久違的福建炒飯

今日姐姐放假，所以我好忙好忙呀。

本來姐姐放假，我就唔應該响廚房整咁多嘢， 但一入廚房就手痕，整完一樣又一樣。

先炒了個綠豆饀，用來整冰糉。 原來炒綠豆饀要好有耐性，慢火慢慢炒，炒到手軟。

跟住見到包洛神花乾，買咗好耐都未用，就煲煲洛神花蘋果水，想用來整啫喱，不過最後攰得濟，入樽放雪櫃當凍飲算了。

跟住到整福建炒飯做晚餐，對上次整福建炒飯已經成年幾之前。 炒完綠豆饀到炒蛋飯，手臂好攰。

今日買唔到芥蘭頭，就換上翠肉瓜。材料還有冬菇，瑤柱，帶子，蝦和雞肉。最後只用魚露調味都已經超鮮味了。

近鏡睇啲料，好豐富架。

另外還炒了一小碟菜心。Daddy和囝囝們都好鐘意呢個飯哩。

朝早其實答應了大佬夜晚整鍋貼，但從教會練完詩返嚟已經夠攰，唔想攪咁多嘢，所以冇整。為免佢唔開心，就煎了兩細塊的terriyaki chicken chop俾佢。不過大佬食晚餐時冇食啲雞扒，話要留番整burger喎。咁好啦，留聽日食啦。

點知啱啱食飽飯，佢就話要食個buger, 唔通真係游完水特別好胃口。佢仲指明要夾埋生菜，跟住又話個包包上面要有芝麻喎。好彩我噚日焗咗啲小餐包，雖然上面冇芝麻，不過佢都收貨，仲食得好開心添。

細佬見到又唔執輸，又話要。我幾大都唔整俾佢，如果佢食唔晒我咪要包底，咪攪。最尾佢摷雪櫃拎咗杯yogurt嚟食，兩兄弟今日都咁大食。

滿足完佢兩個個胃後，就輪到做最後一樣嘢 ﹣ 冰糉。又係邊煮粉漿邊攪，咁樣攪法，我隻右手唔駛去做gym都會有隻結實老鼠仔。冰糉蒸好冇耐，仲未知咩樣咩味，遲啲先話你哋知。

係時候瞓嘞，聽朝又要返工啦，大家晚安。

福建炒飯做法，請按此。