簡單就是美

見到個標題, 會唔會以為呢篇係講扮靚呢?

簡單就是美

形容我做蛋糕裝飾時既心情係最貼切, 尤其毫無頭緒的時候用來自我安慰. 

前晚腦裏面就不停同自己講呢句.....

大家睇相就明嘞..... Blackberry yogurt mousse cake

風箏

上星期六去Marina Barrage 放風箏, 係教會既 International Student Outreach Program 既其中一個節目.

今年我哋參加咗 host family program, 要接待外國嚟既大學生, 讓佢哋嚟到陌生地方讀書都可以有本地家庭作照應.  自己都做過留學生, 好明白離鄉別井, 無依無靠既感受, 所以覺得呢個program 好有意義.  除咗俾佢哋少少家既感覺外, 亦希望讓佢哋有機會接觸福音.  由於係non-residential program, 啲學生係唔會嚟同我哋住, 只係定期約佢哋出嚟和maintain contact, 關心吓佢哋咁啫.

呢次放風箏, 有教會既朋友, 仲有我哋唔同家庭接待既學生, 大家都玩得好開心.  呢個係我今年接待既女仔, 由北京來的, 每次見到我兩個囝囝佢就會好開心.

嗰日設有自製風箏比賽, 佢呢隻用報紙整既攞第一添.

香橙戚風蛋糕

最鐘意整戚風蛋糕, 貪佢易整又快趣.

呢排超市啲橙好平, 上星期買咗一大袋, 即時諗要整戚風蛋糕.

奈何上星期太忙, 一拖再拖, 等到食淨最後兩個橙先得閒整, 好彩橙夠大個, 一個已經夠.

原食譜用三個蛋黃五個蛋白, 我最怕要淨蛋黃, 就改用四個蛋白, 其餘材料照舊, 只減少打蛋白既糖份量.

雖然只用四個蛋白, 最後麵糊都好滿, 焗時好似火山爆發咁, 幾孚瀉出模外.  甩模後好似頂帽. 

人細鬼大

大仔噚日第一次帶飯返學, 好好奇佢有冇食晒呢?

答案係 - 唔知, 因為佢無帶個飯壼返屋企! 

嗰個係日本牌子唔平架, 希望佢老師會揾番俾佢啦.  好彩姐姐醒目, 將佢個名貼晒喺個袋和個飯壼, 連匙羮同叉都有名, 應該唔會唔見啩.

我問佢到底有冇食, 佢話有, 仲分埋俾同學食, Grace 食咗兩嚿, Elisa又食咗幾多嚿, ......

點解全部都係女仔名嘅?

佢好鬼人細鬼大架, 依家去親教會就會揾呢個小妹妹玩, 食早餐都要坐埋一齊, 鬼咁friend.  佢話最鐘意長頭髮紥孖辮既女仔喎.

今年年中教會有朋友會結婚, 大仔應承咗做花仔. 新郎哥想揾嗰個小妹妹做花女, 上次去問佢, 個小妹妹就請佢食檸檬, 直接say no.  啱啱星期日佢見兩個細路坐埋一齊, 就再問佢: "哥哥 (我大仔) 會做花仔, 你要唔要同佢一齊做花女呀?", 個妹妹即刻大大聲話"要".  好攪笑.    唔知大個啲時仲會唔會咁friend呢? 

小朋友一齊喺教會成長, 一齊上主日學, 其實真係幾好.

牛腩兩食

上星期好忙好忙, 工作忙, 放工後又有嘢做, 唔得閒update個blog, 今個禮拜希望可以勤力啲啦.

噚日姐姐放假, 我又可以霸番個廚房一日.

朝早去教會, 食埋午餐先番屋企, 咁可以煮少餐嘛. 

上星期日買定牛腩存入冰箱, 噚晚就整牛腩兩食 - 柱候牛腩, 蕃茄洋葱紅蘿蔔牛腩湯.

