年初二

你哋睇緊呢篇時我已經番咗香港，下星期一返，留言我會遲啲先覆。

年初二的大事就係開年飯，在香港爸爸就會煮好多好多正餸。之前諗煮咩餸時，睇返上年返香港過年啲相，有爸爸煮的食物，有爸爸的笑面，就忍唔住流眼淚。

流完淚就要振作，我要好似爸爸咁煮好食嘅餸嚟開年。

下晝一點左右食五餸一湯的開年飯，因為夜晚仲有節目。

過年一定有的白切雞，煮了一隻，但咁少人所以只斬半隻出嚟，令外半隻用來整醉雞。過年要有頭有尾，所以個雞頭都放埋出嚟，其實我好怕個雞頭架。整埋個沙薑薑葱汁來點雞，好好味，淨係個汁都撈得碗飯。

自製燒肉， 不過今次整得唔好，皮仲算脆但唔夠鬆化，而且醃得太鹹， 但囝囝們都一樣一舊接一舊咁食，可能夠香口。斬完雞已經冇力，所以斬得好肉酸。

重頭戲就係冬菇蠔豉炆花膠和花膠嚮螺雞湯，用了一隻大花膠，前一日浸發。

花膠先用來煲湯，煲到一半就拎出來切件再加入冬菇蠔豉一齊炆。

用了半隻雞，兩隻乾嚮螺，花膠，淮山，杞子，茨實和蜜棗來煲，湯甜到漏。湯飲完，湯渣留第二日加水再煲都仲咁甜，連湯渣都一掃而空。

冬菇蠔豉炆花膠，用生菜墊底，美味又有豐富骨膠原。

新一年要笑多啲，當然要有蝦蝦大笑啦。姐姐煮的，隨便煎一煎加蒜蓉爆香再落茄汁豉油調味。

屋企人話過時過節餸的數目要係六，八或九。連湯才五樣，差一樣點算好呢？ 團年嗰晚奶奶帶來三條她自製的五香(即腐皮卷），就煎一條來湊數吧。咩味道？ 嘻嘻，奶奶的一貫水準，啲孫仔一舊都唔肯食。

呢餐份量預得啱啱好，只剩湯渣和一些燒肉。燒肉存入冰格，呵呵，遲啲又可以有炆火腩食喇!

細佬好鐘意食雞腳，猛指住話“I want this".  我哋唔明佢要乜，佢又唔識講chicken feet, 情急下叫”finger", 笑死我哋。

夜晚就去Night Safari (夜間動物園），勁多人，搭tram條隊長到飛起。

就算要排長龍兩仔爺都係咁興奮。