豬年快樂!

今日年三十, 先祝大家

豬年大吉大利! 

身壯力健! 

步步高陞!

今年Daddy公幹去了, 要過完年才回來. 所有過年前要預備的, 我都要一腳踢.

只得一對手, 所以只做了少少賀年食品應節就算了.

幾個星期前問奶奶要唔要蘿蔔糕, 芋頭糕, 佢話唔要要. 年年其實都係因為佢要我先整, 今年無Daddy喺度幫手食, 奶奶話唔要就梗係索性唔整.

點知星期六即年廿八, 打電話問奶奶仲有咩要拎俾佢, 佢突然話要蘿蔔糕!!! 本來已經去完街市買完餸, 又要臨時去買蘿蔔, 跟住快快就蒸兩底細的. 年糕就仔仔們order的, 今朝已經煎嚟做早餐了.

忘了從幾年前開始就每年都整鳯梨酥, 當時是Mommy Dearest教我整的. 細佬由細到大年年都會幫手, 已經成了熟手技工, 只要把饀和搓好的餅皮放他面前, 他便可以自動波整.

今年豬年應下節, 整了豬仔造型.  未入爐前好可愛的. 

多得Mommy Dearest 指教, 豬仔鳯梨酥尚算成功.  不過我放工後才開始整, 豬仔造型要好有耐性去整, 於是整了三排後決定放棄, 整返普通型, 因為當時已經成十點了.

焗好的樣子, 好彩臨時決定唔搽蛋汁, 搽了蛋汁的豬仔變了污糟豬.  焗好才發現有幾隻忘記督鼻窿.

香港台灣之旅 - Day 7

1.12.2017 鳶峰 -> 武嶺 -> 合歡山 -> 清境

這次包車三日遊清境, 日月潭和台中外圍景點.

朝早九點司機來酒店接我們, 全新的大車, 沒記錯可以坐八個人的, 總共有三排座位, 三日都坐得非常舒適.

這天是親親大自然的一天, 先向鳶峰出發. 因為山上難揾食, 所以司機在中途停車給我們在便利店買點三文治等做午餐.

十一點幾到了海拔2750公尺, 仍未覺凍. 山路都幾迂迴, 加上高海拔, 司機都怕我們會嘔, 好彩全家都無事完全無反應.

香港台灣之旅 - Day 6

一年幾前的遊記, 只想寫低作為記錄.

30.11.2017

這天一早坐火車去彰化, 打算參觀彰化扇形車庫.

台中站和彰化站只是一個站的距離, 十幾分鐘便到.  由彰化站行去扇形車庫只需十分鐘左右, 但沿路好奇怪地沒見到任何遊客. 行到入口時才發現原來開放時間下晝一點至四點!

去彰化就只是想去扇形車庫, 點算呢?

突然想起之前在網上見過有人介紹沙鹿美仁彩繪村, 由彰化站坐火車半小時以內就可以到沙鹿, 就即管去睇下.

美仁里彩繪村很近沙鹿站, 在光田醫院對面, 跟着google map行即可. 美仁里彩繪村最特別的是充滿台灣本土氣色.  我們在這裏影了好多相, 消磨了成個朝早.

細佬十歲啦

細佬十歲啦, 話咁快就雙位數了, 好似眨下眼就咁大個.

今年想要咩蛋糕呢?
細佬 (完全不假思索): Angry Bird.

唔好Angry Bird 啦, 揀過另一款好嗎?
細佬雙眼掃了客廳一圈, 答: Doremon (叮噹).

因為之前他畫了幅叮噹的數字油畫, 放在客廳的一個角落.

細佬生日是27/2星期二, 但Daddy請了一班朋友之前的星期六來我家新年聚餐, 成個星期六都在忙煮嘢, 於是我只可以星期日才開始整蛋糕.

好彩叮噹太容易整了, 細細個就識唱啦:
"圓圈加一點, 圓圈加一點, 下面畫支波板糖, 再畫個呼啦圈, ..."

擠花用了buttercream, 蛋糕本身是朱古力紅桑子慕絲蛋糕.  每年細佬生日都幾乎是這款蛋糕, 不是紅桑子就是士多啤梨, 因為我懶得諗.  今年加了紅桑子啫喱層, 多一重口感.

今年Daddy做了空中飛人, 成日飛, 啱啱噚晚又飛去美國, 今次去一個月.