加埋白蘿蔔和百頁結嚟炆, 蘿蔔炆到入晒味, 好好味.  大仔從來唔食蘿蔔都食咗幾舊, 細佬都食得好快, daddy當然話好食啦, 佢鐘意食牛嘛.

又嚟伯爵奶茶小蛋糕

今個星期好忙, 無乜時間寫嘢.

星期日返完教會就諗要為大仔預備咩茶點, 因為佢今個星期開始要上enrichment class (差唔多興趣班和補習班), 星期一到四毎日都要上.  要留喺學校多成個幾鐘, 一定要帶啲茶點返學, 咪返到屋企佢會餓扁.

諗來諗去都唔知整乜好, 問佢要乜, 佢又話唔知, 最尾都係話要伯爵奶茶小蛋糕.  同上次一樣要有藍莓和朱古力喺面, 仲刁鑽到話要加埋兩片薄荷葉, 真係睬佢都儍!

一次過整好多個, 夠佢食足四日嘞.

佢真係食足咁多日都唔厭噃, 不過佢將啲藍莓俾晒同學仔食, 淨係食個蛋糕同上面少少既朱古力.  問佢點解唔食啲藍莓, 佢話: "我唔鐘意食, 我只鐘意個蛋糕同朱古力".  俾佢激奀!  早知就唔駛特登走去買啲藍莓啦, 嘥我時間金錢!

食譜請參考舊post.

蒜蓉牛油焗青口

星期日晚餐未必係我煮, 但都常都係我打骰.

星期六响街市買既釀豆腐, 白灼生菜, 老火湯, 仲驚唔夠餸, 諗來諗去, 再加味咩好呢?

開冰箱發現一盒急凍紐西蘭青口, 就簡簡單整蒜蓉牛油焗青口. 

做法好簡單, 只需將蒜蓉混合軟化牛油(係軟身, 唔係溶化), 再加啲香草碎(parsley, oregano 之類, 隨意), 鹽和黑胡椒調味.  青口解凍後, 放在焗盆上, 在毎隻青口上放一團蒜蓉牛油, 用160度焗7-10分鐘至熟.  今次我用喜瑪拉雅山粉紅鹽來調味.

Daddy 食完第一隻青口, 就讚好味, 仲話我應該多啲入廚煮飯,  聽得我幾開心. 

綠茶紅豆慕絲蛋糕

星期六下晝想挑戰卷蛋, 廚柜裏有罐買咗好耐既日本紅豆, 就整綠茶紅豆慕絲卷蛋。

之前試過幾次卷蛋都唔成功，次次蛋糕面都會痴住張用嚟卷起片蛋糕的牛油紙。

留言請教韋太點至唔痴，韋太話要焗至乾身啲。 於是我比食譜訂既時間焗多幾分鐘，但出嚟片蛋糕皺晒皮，樣衰衰咁，點解？

食譜話要趁熱卷起，但我怕痴紙，冇勇氣趁熱卷，諗住攤涷少少應該都OK啩。

到整好慕絲，一卷成片蛋糕即刻裂開! 

卷蛋挑戰又告失敗。

咁啲慕絲同蛋糕點算呢? 

求期將蛋糕切半，中間夾慕絲，上面樣衰再抆慕絲遮住。

横掂都係用嚟玩，好，剩番既慕絲用買咗好耐都未開張既聖安娜咀做唧花，都係一樣咁醜，但至在玩吓個新咀啫，冇所謂啦。

本來應該靚靚既卷蛋就俾我攪成醜醜既夾心蛋糕嘞。

失敗乃成功之母, 我一定要再挑戰卷蛋!!!!

大頭蝦

我冇食大頭蝦, 大頭蝦係我自己. 

大頭蝦既代價係S$133, 同埋冇得照計劃去見室內設計師然後去行街食飯. 

噚日覆診完由地下停車場駛出既時候, 因為停車場比較暗, 所以開着車頭燈.

出停車場腦裏面只諗應該行詳路返公司, 無即時熄燈, 結果都係轉錯個彎兜遠咗.

