團年飯(二）

今年留在新加坡過年，年三十晚就叫奶奶嚟我哋度一齊團年。

其實奶奶有我呢個過江新抱都有些少唔好處，就係要隔年先可以年三十同個仔團年，因為我一向都係隔年返香港過年，一年一邊夠公平嘛。但奶奶只得Daddy一粒仔，佢兩個女年三十就返夫家，我哋唔喺呢邊，奶奶就只可以同工人食咋，諗落都有少少內疚的。

我的心情仲未百分百OK，所以就唔跟廣東式煮大餐，而選擇入鄉隨俗跟呢邊人團年打邊爐。

年三十朝早晨早起身去街市買完菜先返公。啲菜貴到離晒譜，買了唐生菜，豆苗和茼蒿（唐毫），一點芹菜和芫茜葱就花了S$21!  咁我都買咗兩大袋嘅，可能唐毫貴啦，我仲買得最多佢添，但過年就豪啲啦。

呢碟係好少部份咋。

豆苗本來想留到初二開年，但見已經有啲黃就求其炒埋嚟食。

仲有火煱豬肉片，蝦，牛筋丸，豬肉丸，魚蛋，豬潤，魷魚，枝竹，菇菇，青口和牛肉。仲嫌唔夠多款，但過年買餸好難架，到處都咁逼人，買嘢好似要搶咁，已經盡人事嘞。

牛肉從Fairprice買的，非減價貨式，真係唔錯，清得最快係呢碟。

姐姐好心機咁排啲魷魚。

飯後甜品﹣打完邊爐再飽都可以食得落的杞子桂花糕，有桂花的清香，正!