣.  小朋友去kids club要sign in 同sign out, 唔怕小朋友自己離隊走失. 但junio club裏面都是青少年, 所以可以自由離隊的.  我哋要同哥哥講好如果佢要離隊要去邊度揾我哋.

Junior club 的節目好free 的, 雖然每日都會有份節目表, 但好少跟足, 會桉當日的年輕人要求而改動.

呢朝就去泳池玩water games.

下晝去打沙排, 哥哥唔識打, 好無癮咁靠邊站. 

Kids club下晝有個carnival, 有嘢食有嘢玩, 家長都可以一齊參加, 幾開心.

午餐時間kids club喺餐廳裏有自己的角落, 細佬食得好開心.

哥哥朝早仲好唔想去junior club, 但到午餐時已經同新朋友仔有傾有講, 寧願同佢哋食都唔同我哋食.

撇低囝囝們(還是我哋被佢哋撇低呢?), 我同Daddy就可以二人世界去玩.  其實都係hea , 周圍行下, 游下水咁.

 沙灘旁有呢啲lounge sofa, 當然唔放過霸返間, 然後喺中間間beach bar叫啲嘢飲, 享受陽光與海灘啦.

夜晚就會合囝囝們食晚餐, 嘢食無咩特別.

呢晚的表演節目又係雜技, 悶爆.

之後kids club 仲有fun fair , 細佬玩得好開心.