二人晚餐@Brotzeit

和Daddy去Sentosa享受二人世界, 但酒店package不包晚餐, 要自己去揾食.
Sentosa作為旅游點, 飲食方面只有兩個極端, 一係就好高級好貴, 一係就平啲(其實都唔平)但唔好食.  反正酒店有免費巴士來回Vivo City, 十分鐘車程就到, 那裏食肆選擇超多, 一定揾到啱心水.
不過知道做完spa都已經遲, 又係星期五, 好食的地方一定大排長龍, 所以前一日就book定位.  好耐冇食德國菜, 所以揀了Brotzeit.
第一次去Brotzeit, 八點到, 好彩我哋有訂位, 因為外面條隊已經好長.
這其實是一間酒吧式餐廳, 所以都幾嘈, 要傾計要大大聲講.
平時因為要駕車, 只可以其中一人飲酒.  今次可以兩個人一齊飲, 真開心.
左邊是Daddy的Münchner Dunkel, 充滿了麥香, 右邊是我的Münchner Weissbier, 清啲都好好味.  Prost!

我們只叫了一客德國豬手和一碟田園沙律. 豬手皮好脆, 肉醃得剛好, 好嫩滑又唔會乾.  拌菜有sauerkraut (酸椰菜)和薯仔沙律.  Sauerkraut不是每個人都會鐘意, Daddy就唔鐘意, 但我覺得食heavy德國菜, 酸酸哋的sauerkraut就最配合.  薯仔沙律和我德國朋友整的一樣, 是用醋拌的而非平常的mayonnaise, 夠正宗.





這是細碟的田園沙律, 但其實好大碟.  裏面的菜好新鮮, 上面還有薯仔沙律和半隻烚蛋, 女仔可以當正餐食都夠飽.


我哋食得好努力, 最後都係有剩少少.  好想打包條豬骨返屋企留嚟煲粥, 又好似唔係咁好意思, 最尾都冇拎走.

呢間啲啤酒同食物都係正宗德國口味, 好正, 下次我要帶埋囝囝哋一齊嚟食過.  不過要記得一日前訂位, 咁就唔駛排隊嘞.

今餐盛惠S$73, 算好抵.  呢邊啤酒好貴架.