京汁牛仔骨, 金銀蒜粉皮蒸帶子 (食譜)

最近極少下廚, 但星期一細佬生日, 點都要親自落廚煮幾味.  從冰箱裏挖出一包急凍牛仔骨和連殼帶子, 都是個幾月前買的.第一次在新加坡買到牛仔骨, 在Mmmm見到時, 多開心, 即刻買一包回家.其實我從來未煮過牛仔骨, 印象中也好像沒食過幾次, 最記得是以前的韓國藉老闆請食bbq時食過.之前和妹妹傾電話時, 她說剛煮了牛仔骨, 於是立即問佢點整.  佢話係我爸爸以前的煮法, 好好味的.  爸爸以前的煮法?  點解我從未食過呢?  唔公平呀!  一定係在我離開香港後才煮的.這就是經我妹妹口述我亂亂做出來的, 汁裏面有茄汁和喼汁, 就叫做京汁牛仔骨吧.

另一道是金銀蒜粉皮蒸帶子, 可惜帶子不是很鮮味, 可能急凍貨色係差少少.  反而帶子上面的金銀蒜和蔥花和墊底的粉皮更好味.  這粉皮是在裕華買的, 要先浸熱水, 再放熱水內煮軟才可以食用. 

以下是這兩道菜的做法, 我沒記下份量所以請大家自行試味.

京汁牛仔骨
材料: 牛仔骨, 蕃茄, 洋蔥, 薑汁, 茄汁, 喼汁, 鹽, 糖
做法:
1. 蕃茄去皮切粒, 洋蔥切粒.
2. 牛仔骨用少許生抽略醃, 落鑊煎前才加入薑汁.
3. 鑊內放少許油, 燒熱, 下牛仔骨兩面略煎.  因牛仔骨本身很薄, 只需每面煎幾秒至轉色即可.
4. 燒熱油, 爆香洋蔥粒, 加入蕃茄兜勻, 加少許水煮滾, 轉慢火煮至蕃茄和洋蔥軟身, 加入茄汁, 喼汁, 鹽和糖調味, 轉中大火, 最後加入牛仔骨煮至牛仔骨熟即可上碟.注: 薑汁可以辟腥, 亦少有軟化牛肉纖維的作用, 但要煮之前才加入, 否則肉質會"枚".

金銀蒜粉皮蒸帶子
材料: 帶子, 綠豆粉皮, 蒜頭, 蔥花, 鹽, 生抽, 麻油
做法:
1. 綠豆粉皮浸熱水至軟身, 用水煮幾分鐘至可食用的軟度, 撈起加入適量麻油和生抽撈勻, 舖於碟底.
2. 帶子解凍洗淨, 殼要仔細刷洗.
3. 蒜頭剁碎, 分成兩半.  燒熱鑊, 下油, 加入一半蒜粒慢火煮至蒜粒呈金黃色, 淋在另一半蒜粒上, 下適量鹽混合, 待涼.
4. 帶子連殼排在粉皮上, 在每粒帶子上加上金銀蒜油, 撒上蔥花, 大火蒸四分鐘或至熟.注: 金銀蒜油一定要放涼後才加在帶子上, 否則帶子會變"枚".