係一個月呀!!!!!

所以呢個blog會非常不定期更新.

香港台灣之旅 - Day 5

Daddy上星期回來了, 家裏突然變得天下太平, 囝囝們不敢再不聽話, 我回家也不用再咆哮了. 成個人都輕鬆晒, 心情也好多了. 

為了補償三個星期獨自擔起頭家, Daddy從美國帶來了我想買好耐好耐的花花煲!  非常驚喜呢!  之前完全不知道他會買的, 還是要上網訂的.  但那店只收美國信用卡, 於是他偷偷叫我在美國的二妹幫他訂.

Blue bell purple 好靚好靚 (心心眼). 那玫瑰花和猫猫煲夾是之前妹妹送我的.

香港台灣之旅 - Day 2-4

2018年一開始就諸事不順, 心情一直都麻麻.

每次開了blog 想寫, 寫幾句又放低了.  這篇一月第一個星期寫的, 寫了一半就停.  今日要起心肝寫完.

Daddy今年上半年會常常飛, 前個星期就飛了, 下個星期才回來. 然後二月過了農曆新年又飛,  唉...

我要自己攪掂兩隻馬騮, 新來的姐姐又勁唔醒目, 我幾乎日日放工都仲要顧好多嘢, 所以真係好攰好煩. 公司嘢亦令我好煩, 2018年應該係唔容易的一年.

26.11.2017-28.11.2017

星期日朝早約細妹一家去牧牛餐廳食早餐.  牧牛的炒蛋炒得好滑, 囝囝們每次都要去食.

簡單的聖誕晚餐

今年年尾特別忙, 卻是充滿感恩的.

教會詩班今年除了12月17日在教會門口辦了個戶外聖誕音樂會, 還有12月22日在烏節路報佳音, 再要在12月23日在教會的聖誕晚會獻詩, 所以自從由台灣旅行回來後就是一直練詩, 返工外還有做不完的家務(因未請到新姐姐).  每日都覺得攰到成身痛, 每晚躺在床上就大昏迷了, 但感恩有足夠精神體力去挨過.

12月17 日和12月22日的音樂會和報佳音都是傍晚時份在室外舉行的, 而正好每次開始前都落雨, 還要好大雨, 奇妙的是每次都在要開始時雨就停了, 讓我們可以如期獻唱, 真的體會到主的信實.

囝囝們1月2日開學, 要趕在之前找到新姐姐.  前星期找到了, 安排好22日飛來, 突然說出不了境. 後來新姐姐再買機票再試闖關, 第二次終於成功出境飛來了.  昨日27號來我家上班了, 大家都鬆一口氣.  原來第一次不能出境是因為枱底俾得太少錢, 第二次塞夠錢才放行.  其實姐姐們好可憐, 出外打工賺錢, 出境還被榨壓.

忙到聖誕過後, 終於Boxing Day煮了今年的聖誕晚餐.  日間還要出門買書買校服等, 沒多少時間煮, 又沒姐姐幫手, 一切從簡.

有用了button mushroom, shitake mushroom 和portobello mushroom 煮的mushroom soup. 前菜是prawn, avocado and mango salad, 配上honey lime dressing, 超級開胃.

另一個前菜是芝士煙肉釀細portobello mushrooms.  主菜是鬼嫁的無焗爐版燒牛肉, 配菜是Jamie Oliver 的roast potatoes, 還有求其的烚西蘭花. 

今次買了1kg的西冷來做燒牛肉, 照鬼嫁的做法, 每次都成功的, medium rare, 朋友大讚. 

香港台灣之旅 - Day 1

去了香港和台灣兩個星期, 星期六才回到新加坡.

風流快活了兩個星期, 回來後就忙到無命. 

姐姐在我們飛前一個星期回印尼照顧她的先生(要做手術), 我們回到香港後就收到她的電話, 她的先生需要幾個月時間康復, 所以她不能回來了.  唉, 又要揾工人了. 這個姐姐做得很不錯的呢!

所以回來後, 兩個仔仔就要去我奶奶家住, 因為我和Daddy日頭返工時沒人在家照顧他們.  沒有姐姐的日子, 要返工又要做家務, 還要忙着練聖誕報佳音的歌, 每日都攰到像魂遊似的. 這個十二月一點都不好過呀!

