醉雞 (食譜)

最近看大少奶的書和一本雜誌, 發現有樣叫糟滷的汁料, 可以用來整醉雞.

心想呢啲嘢呢邊應該冇得賣, 而且我一向整醉雞都是自己調汁料的, 於是就冇放喺心上.

前個星期六去Sheng Siong買牛腩時, 居然見到一樽樽寫住大大個"糟滷"的物體, 仲要係雜誌上介紹的上海寶鼎牌喎, 一樽只賣兩個幾, 就買樽嚟玩吓.

未用過糟滷, 唔知咩味, 招紙上面寫材料: 黃酒, 魚露, 鹽, 香料....

大少奶和雜誌上的食譜都係寫只用糟滷嚟浸就得, 唔駛加酒, 喺咪真架? 支糟滷先兩個幾, 一支花彫酒呢邊賣成十幾蚊噃, 係就可以慳番好多.


即開嚟試吓味先, 咸味就有, 酒味就唔覺喎.  自己未試過又點可以用來整housewarming既醉雞呢?  於是即晚煮雞翼, 照大少奶做法只放糟滷來浸, 不過我嫌酒味唔夠, 加咗少少花彫酒.  第二晚食夠晒入味, 再浸耐啲我諗會太咸.  所以housewarming嗰三隻雞我係用一份雞湯(浸雞水)加一份糟滷再加上三飯碗花彫酒來浸, 味道啱啱好. 

我覺得糟滷對我冇乜帮助, 因為都係要自己加酒, 下次我都唔會再買.

其實唔駛糟滷都好易整啫, 下面係我既做法:

1. 鍋內加水至浸過至少雞的一半(可先放雞才加水, 然後將雞取出), 放一茶匙左右花椒, 幾片薑和一些葱段, 水滾後放入雞, 待水再滾時較細火煮十分鐘, 熄火加蓋浸50分鐘.  如雞仍未熟, 再開火煮至水滾, 熄火, 再浸一陣.  雞取出, 浸在一盆冰水使皮收縮.

2. 浸雞水撇去面上浮油和污濁物, 放涼.  加入魚露和鹽調味 (要偏咸雞才有味), 最後加入花彫酒, 加入己斬成大件的雞, 入雪柜雪至少一日至入味.

醉雞食完後剩下的浸雞汁我喜歡加水用來煮湯麵, 好好味架.