返到公司已經幾遲, 快手泊車就上office, 居然唔記得熄燈!!!!!

响office三個鐘後就要走, 因為約咗室內設計師傾新屋裝修. 

照平時拎住車匙噤制開門, 冇聲, 冇反應! 

Oops!  打電話叫AA嚟, 個接線生話要等一個鐘.  無法啦, 一個鐘都要等.  奇妙地要返上樓等時撞到公司司機, 問佢識唔識jumpstart架車, 佢話識, 即時帮我, 終於撻着架車. 

雖然破財又麻煩, 但諗返都要感恩:

1.  我公司係响禁區(Restricted zone)內, 要有特別通行証先入得, 我毎日返工到好似出境過海關咁過安撿.  所以就算AA車入嚟救我都一樣要先申請臨時通行證, 而我公司裏面只有幾個人係有權去帮手申請架.  如果等到AA嚟, 啲人放晒工到時可能已經揾唔到人帮手申請.

2.  如果唔係有約, 我照平時六點過後至走既話, 大部份人都放晒工, 嗰時真係叫天不應叫地不聞囉, 仲邊有人有車可以帮我jumpstart架車.

3. 如果冇呢件事, 我連自已車裏面有條 jumpstart cable 都唔知, 依家我知道車死火要點做. 

4.  AA 後來回電話話揾到技師, 我話已經開到車, 叫佢哋唔駛入嚟, 等我返到屋企個停車場先嚟帮我換電池.  但接線小姐話技師已在途中, 叫我响禁區外既停車場等, 都好喇, 快啲換都安心啲.  之前公司司機千叮萬囑叫唔可以開冷氣, 所以路上要開住窗, 點知未到嗰個停車場, 已經開始落雨, 仲要係好大雨, 個師傳帮我換電池時我都要帮佢擔遮.  我諗如果一路開住窗揸到返屋企, 我成身成車都會濕透.

今次貼錢買個教訓, 以後千萬千萬切記要熄燈!!!!!!

日式炸豬扒三文治

今朝請半日假去覆診, 約咗10.50am, 以為可以瞓晏啲, 點知兩位少爺晨早就起身.

去到診所, 首先個護士帮我驗眼, 仍然係perfect eyesight (6/6), 今次仲驗埋eye pressure, 一切正常. 

跟住等見醫生, 等咗成個鐘.  醫生話好好, 一切都好好.  之後猛話: 以你之前咁深近視, 同你既年齡, 人哋可能要成半年先可以逹到你呢個康復程度, 所以你既進度喺非常之好.

佢講咗好多次"你既年齡", 哼......... 家陣我好老咩!!!

兩個月後要再去見佢, 千祈唔好再俾我聽到佢講嗰句話! 

仲諗住今日食個悠閒午餐先返公司, 點知離開診已經12點15分.  診所喺Paragon, 名店林立, 冇乜嘢啱一個人去食.  於是走去對面 Takashimaya 底層 Food Hall, 食日式炸豬扒, 唔駛等都有位坐.

趕時間唔食飯, 叫一個 sandwich set, 炸豬柳三文治, 椰菜沙律加一杯飲品, 盛惠S$11.  响烏節路可以坐低慢慢食, 呢個價錢簡直係超值.  沙律同三文治裏面啲菜, 蕃茄都好新鮮, 嗰幾塊炸薯角勁正, 外脆內軟, 怕熱氣既我都忍唔住食晒.

呢個餐好味, 食完飽到上心口.  不過下次都係叫番平時叫開既 rice set, 豬扒會脆啲.

柚子蜜戚風

吃了很多天麵包做早餐, 已經受不了, 噚晚都要整番個蛋糕嚟換吓口味.

打開雪柜, 見到樽柚子蜜開咗好耐吓, 就整柚子蜜戚風.

一邊整大仔一邊嘈, 話唔識做功課.  只需寫"长" 和 "大" 兩個字各六次之嘛, 點會唔識呀, 擺明係想玩唔想做功課啫.  揸住佢隻手教佢寫一次, 之後叫佢自己寫, 再帮佢既話就變咗我做功課而唔係佢做嘞.

