簡單的聖誕晚餐

今年年尾特別忙, 卻是充滿感恩的.

教會詩班今年除了12月17日在教會門口辦了個戶外聖誕音樂會, 還有12月22日在烏節路報佳音, 再要在12月23日在教會的聖誕晚會獻詩, 所以自從由台灣旅行回來後就是一直練詩, 返工外還有做不完的家務(因未請到新姐姐).  每日都覺得攰到成身痛, 每晚躺在床上就大昏迷了, 但感恩有足夠精神體力去挨過.

12月17 日和12月22日的音樂會和報佳音都是傍晚時份在室外舉行的, 而正好每次開始前都落雨, 還要好大雨, 奇妙的是每次都在要開始時雨就停了, 讓我們可以如期獻唱, 真的體會到主的信實.

囝囝們1月2日開學, 要趕在之前找到新姐姐.  前星期找到了, 安排好22日飛來, 突然說出不了境. 後來新姐姐再買機票再試闖關, 第二次終於成功出境飛來了.  昨日27號來我家上班了, 大家都鬆一口氣.  原來第一次不能出境是因為枱底俾得太少錢, 第二次塞夠錢才放行.  其實姐姐們好可憐, 出外打工賺錢, 出境還被榨壓.

忙到聖誕過後, 終於Boxing Day煮了今年的聖誕晚餐.  日間還要出門買書買校服等, 沒多少時間煮, 又沒姐姐幫手, 一切從簡.

有用了button mushroom, shitake mushroom 和portobello mushroom 煮的mushroom soup. 前菜是prawn, avocado and mango salad, 配上honey lime dressing, 超級開胃.

另一個前菜是芝士煙肉釀細portobello mushrooms.  主菜是鬼嫁的無焗爐版燒牛肉, 配菜是Jamie Oliver 的roast potatoes, 還有求其的烚西蘭花. 

今次買了1kg的西冷來做燒牛肉, 照鬼嫁的做法, 每次都成功的, medium rare, 朋友大讚. 

香港台灣之旅 - Day 1

去了香港和台灣兩個星期, 星期六才回到新加坡.

風流快活了兩個星期, 回來後就忙到無命. 

姐姐在我們飛前一個星期回印尼照顧她的先生(要做手術), 我們回到香港後就收到她的電話, 她的先生需要幾個月時間康復, 所以她不能回來了.  唉, 又要揾工人了. 這個姐姐做得很不錯的呢!

所以回來後, 兩個仔仔就要去我奶奶家住, 因為我和Daddy日頭返工時沒人在家照顧他們.  沒有姐姐的日子, 要返工又要做家務, 還要忙着練聖誕報佳音的歌, 每日都攰到像魂遊似的. 這個十二月一點都不好過呀!

呻完一輪, 開始今次的遊記.

25.11.2017

本來我們要去香港和台灣, 最直接的就是坐國泰, 可以在香港轉機停留. 但自從幾年前坐過一次國泰後, 實在太差了, 我們都極不願意再坐國泰.  最後Daddy用他的飛行哩數再加少少錢換了星航的新加坡香港來回機票, 然後再訂長榮的香港台北機票, 總花費還比直接訂國泰便宜一點.

今年新加坡樟宜機場有可愛的Sanrio 裝飾.

首爾親子自由行-Day7 完結篇

囝囝們今年學年完結了, 開始放假, 一月才開學.

我以為囝囝們放假, 我會好得閒.  之前還在淘寶買了一些數字油畫. 

結果, 他們放假我更忙. 公司好多嘢做, 這幾個星期在很努力地清理手頭上的工作, 因為明天就要返香港和去台灣玩, 會出走兩星期. 這一刻似乎已經完成了要清的工作, 可以透一透氣, 偷懶來寫最後一篇首爾遊記.

還有, 姐姐有事要回鄉一個月或以上, 這個星期我變了阿四, 囝囝們就要搬去和奶奶住, 因為日頭沒人在家看着他們.  每日放工後要先去陪他們, 然後回家做家務. 

14.06.2017

來到首爾的最後一日, 我們坐下午四點幾的班機回新. 房東很nice地讓我們遲點check out, 就不用煩惱行李放那裏了. (本來打算一早清房, 將行李寄存在Seoul Station, 反正我們會坐AREX去機場, 都好方便, 只是要一早清房會較趕)

先去首爾站內的Paris Baguette食早餐, 咖啡杯湊成一對, 好可愛.

首爾親子自由行-Day6

囝囝們考完試, 快要放假了, 我終於可以鬆口氣.

不過, 每年最討厭的年終工作評估要開始, 希望今年不會有麻煩case.

13.06.2017

這天我們很早就要起床, 因為要去踩江村鐡路單車. 起點是位於京春線金裕貞站(Gimyujeong)的Rail Park, 由首爾站坐地鐡要坐兩個小時, 轉兩次車才到.  我訂了十一點的鐡路單車(從Funtastic Korea 訂的) , 但要早半個小時去到, 所以八點左右就要起程.

開始時坐一號線地鐡都幾逼, 因為繁忙時間. 由回基站轉車之後就有位坐了.  坐足兩個鐘頭, 細佬都瞓着覺.