呻完一輪, 開始今次的遊記.

25.11.2017

本來我們要去香港和台灣, 最直接的就是坐國泰, 可以在香港轉機停留. 但自從幾年前坐過一次國泰後, 實在太差了, 我們都極不願意再坐國泰.  最後Daddy用他的飛行哩數再加少少錢換了星航的新加坡香港來回機票, 然後再訂長榮的香港台北機票, 總花費還比直接訂國泰便宜一點.

今年新加坡樟宜機場有可愛的Sanrio 裝飾.

首爾親子自由行-Day7 完結篇

囝囝們今年學年完結了, 開始放假, 一月才開學.

我以為囝囝們放假, 我會好得閒.  之前還在淘寶買了一些數字油畫. 

結果, 他們放假我更忙. 公司好多嘢做, 這幾個星期在很努力地清理手頭上的工作, 因為明天就要返香港和去台灣玩, 會出走兩星期. 這一刻似乎已經完成了要清的工作, 可以透一透氣, 偷懶來寫最後一篇首爾遊記.

還有, 姐姐有事要回鄉一個月或以上, 這個星期我變了阿四, 囝囝們就要搬去和奶奶住, 因為日頭沒人在家看着他們.  每日放工後要先去陪他們, 然後回家做家務. 

14.06.2017

來到首爾的最後一日, 我們坐下午四點幾的班機回新. 房東很nice地讓我們遲點check out, 就不用煩惱行李放那裏了. (本來打算一早清房, 將行李寄存在Seoul Station, 反正我們會坐AREX去機場, 都好方便, 只是要一早清房會較趕)

先去首爾站內的Paris Baguette食早餐, 咖啡杯湊成一對, 好可愛.

首爾親子自由行-Day6

囝囝們考完試, 快要放假了, 我終於可以鬆口氣.

不過, 每年最討厭的年終工作評估要開始, 希望今年不會有麻煩case.

13.06.2017

這天我們很早就要起床, 因為要去踩江村鐡路單車. 起點是位於京春線金裕貞站(Gimyujeong)的Rail Park, 由首爾站坐地鐡要坐兩個小時, 轉兩次車才到.  我訂了十一點的鐡路單車(從Funtastic Korea 訂的) , 但要早半個小時去到, 所以八點左右就要起程.

開始時坐一號線地鐡都幾逼, 因為繁忙時間. 由回基站轉車之後就有位坐了.  坐足兩個鐘頭, 細佬都瞓着覺.

漫長兩個小時後, 終於到金裕貞站.  金裕貞是韓國的一個作家, 這站就是以他的名字來命名的.  這站好古色古鄉.

首爾親子自由行-Day5

停得越耐, 越提不起勁繼續寫.  翻看照片時, 發覺記憶已經開始有點模糊, 所以這篇不會寫太多細節.


12.06.2017

今趟去韓國每日都勁好天, 即係好熱呀.  這日我們去了愛寶樂園, 全日都好熱好曬, 不過囝囝們依然玩得好開心.

愛寶樂園離首爾有一段距離, 坐車去都幾遠.  可以坐普通巴士, 地鐡, 特定旅遊巴士, 想更舒服方便又不介意俾錢的當然可以包車或的士.  交通詳情可以去愛寶樂園網站查看.

坐普通巴士要先坐地鐡又未必有位坐, 所以帶住小朋友都不考慮了.  地鐡要轉三次車, 車程好長, 算了. 剩下shuttle bus, 上網找資料時, 發現有好多shuttle bus package, 包來回巴士和入場卷, 價錢比官網上的入場卷價錢便宜一截.  而且上落車地方亦好方便, 在首爾站, 明洞等都有pick up point.  我們住首爾站附近, 當然就選在首爾站上車.  我從Funtastic Korea買的.

朝早9.20上車, 不用太早起床.  車程大概50分鐘左右, 不過落車地方只是一個停車場, 還要再坐免費的Everland Shuttle Bus先去到入口處.  要記住落車時是那一個停車場, 因為那裏有幾個停車場的, 回程時要坐對的shuttle bus回到同一個停車場坐回程巴士.

坐shuttle bus算快又方便, 不過回程時間是6.30pm.  因為要先坐接駁巴士去停車場才能到回程車士站, 建議還是預留半個小時以上, 所以最遲6pm就要去到出口.

