年初一

年初一兩個囝囝都自己揀了紅色新年衫，同bear bear一齊影相。

今年雖然唔可以去拜年，但都要去奶奶屋企坐吓。囝囝們和嫲嫲，契嫲嫲，契爺爺合照。

想同肥猫一齊影全家福，但肥猫唔肯望鏡頭。

响奶奶度食完午餐就去老人院探老爺，老爺患有老人痴呆症，身體機能都好退化，連家人都唔認得，見到都好心酸，所以就無謂影相了。

每年年初一爸爸都會煮南乳炆齋和臘味飯，呢個傳統我一定會跟足的。

材料有豆卜，枝竹，黃芽白，雲耳，芹菜，粉絲，冬菇和不知名菇菇。已經盡力煮，但都煮不出爸爸煮的味道，邊煮邊傷心，因為以後都再嚐不到爸爸的手勢了，嗚嗚嗚。。。

後悔上次返香港冇買臘鴨脾番嚟，香港幾蚊隻，呢邊都係幾蚊但係喺坡紙，貴到離奇，所以我拒絕買，只買了臘腸，潤腸和臘肉。呢邊啲臘味真係差啲，煮出嚟都冇鹹香味。我媽媽會放埋慈菇落去一齊煮, 話食咗慈菇會生慈菇椗.  雖然我都見呢邊街市有得賣, 不過我冇買, 因為一來我唔鐘意食, 二來我兩個夠晒數, 慈菇椗留俾其他有心人士去努力吧. 

不過最尾我都食咗慈菇, 因為我契奶奶(即Daddy契媽)好好心咁送咗罐炸慈菇片俾我, 一片片好似薯片咁既. 佢話上年我去佢度拜年食咗話好食, 今年佢就買嚟送俾我. 查實我都完全唔記得有食過, 但老人家一番心意點都要笑納.  拎番屋企開嚟食幾片俾吓面, 剩下的屋企自然有人包底, 我對炸薯片之類既嘢都冇興趣的.