三姊妹北九州行(三) - 由布院

16.12.2015

前一晚由熊本回到博多後, 就立刻去火車站劃第二朝去由布院的車位.

我們打算坐由布院之森觀光列車的, 當我們在劃位紙上寫上由布院之森一號時, 還未填完張表, 職員已經把我們叫停, 指指電視, 原來整個星期每日的四班由博多去由布院的列車(包括兩班由布院之森)的指定席都已滿!!!!!

怎麽辦? 温泉旅館都訂了, 不能改呀.  好彩仍然可以不劃位坐有兩卡自由席的7:45或12:20的由布號.

估計7:45這麽早會較少人坐, 於是我們大清早起身, 七點半之前已經去到月台, 希望可以排前一點可以有位坐.  居然一早就已經有人排隊, 好彩, 我們仍然算早, 有位坐.  車程要2小時10分鐘, 沒位坐的話會企到腳軟.

十點便到由布院, 先把行李拿到旅館寄存.  我們那晚住的是湯布院山灯館, 由火車站行去要十五分鐘.  從旅館website見到好像可以打電話叫他們開車來接的, 但我們怕雞同鴨講, 那天天氣也很多, 走走也無妨啦.

旅館下晝三點才可以check in, 所以先到處逛逛.  由布院最出名的就是金鱗湖, 就在我們旅館附近, 當然第一站就去那裏.  這湖是蠻靚的, 但比想像中細好多, 一眼望完.  如果樹葉都轉紅了, 應該會更美.

由金鱗湖朝火車站方向行, 經過見到好多舊式入錢的車仔. 小時候見到都會嚷着要爸爸媽媽給錢去坐的, 很懷舊呢.  再睇清楚, 原來這地方叫九州自助車歷史館, 外面放了一些來吸引人, 後面building 內有更多, 但要收入場費, 我們沒入場, 在外面影幾張相就算了.

那天天朗氣清, 影相特別靚, 心情也非常好.

然後經過這個叫Yufuin Floral Village的地方, 裏面都是很童話式的小屋, 都是賣各式毛公仔, 紀念品等, 不過主題是童話譬如Alice in Wonderland, Peter Rabbit等, 感覺不是很地道日本. 除了各式小店外, 還有間餐廳, 猫頭鷹公園(可付費入場睇猫頭鷹), 和一隻望落好悶但似乎給遊人喂到好肥的山羊.  我們對這很人工化的地方沒甚興趣, 行一圈就走了.  但這地方應該是大部份旅行團必到, 那天見到很多旅遊車在外面停車把旅客放低.

之後就找地方食午餐了. 之前聽說那裏的地雞出名, 於是特地找間有賣地雞的餐廳.  我們選的這間似乎很地道, 因為所以客人除了我們外都是日本人.

我的地雞湯配蕎麥麵, 一心想食地雞, 但這set似乎麵才是主角, 雞湯只是配角.  湯內只幾塊好細的雞肉, 有點到喉唔到肺. 但麵倒是很好, 好像是即做的, 彈牙好味.  

細妹叫了一小碗地雞飯配鮮淮山蓉.

二妹的地雞飯配野菜湯麵. 地雞肉質很有咬勁, 像豬肉多一點. 二妹這碗飯好好味, 真後悔要了那雞湯麵.

吃飽又繼續行, 一見到這蛋糕店就被吸引住了.  就算剛吃飽也要坐下來試試.

叫了三樣來試, 有雞蛋布甸, 芝士撻和卷蛋.  三樣都超級好味呀! 我最愛雞蛋布甸, 又滑雞蛋味又濃.  我們並沒有試出名的B-Speak, 因為早上經過時拉着行李, 不想多拿一袋.  妹妹們也覺得卷蛋就是卷蛋, 間間都差不多, 沒必要一定要買它.  最後, 到我們行到B-Speak時, 蛋糕已售罄.

大街兩旁都是舖頭, 賣紀念品, 首飾, 漬物, 酒, 蜜糖等.

我就在這間蜜糖舖敗了一樽藍莓蜜糖給囝囝們.

這店外有手湯, 冬天來可以暖暖手也不錯.

龍猫店.  我不是龍猫粉絲, 但有個朋友是, 所以也入內逛了一下買了一點點.

我至愛的Monchhichi呀!!!!! 店內有好多好多大大小小不同造型的Monchhichi, Monchhichi粉真的會有選擇困難呢, 我也心大心細揀了好久, 最後買了一隻穿和服的. 走到這裏我已經買了好多東西了, 要忍手不能再買了.

細妹見到這薯餅完全不能抗拒, 非買個來試不可.  我和二妹都不大好炸物, 就只買了一個來試.  試了一小口, 不愛炸物的我也要讚好味.  炸得很酥脆但一點都不油, 裏面有芝士饀, 好正!

二妹一直想食鱆魚燒, 這裏也有, 但像雪糕球那麽大, 午餐加蛋糕都仍未消化, 吃不下了.

這間酒莊外有個稻草人.

走到這裏差不多三點了, 我們決定回到旅館check in, 然後先泡泡温泉才等待晚上的豐富晚餐.

由布院温泉旅館下篇再續.


三姊妹北丸州遊(一): 博多
三姊妹北丸州遊(二): 熊本, 鳥栖
三姊妹北丸州遊(三): 由布院
三姊妹北丸州遊(四): 湯布院山灯館
三姊妹北丸州遊(五): 別府
三姊妹北丸州遊(六): 小倉, 門司港
三姊妹北丸州遊(七): 柳川, 太宰府
三姊妹北丸州遊(八): 回程篇