最尾十點半左右去到愛寶樂園, 雖然是星期一, 都仍然好多人, 亦有好多本地學生, 是學校假期嗎?

十點半到, 六點就要走, 在園內時間並不多, 所以我們買了Express pass, 可以不用排隊優先玩最受歡迎幾樣的 (Amazon Express, T-express, Safari World, Lost Valley, Panda World).  我們在香港和新加坡都睇過熊猫, 所以沒買Panda World 的express pass.

首爾親子自由行-Day4

突然驚覺已經十月了, 還在寫六月的遊記...

11.06.2017

這天星期日, 哥哥要去洗傷口.  當日急症室的醫護說可以去其他診所, 不用特地回去慶熙大學醫院.  我們住的Airbnb旁邊就有間兒童醫院(소화아동 병원, Sowha Children Hospital), 規模看來不小, 整棟大厦的.  我們以為洗傷口這種簡單功夫, 應該沒問題吧.  一早起身我就帶哥哥去這間醫院, 以為快快洗完傷口就可以去玩.  去登記處問, 一輪雞同鴨講後, 叫我入去病房問護士, 再多一輪雞同鴨講後, 護士說他們沒有外科, 所以不能洗傷口, 一定要去大醫院才可以.

最後還是要坐車回去慶熙大學醫院的急症室.  其實只是用消毒藥水抹傷口, 換片紗布而已, 但也花了大概S$100, 還好保險有賠.  就這樣簡單的洗傷口就花了一整個上午, 離開醫院大家都肚餓了, 求其在附近一間越南牛河餐廳食牛河. 這餐廳是快餐店式的, 味道OK, 沒有Thai basil和芫茜, 只有蔥, 但價錢好平, 四碗牛河才15,600won. 

首爾親子自由行-Day3

今年公司有些變動, 所以每日都好忙.  公私兩忙下, 看來這blog要生草了.  不過, 首爾遊記還是盡力寫完的, 留個紀念.

10.06.2017

這日的行程重點只有一個, 就是昌德宫的後花園-秘苑.  秘苑被UNESCO列為文化遺產, 遊客不能自己入內參觀, 一定要在指定時間跟導賞團入內.  導賞團有英文, 中文和韓文的, 每日有十四團, 每團100人, 其中50個位可以在一個星期前在網上預訂, 另外50個就留在當日在現場買飛.  遇着旅遊旺季, online booking 好快就滿, 現場的也是一票難求.

上年十一月和妹妹去首爾時訂不到秘苑的導賞團, 好遺憾, 今次決心一定要入去.

行程上安排了星期六去昌德宫和秘苑, 網上預訂只容許七日前(即之前一個星期日)預訂.  星期日要去教會, 下晝還要出發去馬來西亞的教會生活營, 好緊張地在崇拜和去馬來西亞之間的短暫時間用手機上網book.  不知道是不是因為星期日的關係, 星期六的booking 仍未開放, 唯有先book 星期五.

星期一在馬來西亞時再試試用手機上網, 居然星期日朝的導賞團仍然有位, 即刻改了booking, 好開心可以照原訂計劃.

我們預約了十一點半英文的那團. 一早起身就好雀躍, 食完早餐就衝去昌德宫.  半個鐘前已經去到秘苑閘口等候.  導遊在入口處做點簡單介紹就開始起行, 一團人浩浩蕩蕩入秘宛遊覽.  穿着韓服的女導遊英文很標準, 講解好清楚.

第一站叫是芙蓉池, 好靚, 是那種純樸自然美, 沒有精雕玉砌的.

首爾親子自由行-Day2下

09.06.2017

食完午餐, 我們就去慶熙大學參觀. 上年十一月和妹妹去慶熙大學, 剛好遇着紅葉季節, 影相勁靚. 所以今次也帶三父子去欣賞這充滿歐陸色彩的校園.

哥哥午餐食到不滿足, 天氣又熱, 所以沒心情影相.  細佬就仍然好開心地擺甫士影相.  這張是在圖書館門外影的, 也是今次在慶熙大學影的唯一一張相.

發牢騷

今日容許我發一陣牢騷, 因為好火滾, 連續四件事令我陷入爆粗邊緣.

