大個仔啦

噚晚帶細佬去樓下診所覆診, 大排長龍, 攪到九點幾先睇完.

所以今日仍然好攰, 冇乜 mood 寫嘢.

要寫啲令我開心啲既事, 就講吓兩個囝囝既趣事.

最近發覺大仔肥咗, pat pat 多咗肉, 打落彈手. 

除咗大隻咗, 成個人都好似'成熟'咗, 開始識得照顧細佬.

會帮細佬著鞋, 著袜, 著褲.

細佬俾人鬧, 會去安慰佢, 攬住佢同佢講 " It's okay, I love you"

姐姐話有次兩個爭玩具, 姐姐兩個一齊鬧, 細佬喊到成面鼻涕, 哥哥就走埋去, 搭佢膞頭話 "It's okay, I love you", "Don't cry, come, we share, let's play together".  最意外係佢居然去拎張紙巾帮佢抹鼻涕!  佢一向連自己抹完鼻涕張紙巾都唔肯拎去丟, 嫌污漕.

最鐘意就係懶叻教細佬彈琴, 佢同細佬講, "嗱, 你大個都要學架, 你依家留心聽首歌呀", 真攪笑. 

兩個唔爭嘢一齊玩時真係好得意, 睇吓兩個攞我同姐姐既sarong嚟著.