俾佢嘈到我都無法專心整, 到最後步驟時覺得有少少怪, 但又講唔出有咩唔妥. 

終於今朝揸車返工時俾我諗到 -  平時我會將一半蛋白加入蛋黃糊中, 拌勻後, 再將蛋黃糊倒番入剩餘蛋白內拌勻.  但噚晚我將剩餘蛋白倒入蛋黃糊裏, 怪不得嗰一刻我都呆咗幾秒, 有少少唔知點攪勻既感覺.  其實分別唔大, 只係一向做法比較易拌勻, 而噚日做法蛋黃糊比較沉底, 難少少拌得勻啫.

呢個就係今朝美味既早餐嘞, 裏面好軟熟好濕潤, 仲有柚子蜜既香味, yummy!

大個仔啦

噚晚帶細佬去樓下診所覆診, 大排長龍, 攪到九點幾先睇完.

所以今日仍然好攰, 冇乜 mood 寫嘢.

要寫啲令我開心啲既事, 就講吓兩個囝囝既趣事.

最近發覺大仔肥咗, pat pat 多咗肉, 打落彈手. 

除咗大隻咗, 成個人都好似'成熟'咗, 開始識得照顧細佬.

會帮細佬著鞋, 著袜, 著褲.

鍋貼

噚晚好遲至瞓得着, 攪到今日好攰, 好眼瞓.   

上星期响facebook見到朋友整餃子, 所以下定決心週末整.

以前只識用現成水餃皮來包餃子, 但自從在英國時學識自製餃子皮後, 再也沒法接受用現成餃子皮了.

在英國時的第一年隔隣住了一位台灣女孩, 是一位千金小姐, 不過我跟她還挺投緣, 結果我倆幾孚毎天都一起吃晚餐, 誰早回誰就先煮.  既然是千金小姐, 廚藝當然不怎麼樣, 可是她認識一位從台灣去定居的老婆婆, 非常會煮.  朋友毎次去拜訪她都會打包好多美味的食物回來與我分亨.  記得老婆婆做的花卷, 餃子是特別好吃. 之後我就很想學做, 自己去找書和上網找食譜, 再自己亂亂試, 最後我那台灣朋友都讚我的餃子做得不錯哩. 

我比較喜愛水餃, 但Daddy 和大仔都愛食香口既鍋貼, 為了方便, 我毎次都用燙麵團, 包好後的餃子, 要燙要煎悉隨專便.

燙麵就是用熱水來搓的麵團, 煮出來口感較Q, 適合做鍋貼.  用冷水搓的叫冷水麵團, 用來做水餃的.  份量都是大概三杯粉對一杯水, 揉好後放一旁醒(即讓麵團鬆弛)二十分鐘.

我一邊擀皮, 姐姐一邊包. 今次用韭菜豬肉餡.

Strawberry panna cotta again (附食譜)

大少話要再食strawberry panna cotta, 於是噚日encore用剩餘既strawberry整多次.

上次整覺得實左d, 唔夠滑, 今次減低魚膠份量, 咁就啱啱好嘞.

今次分成六杯, 毎杯份量少d, 費事仔仔一次食太多, 睇怕都係佢一個人食晒咁多杯.

食譜:

炒河粉

今日決定親自下廚煮午餐, 已經好耐冇入廚整中餐.

週未午餐都係簡簡單單炒粉麵, 碟頭飯之類. 

大仔最鐘意食炒河, 因為有豉油炒嘛.

姐姐唔食牛, 所以唔可以整我至愛既炒牛河, 就換成炒豬河啦.

自家煮既當然少油, 個樣冇外面賣既咁靚, 但健康好多, 至少唔會有飲油既感覺.  今次舊豬肉好淺色, 炒完都見唔到.

