歡迎BigheadMABEL@草

好開心網友bigheadMABEL嚟新加坡探我哋, 終於見到真人啦, 仲有佢朋友B添.

約埋愛美麗去老巴刹食沙爹, 特地選一張方形四人枱, 枱面大啲, 叫多啲嘢食都唔怕唔夠位放.

今次我醒目, 坐到街的另一邊, 即沙爹檔9號到14號那邊, 沙爹好食好多.

我哋通常都會叫10, 10, 10 支沙爹, 即雞, 羊, 牛, 每樣十支. 正要叫時, B話太多, 咁就叫5,5,5啦. 我都係第一次叫咁少, 估唔到佢哋咁細食.

呢檔沙爹叫asli, 好味.

我哋坐低後就有個姐姐喺隔籬好有耐性仲笑笑口咁等我哋點菜, 我哋又好衰咁掛住傾計要佢等好耐. 最尾點了貢貢, 幾好, 肉滑又鮮甜, 只係細隻咗啲.

螄蚶一碟, 都ok, 不過可能有啲唔乾淨, 食完第二朝有少少肚痛和輕微肚瀉, 幸好並不嚴重, 我仍照樣食韓國燒烤.

清炒小芥蘭, 炒得好味. 小芥蘭香港冇既, 所以過嚟要試呀.

馬來炒麵, 辣辣的油麵, 其實炒得算不錯, 沒有梘水味, 但油麵非我所愛.

四個人就食了這幾樣, 居然沙爹食剩一支, 炒麵食剩大半.  都怪Mommy之前帶佢哋食太多嘢了.

其實最主要都係見下見面, 傾下計. 可惜因為叫了Daddy開車來接我, 順便人肉速遞一樽魚膠粉給B, 他車到我就要趕着上車(男人是不能等的!), 沒有時間好好傾, 下次返香港要再約見面.

之前在blog上見到Mabel的自製袋, 超鐘意其中一個, 現在居然給我據為己有, 開心死我啦.  多謝晒你呀, Mabel!   仲有兩個髪飾都好靚, 手工精細, 我仲未捨得拆來用.

我冇Mabel咁叻手工咁好, 只準備了一個班蘭戚風.  雖然外表ok, 沒大窿, 但總覺得發得唔夠, 所以焗好後那晚整晚忐忑不安, 諗究竟送唔送好, 最後都係硬着頭皮送出去了.

今朝Mabel話蛋糕ok, 咁我先放心啲.  送戚風蛋糕最大問題係唔切開真係唔知裏面咩樣.