聖誕shopping + 炎炎夏日落"雪"

由星期五開始我就會放假至一月一日了, 已經完全holiday mood中, 但偏偏年尾前要做完工作評估(performance appraisal).  我今年要填十四份表(每份有廿頁以上), 填完還要一個個見, 要趕在星期四朝早完成, 好痛苦呀!

現在進度極慢, 見到份表已經不想寫, 所以偷閒來寫寫blog.  我知當死到臨頭是我就會做得好快, 下晝我會勤力少少.

每年聖誕都會帶囝囝們去Takashimaya買聖誕禮物的, 因為那裏每年都有個大賣場有好多好多玩具和聖誕飾品賣.  囝囝們可以自選禮物, 但每人每份上限為S$25.  每人有兩份, 一份是我和Daddy送的, 另一份是德國契爺送的(我們負責買, 省郵費).  囝囝們都選了一樣的玩具槍(Nerf gun), 揀第二份時他們都想不到, 想要的又太貴, 於是我幫他們選再遊說他們買.  我選了這份大富翁, 用電子收費的, 好型呀!  S$49.9, 剛好兩兄弟的加起來的預算, 這份算是契爺送的.

雖然聖誕禮物到手, 但依然會照傳統要到Boxing Day才可以開來玩.  不過我自己其實都好期待玩, 一咭在手世界通行呀!

買完禮物就先去食晚餐, 去了新加坡的香港人飯堂 - 御寶世界之窗.  這裏是唯一可以食到算正宗的港式快餐.  哥哥叫了鐡板雞扒餐配紅豆冰.

 Daddy知道要幫其他人包底, 所以只叫了一碗餐蛋一丁.

我的燒味雙拼套餐, 正!  姐姐要了雲吞麵, 細佬叫了焗豬扒飯, 細佬超鐘意食, 成餐飯齋扒飯, 豬扒都留給Daddy.  這餐盛惠S$46, 五個人食到飽飽, 算好抵食.

食完晚飯就到全日最精彩的部份了.  今年Tanglin Mall 外每晚都有半小時"雪"玩, 週末有兩場, 7.30pm 和8.30pm.

有這個旋轉木馬裝飾, 未落雪前是這樣的, 影相都幾靚.

 將近七點半就開始人頭湧湧, 七點半就開始有Avalanche (雪崩), 其實就只是好多好多的泡泡. 小朋友當泡泡池玩, 大人們在一旁影相, 戰場一樣.

十五分鐘後就到落雪了,"雪"由四個方向射出, 好似真正落雪的, 但最大穿崩位就是各人身上的夏天衫.

 旋轉木馬上堆滿雪

 

 細佬玩得好投入,最後全身都是泡泡, 由頭濕到落腳.  好彩我們早有準備, 毛巾和替換衣物都帶齊. 

姐姐當然未見過真雪, 所以也帶她去一齊玩. 她和囝囝倆在雪場內玩, 我和Daddy就置身事外企在外圍影相, 但最後都要入去捉囝囝們離開, 我的鞋和褲亦未能倖免.