一.
噚晚哥哥發高燒, 喉嚨發炎.
但今日有校際choir比賽, 哥哥不想錯過.
於是我話如果今朝起身無燒, 我就開車送佢去學校, 咁佢可以遲些少起身.
今朝無燒, 6.30叫佢起身.
6.45 居然仍在換校服, "媽咪, 你幫我執choir套制服同鞋襪啦."
好, 見你病, 我忍, 幫你執.
跟住大少爺就好悠閒地邊食早餐邊睇手機.
幾乎七點時, "食咗藥未呀?" "噢"
食完藥, 原來仍未執好書包.
最後7.10出門, 每條路都塞車!
早會時間是7.30!!!
當然阿媽我一上車就不停地哦, 你以為我識開飛機定火箭呀!
7.26到小學部後門(中學部前面勁塞), 唔該自己行過去, 我已盡人事了.

二.
今朝八點半有個deadline, 一定要寄出份文件.
噚日叫同事跟, 做完寄俾我過目下才寄出.
成晚無聲氣, whatsapp加sms才覆話噚晚會做好.
最後係淩晨先寄俾我. 今朝我9.30要去外面開會.
唯有送完囝囝返學後開車返公司, 改完份嘢再寄出, 然後才去開會.

三.
今朝趕時間, 所以一早8.10到公司就去canteen買早餐和咖啡 (平時我自己帶早餐的).
我: "Auntie, 唔該打包炒麵和一杯咖啡"
Auntie: "我仲有好多嘢要拎出嚟先呀...我哋八點半先開始架....(下刪無數字)"
阿姐, 我真係好趕時間呀, 可唔可以求其俾包炒麵我呀, 咖啡無就算啦.
(之前個canteen operator好早就開工, 七點幾到都有早餐有咖啡賣)

四.
邊食早餐, 邊改文件.
跟住又開車去開會.
有另外三個同事, 佢哋由屋企直接去.
(我公司喺好山旮旯的地方, 無人朝早喺外面開會會先返公司再去囉)
呢三位哥哥好勁爆, 開會前連要見的那間公司資料都無揾過, 全程廢噏, 激死!
我唯有盡量幫佢哋兜, 但其實我好想揾窿捐.
開完會10.30.

首爾親子自由行-Day2上

9.06.2017

第二日原來的行程: 首爾路7017 - 南大門 - 梨花洞壁畫村 - 慶熙大學 - 高速巴士轉換站地下商場(GOTO Mall)

後來出途出了意外, 打斷了行程, 下篇再詳述.

首爾路7017今年五月才開放的. 首爾路7017本來是棄置了的行車天穚, 首爾市政府由2015年起開始將這些行車天橋活化, 改建成連接17條路線的首爾路7017步行道 (70: 行車天橋是70年代起的; 17: 17 條路線).  遊客可利用這步行路來往首爾站, 南大門, 明洞和首爾塔等景點.

我們住的Airbnb剛好就在入口對面, 過條馬路就到了.

夜晚會沿路會有燈, 好靚.

首爾親子自由行-Day1

六月頭兩個星期我一家去了馬來西亞和首爾, 所以好耐無寫blog.

馬來西亞的是四日三夜的教會生活營, 兩年一次, 只是聽講座和教會活動, 馬來西亞的渡假酒店只是普普通通, 不值一提, 所以馬來西亞行就不寫遊記了.

上年十一月和妹妹去首爾玩, 哥哥見到相後也嚷着要去. 於是趁六月學校假期一家人去旅行.

每個family trip 我都是last minute 才來計劃的, 六月八號飛, 正正五月八號晚才在Daddy的催促下訂機票和住宿, 好彩在限韓令下住宿仍有大把選擇. 因為和囝囝們去住apartment 會較便宜和方便, 所以今次我們從Airbnb 訂了一個有閣樓的apartment, 地點就在首爾站對面, 極方便.

八號早上八點半坐星航機, 下晝三點幾就到仁川機場.  因為住宿就在首爾站, 可以坐機場快線(AREX), 43分鐘車程再過條馬路就到apartment 了.  坐AREX又舒服又快, 比機場巴士快好多, 還便宜一大截.

記得五年前坐星航去首爾, 在飛機上有兩餐食, 所以到埗時不會餓.  但今次只食了一餐早午餐, 落機都開始覺餓.  放低行李就快快出發去食晚餐. 我讓哥哥二選一: 豬腳或生蠔菜包肉.  哥哥選了生蠔菜包肉, 因為他想食三層肉.