M&S Kalamata olive twists

終於捱到星期五了, 個人狀態係明顯由星期一最高點, 直線下滑至今日最低點, 已經打咗N咁多次喊露. 

噚日開咗呢盒 Marks & Spencer 既 kalamata olive twists, 好好味, 極力推薦俾大家.

非常鬆脆, 好香牛油味, 食落啱啱好唔會咸.  用來配蕃茄湯, lobster bisque 之類就perfect.

呢盒係我波士送既, 毎年聖誕節佢一個朋友都會响Marks & Spencer 訂個禮盒送俾佢,裏面全部都係M&S既食物, 茶包, 咖啡.  佢通常只拎起幾樣自己鐘意既, 其他全數送到我枱上.  真係多謝晒波士....既朋友, 年年都有啲咁旬嘢嚟益我. 

講完食, 下面講吓啲細路, 俾我媽咪, 老豆可以睇吓啲孫仔既動向.

星期日返完教會後去SUNTEC行, 主要係帶大仔去剪頭髪.

依家啲細路幾咁嘆, 有專為小朋友設既飛髪舖, 一邊剪一邊睇電視.

呢張係細佬剪緊, 原來我冇影過大仔剪髪既相添, 以後要補番. 

飛髪舖外面有個攤位賣細路嘢, 做緊促銷.  有小朋友既新年衫賣, 仲有減價.

我一向都想買套新年衫俾兩兄弟, 於是一人揀一套.  大仔自己揀咗套紅色類似功夫裝既, 我就帮細佬揀咗呢set, 連帽架, 好可愛.

朝早細佬遲起身, 冇同我哋一齊去教會.  返到屋企就俾佢試吓, 睇吓駛唔駛換, 好彩啱啱好.

佢好鬼貪靚, 著咗後唔肯除, Daddy 乘機話呢樣最似我, 夠晒貪靚, 哼.

貪靚有乜所謂啫, 最緊要似我咁可愛嘛, 哈哈哈哈..... 

Strawberry panna cotta

大仔今日開學, 最開心既肯定係印尼姐姐, 因為日間有幾個鐘可以湊少個.

為咗鼓勵吓大仔今日開學, 噚日放工就整定甜品俾佢今日放學後做下午茶.

星期日見士多啤梨減價, 買咗兩盒, 己經好熟吓, 再唔食就會壞, 所以整 strawberry panna cotta (士多啤梨意大利牛奶布甸).

仔仔見我整都唔知幾興奮, 未整好就嘈話要食. 

臨瞓前拎出嚟影張靚相先, 不過仲未凝固得晒, 夾硬放粒士多啤梨上去, 所以粒士多啤梨有少少傾斜既感覺.  趕住瞓覺, 杯邊都懶得抺乾淨就影嘞.

記得第一次食panna cotta 係business lunch 時食, 我波士話係用cottage cheese整, 好健康, 一啲都唔肥. 

哈, 原來佢亂噏既!

上網查一查, 原來用忌廉和牛奶整既, 唔肥至怪.

正因如此, 縱然係好好食, 我整親都食好少, 怕肥嘛.  不過我鐘意整俾啲細路食, 有牛奶嘛, 好食又有營養, 而且細路仔唔怕食肥.

初戰macaron

2010 返工第三日, 對眼仍未適應公司的冷氣, 好乾好乾.

毎半個鐘就滴一次眼藥水來補濕, 打一陣電腦就抬頭望遠方, 如果可以放假係屋企休息就好了.

眼睛勞累完一日, 返到屋企只想瞓覺, 冇精神整嘢食, 只好繼續post 舊作.

話說早個月前成日係網上見人整 macaron, 個樣好靚, 就走去買杏仁粉和食用顏料, 學人整埋一份.

網上啲食譜個個都大同小異, 但做法就各家各法.  好吧, 自己慢慢實驗.

第一次試整朱古力味, 攪太多, 蛋白糊瀉開晒, 變成扁扁的杏仁餅, 上面開口, 下面冇裙著.  食落其實幾好味, 仔仔不停咁猛食.  但太醜了, 沒影相.

