Club Med Bintan 第二日

原來現在yblog每篇可以post多過廿張相, 咁就唔駛分上下集寫了.

第二日一早起身，Daddy就叫哥哥温書。好可憐呀，放假仍要温書，但冇法啦，今個星期又有測驗嘛。

温完書先去食早餐。其實每日早餐都變化不大，選擇係算多，但都幾悶。 下面兩張就係我當日早餐。

哥哥只要有煙三文魚就夠滿足了。

細佬又係例牌炒麵，我又唔覺太好食喎。

食完早餐就帶囝囝哋去Mini Club Med，想撇低佢哋有啲自由時間。

嚟呢度最大好處係有兒童節目，家長放心的話，可以每日由朝早八點半到夜九點都將小朋友放係Mini Club Med，咁全日都可以做自己嘢。

Mini Club Med係俾四歲至十一歲的兒童，十一歲以上就可以去Junior Club Med, 都係已包係住宿度。四歲以下都一樣照顧到，兩歲至四歲有個Petite Club Med, 節目同Mini Club Med差唔多，但就有午睡時間。兩歲以下的BB亦可以安排托兒服務， 但Petite Club Med 同托兒都會額外收費。

呢間房應該係俾BB用既，好可愛， 但嗰日冇人用。

囝囝哋去到時係游水時間，細佬比較慢熱，唔肯參與，大佬係咁叫佢一齊玩佢都唔肯。

玩一陣水就係shower time, 但其實只係叫小朋友入更衣室抹乾身換衫咋。個GO都冇幫小朋友換衫，好彩我哋唔放心留低，咪細佬都唔知點算。

細佬到呢個時候都仲好痴我，但一入到個房入面玩玩具就唔再理我了。

之後就去食lunch, 哥哥好照顧細佬，拖到實怕佢走失。 我和Daddy就好似狗仔隊咁匿喺條柱後面偷睇。

Mini Club Med 有自己開餐的地方，都好多選擇，囝囝哋自己食都冇問題，因為冇我叫住佢哋唔好食炸薯條，炸雞咁嘛，梗係食得開心啦。

見佢哋食飯冇問題，我和Daddy就到處閒逛。樹下有hammock, 瞓喺度嘆吓夠晒疏乎。

好想去玩吓水上活動，但呢日仲好大浪，掛起黑旗，所有水上活動都唔玩得。

我哋兩個撐枱腳食午餐，有個GO嚟同我哋一齊坐，邊食邊傾計，都唔錯既。啲GO同客人食一樣嘢的，每餐都會同唔同客人坐埋食，佢哋坐低前都會先問過，如果想有私人時間自己一家人食，可以拒絕的，佢哋唔會勉強亦唔會介意的。

再check 下Mini Club Med的時間表，知道佢哋會去Sports Centre玩Kids yoga, 我又去做狗仔隊偷望。細佬性格較內向，我擔心佢會揾我。

Kids yoga 和gym只隔一道玻璃， 我哋就順便做下gym, 設備好齊全架。

見到囝囝哋玩得好開心，喺佢哋未見我哋前就快啲離開gym， 走去打壁球。好耐好耐冇打，Daddy仲專登要我跑來跑，攪到我出咗一身大汗。

呢度有好多運動可以做，tennis, squash, table tennis, badminton, archery, ...., 都有， 球拍用具都會提供，只需要帶對波鞋就玩得喇。

三點正就走去玩circus學做空中飛人(flying trapeze)。好高架，我上去之前都有啲驚上到去會腳軟，好彩冇。 不過之前跑完跑步機又打完squash, 已經冇咩力，爬到上個platform時都成身冇力。

我覺得我好勇敢架啦，雖然未做到要求的動作，不過好好玩， 下次去我都會再玩。

玩完咁多嘢，梗要坐低飲番杯啦，呢杯係cocktail of the day, 叫Mangolicious.

玩完空中飛人就已經係Mini Club Med的下午茶時間，好豐富架，呢份係細佬既。哥哥因為之前玩遊戲時覇唔到前面位，好唔順氣，所以罷食， 又嘈話要走。反而細佬話好開心，不過“I still want mommy".  好啦，好啦，接佢哋走啦，反正都享受完幾小時自由。

又係囝囝哋最想做既 ﹣ 去泳池游水。這裏的泳池最淺都有1.2米深，兒童池是要去Mini Club Med裏面先有。

哥哥已經識游水，所以游大人池都冇問題，細佬就要用swimming ring。

游完水返房途中一定經過Terrace, 哥哥又要食下午茶。

呢日晚餐主題係gastronomic, 多啲唔同肉類咁囉。

鴨胸沙律

我揀的頭盆。

有beef wellington, 牛肉雖然仲好紅但仍然有啲韌，層酥皮勁唔酥，酥皮同牛肉之間竟然係罐頭蘑菇，失望。 反而舊叉燒味豬腩肉就好好味。

呢晚有田雞腿食， 我都係第一次見成對腳咁上，不過好受歡迎，每次一出好快就俾人拎晒，我等咗幾轉先拎到。 可惜係冇咩味，仲炸到有啲乾。

燒三文魚柳，好味。

呢餐我派哥哥去影食物相，都影得唔錯。

喺Club Med係唔會有機會悶的，一食完飯， 八點就有個為小朋友而設的show, 單純攪笑，但啲小朋友都睇得好投入。

九點又有show嘞，今晚係comedy night, 都有雜技表演，啲GO真係好勁呀!

呢個幾好笑。

睇Daddy同哥哥睇得幾開心。

細佬每晚都好緊張九點前就拉我去覇前面位。

總經理都表演埋一份。

揾埋台下觀眾上台玩，呢幾個男人好玩得。