今次同樣去了將軍生蠔菜包肉(장군굴보쌈), 坐地鐡去鐘路三街十五號出口, 行入藥房旁的小巷, 再轉右, 就是一整條的生蠔菜包肉一條街.  其實成條街上所有食店都一樣賣生蠔菜包肉(굴보쌈), 如果不是和囝囝們去, 我會試將軍以外的食店.  不過和囝囝們去不宜冒險, 還是去食過覺得好味的.  地點和餐牌上次有詳細介紹過, 有興趣請參考舊post.

哥哥見到有豬腳又想食, 於是叫了半份豬腳半份三層肉. 好大碟肉, 中間有泡菜和醃蘿蔔, 生蠔另外放在右邊的小碟上.  中間那碟是辣炒魷魚, 今次的炒魷魚較失色, 因為不是現炒, 已經凍了, 沒上次的香, 雖然仍然好味.

蒜蓉蒸竹蚌

兩個星期沒寫blog, 快要被列為網上失踪人口了.

最近有點懶, 有點忙, 也因為生病了. 哥哥上星期六發高燒和咳, 結果我亦被傳染. 不過我只是微燒, 但就咳到甩肺. 睇了兩次醫生, 換了強效點的藥, 已經好點, 但副作用就是手震和身痕. 現在邊打字邊手震, 好似個老太婆一樣.

以前細個我的福州籍舅母常常會買蟶子來蒸, 把蟶子排在深碗內, 倒入紹興酒, 蒸幾分鐘即可, 清甜又有酒香. 可惜, 在新加坡很難買到新鮮蟶子, 所以很久沒嚐過了.

超市有急凍的蟶子賣, 大大隻的, 叫竹蚌. 剛好最近有特價, 買來試試. 逐隻剪開洗乾淨, 以確保沒沙. 加金蒜來蒸三分鐘, 撒點蔥花即可.  味道還算滿意, 當然不能和新鮮的相比, 但有得食已經好開心.

芫荽皮蛋魚片湯

星期三是這邊的佛誕, 叫做Vesak Day, 放假一日.

前一日Daddy己經講好要去東海岸公園踩單車.  不過, 朝早起身天陰陰, 似乎要落雨.

但Daddy都決定照原計劃出發.  我們有兩架單車, 一架Daddy 的, 一架哥哥的.  細佬就帶他的scooter.  那我呢?  我就只有行行企企呆等他們囉. 一到東海岸, 已經落微微雨, 兩父子都照去踩單車, 丟低我和細佬. 無耐就已經行雷閃電, 於是我和細佬就入cafe坐低飲嘢來等兩父子.

踩完單車後就去附近商場食午餐, 跟住就返屋企了. 可能淋了少少雨, 呢兩日都好似有啲作病咁.

返到屋企開雪櫃, 見到有包芫荽, 買了幾日, 再唔食就要丟. 煮咩好呢? 諗起芫荽皮蛋魚片湯, 即刻去超市買多兩包芫荽和一包鮫魚肉(呢邊無鯇魚).  晚餐就滾了N年無飲過的芫荽皮蛋魚片湯了, 只用鹽調味已經好好味, 因為重點是芫荽味.

這湯應該是下火的, 因為細個每逢牙肉痛, 媽咪都會煮呢個湯, 還會加茶瓜(當然呢邊又係無啦).
囝囝們最討厭芫荽味, 一聽到芫荽湯即時面露厭惡.  但一聽到我話下火和對牙肉痛有用, 哥哥就好乖地飲了一碗, 因為他覺得自己熱氣, 牙肉有些少唔舒服.  算佢醒目啦.

偷步版越南牛河

星期六午餐通常都是簡單的湯麵, 炒粉, 炒飯之類.

去超市見到有金不換, 當時沒想到要煮什麽, 買了先算. 同日又在街市買了新鮮牛肉.

回到家, 想來想去, 煮越南牛河吧.  說時遲, 那時快(最近陪囝囝温習時學到的一句), 牛肉就煮好了, 只用了十幾分鐘就攪掂.  沒買牛丸, 用了雪櫃裏的魚蛋.

這碗是細佬的, 怕他不吃生芽菜, 所以先稍灼過.  這張相是細佬影的, 他自己決定筷子要放碗上面.