第二日, 以我唔服輸既性格, 上網做research, 原來朱古力味係最難整既.  睇勻晒資料, 又再開工, 今次試粉紅色. 

驚再瀉, 所以蛋白打至企身.  我冇時間等表層全乾, 只係唧完才開爐, 係咁咦俾佢哋十分鐘度時間吹吓風.

結果....有少少裙邊, 開心C我嘞! 

迷你煙肉批 (Mini bacon quiche)

New Year Day 整蘑菇煙肉批時, 剩下少少批皮, 放入撻模和大批一齊焗.

撻殼放雪柜, 第二日用剩下的忌廉蛋汁和煙肉, 做了四個迷你批. 

其實雪柜重有兩粒蘑菇, 但撻殼太細, 己經放不下.

我媽咪話做完手術唔好食蛋, 所以我冇食, 全部俾晒daddy做下午茶.  Daddy 今次好乖, 全部掃晒.

我係好鐘意食quiche, 一來好食, 二來毎次都令我諗起响英國時既生活.

我哋响亞洲地方比較少有quiche 賣, 但在英國學校既canteen, 毎餐都會有既. 

點解? 因為佢哋會將啲隔夜餸譬如 poached salmon, ham, 之類, 放入批裏面加忌廉蛋汁, 就可以再賣.  所以在校園裏 quiche 並不是甚麼特別佳餚.

但係我毎次去canteen 都會揀件quiche, 就係鐘意食囉, 唔知點解. 

可能少食多滋味掛.  因為我通常都自己帶三文治做午餐, 好少去canteen食.

紫心蕃薯包

連續放咗十日假, 今日要返工lu.

我噚晚同大仔講今日媽咪要返工喇, 叫佢喺屋企要乖啲.  佢今年上幼稚園高班, 1月7日先開課. 

佢問: 點解你上星期唔駛返工?

我答: 因為上星期媽咪請假, 我毎年都有某些日數既年假可以請.

佢都唔明, 再問: 咁點解daddy日日都返工, 冇得請假.

哈哈, 佢daddy係有假, 不過可能請咗都要返之嘛.

呢排做完lasik賦閒在家, 因為想對眼休息多啲, 都冇乜點整嘢食, 暫時post住舊作先.

五月時做既十七小時紫心蕃薯包, 跟獨角仙"天然麵包香" 一書.

我怕蕃薯餡唔夠甜, 我屋企所有人除我外都鐘意食勁甜, 所以加入少少牛奶同蜜糖入蕃薯蓉中.

我自己覺得呢個包好好食, 不過屋企人都麻麻. 佢哋好奇怪, 寧願食外面加防腐劑和其他化學品既嘢, 都唔食自家全天然出品.  上次返香港我重特地整呢個包給我爹哋媽咪試添 

始終整咗屋企人唔捧場, 自己都冇乜心機整, 所以己經好耐冇整過呢款包.

沒有眼鏡的日子

哈哈哈哈哈....
終於可以過沒有眼鏡的日子了. 
因為做了激光矯視.
重歷歷既眼鏡和好怕戴既con, 全部可以丟入垃圾桶 lu. 

一月三十日做手術, 第二日去驗已經6/6, 即perfect eyesight.  原本成900度近視加散光, 一夜間變perfect, 媽咪都話依家真係醫學昌明.

第一次量體重唔駛戴眼鏡都睇到幾重.

第一次沖涼睇得清楚.

第一次夜晚起身睇到時間.

戴左廿幾年眼鏡, 都有d唔習慣. 

有時都會去揾眼鏡. 

瞓覺之前會諗起要放副眼鏡係床邊.

最牙煙係瞓覺前入厠所會有衝動想除con.

依家定時要滴眼藥水, 出街要戴黑超 , 都係暫時既不便.

最緊要係以後著靚裙都唔駛專登戴番副con.

好喇, 對眼要休息了, 由現在開始要善待我對新眼.