團年飯(一）

每年都會食兩次團年飯，新年前的週末就和Daddy家人食，因為姑奶們年三十要返夫家團年。年三十呢，如果返香港就當然同香港家人食啦，如果喺新加坡就同奶奶團年。

上星期六第一餐團年飯在Sunset Way的鎮發活海鮮食，選了午餐時間食，因為奶奶晚上會太攰。

呢間餐廳裝潢都好靚架，牆上掛住部電視不停咁播住個老闆女同啲本地明星的合照，令我開頭對啲食物都有少少期望。

過年唔少得的撈魚生，侍應每加一樣配料就會講一句吉利說話，譬如淋甜梅醬就講甜甜蜜蜜，落薄脆時就講黃金滿地。但個侍應是菲律人，我哋就好好奇佢會點講，結果佢講完恭喜發財後就轉講英文，好搞笑。

撈呀撈，呢樣嘢我絕對唔會喺屋企撈，攪到周圍係抹都抹都儍。

成餐最好味就係呢碟，瑤柱味夠濃，豆腐都好味，但菜就硬啲。

金銀蛋莧菜，侍應分埋一碗碗上，普普通通啦。

特式排骨，隻碟夠晒大，望落都幾吸引，但食落好似食緊罐頭紅燒排骨，啲汁好淡，連鐘意撈汁的囝囝都唔要呢個汁，啲排骨食落成口油，好勉強先食完一舊。

蝦仁煎蛋和三杯雞，食得咁囉。

唔知咩蟹(二姑奶點菜的），我諗係黃金蟹啩，個汁有少少辣好似麥片蝦嘅味，怪怪咁但姑奶們話好食喎，佢哋啲味蕾構造同我嘅有啲分別。拎一舊蟹鉗嚟食，咬落去，居然有少少脆，啲肉乾爭爭一啲鮮味都冇，好明顯炸過籠啦。

好彩呢餐唔係我哋找數啫，味道差服務又唔殷勤，要叫先識嚟斟茶。唔係我哋找數所以我唔知幾錢，但可以肯定我絕對唔會再幫襯。