哥哥五歲生日

依家d 細路真係好幸福, 生日好似大晒咁, 多多要求. 

上年哥哥生日响麥記帮佢攪咗個生日會, 請晒成班同學仔, 佢開心到飛起. 原本唸住攪一年等佢開心吓啦, 點知佢expect年年都有大celebration.  依家都有d後悔開咗先河. 

不過其實都無可避免架, 因為佢個個同學仔生日都一樣咁大陣仗. 早排就有個同學生日响KFC開生日party, 誇張到指明參加者要著Ben10 T-shirt. 結果我嘥咗成廿蚊坡紙買件T-shirt.

今年哥哥又話要生日party, 為咗費事嘥錢就提早幫佢係學校攪 (呢度學校十一月中就放假到一月新學年開始先開學, 所以佢生日撞正school holiday). 佢落order 要 McQueen 蛋糕.

當日我就做阿四負責拎蛋糕, 益力多, chicken nuggets, goodie bags, 碟啊叉啊,..., 去學校, 佢就開心到痺, 我就拎到索氣.

你睇d小朋友幾開心!

大少生日當然唔止一個生日會咁簡單啦, 下期再續.