漫長兩個小時後, 終於到金裕貞站.  金裕貞是韓國的一個作家, 這站就是以他的名字來命名的.  這站好古色古鄉.

首爾親子自由行-Day5

停得越耐, 越提不起勁繼續寫.  翻看照片時, 發覺記憶已經開始有點模糊, 所以這篇不會寫太多細節.


12.06.2017

今趟去韓國每日都勁好天, 即係好熱呀.  這日我們去了愛寶樂園, 全日都好熱好曬, 不過囝囝們依然玩得好開心.

愛寶樂園離首爾有一段距離, 坐車去都幾遠.  可以坐普通巴士, 地鐡, 特定旅遊巴士, 想更舒服方便又不介意俾錢的當然可以包車或的士.  交通詳情可以去愛寶樂園網站查看.

坐普通巴士要先坐地鐡又未必有位坐, 所以帶住小朋友都不考慮了.  地鐡要轉三次車, 車程好長, 算了. 剩下shuttle bus, 上網找資料時, 發現有好多shuttle bus package, 包來回巴士和入場卷, 價錢比官網上的入場卷價錢便宜一截.  而且上落車地方亦好方便, 在首爾站, 明洞等都有pick up point.  我們住首爾站附近, 當然就選在首爾站上車.  我從Funtastic Korea買的.

朝早9.20上車, 不用太早起床.  車程大概50分鐘左右, 不過落車地方只是一個停車場, 還要再坐免費的Everland Shuttle Bus先去到入口處.  要記住落車時是那一個停車場, 因為那裏有幾個停車場的, 回程時要坐對的shuttle bus回到同一個停車場坐回程巴士.

坐shuttle bus算快又方便, 不過回程時間是6.30pm.  因為要先坐接駁巴士去停車場才能到回程車士站, 建議還是預留半個小時以上, 所以最遲6pm就要去到出口.

最尾十點半左右去到愛寶樂園, 雖然是星期一, 都仍然好多人, 亦有好多本地學生, 是學校假期嗎?

十點半到, 六點就要走, 在園內時間並不多, 所以我們買了Express pass, 可以不用排隊優先玩最受歡迎幾樣的 (Amazon Express, T-express, Safari World, Lost Valley, Panda World).  我們在香港和新加坡都睇過熊猫, 所以沒買Panda World 的express pass.

首爾親子自由行-Day4

突然驚覺已經十月了, 還在寫六月的遊記...

11.06.2017

這天星期日, 哥哥要去洗傷口.  當日急症室的醫護說可以去其他診所, 不用特地回去慶熙大學醫院.  我們住的Airbnb旁邊就有間兒童醫院(소화아동 병원, Sowha Children Hospital), 規模看來不小, 整棟大厦的.  我們以為洗傷口這種簡單功夫, 應該沒問題吧.  一早起身我就帶哥哥去這間醫院, 以為快快洗完傷口就可以去玩.  去登記處問, 一輪雞同鴨講後, 叫我入去病房問護士, 再多一輪雞同鴨講後, 護士說他們沒有外科, 所以不能洗傷口, 一定要去大醫院才可以.

最後還是要坐車回去慶熙大學醫院的急症室.  其實只是用消毒藥水抹傷口, 換片紗布而已, 但也花了大概S$100, 還好保險有賠.  就這樣簡單的洗傷口就花了一整個上午, 離開醫院大家都肚餓了, 求其在附近一間越南牛河餐廳食牛河. 這餐廳是快餐店式的, 味道OK, 沒有Thai basil和芫茜, 只有蔥, 但價錢好平, 四碗牛河才15,600won. 

首爾親子自由行-Day3

今年公司有些變動, 所以每日都好忙.  公私兩忙下, 看來這blog要生草了.  不過, 首爾遊記還是盡力寫完的, 留個紀念.

10.06.2017

這日的行程重點只有一個, 就是昌德宫的後花園-秘苑.  秘苑被UNESCO列為文化遺產, 遊客不能自己入內參觀, 一定要在指定時間跟導賞團入內.  導賞團有英文, 中文和韓文的, 每日有十四團, 每團100人, 其中50個位可以在一個星期前在網上預訂, 另外50個就留在當日在現場買飛.  遇着旅遊旺季, online booking 好快就滿, 現場的也是一票難求.

上年十一月和妹妹去首爾時訂不到秘苑的導賞團, 好遺憾, 今次決心一定要入去.

行程上安排了星期六去昌德宫和秘苑, 網上預訂只容許七日前(即之前一個星期日)預訂.  星期日要去教會, 下晝還要出發去馬來西亞的教會生活營, 好緊張地在崇拜和去馬來西亞之間的短暫時間用手機上網book.  不知道是不是因為星期日的關係, 星期六的booking 仍未開放, 唯有先book 星期五.

星期一在馬來西亞時再試試用手機上網, 居然星期日朝的導賞團仍然有位, 即刻改了booking, 好開心可以照原訂計劃.

我們預約了十一點半英文的那團. 一早起身就好雀躍, 食完早餐就衝去昌德宫.  半個鐘前已經去到秘苑閘口等候.  導遊在入口處做點簡單介紹就開始起行, 一團人浩浩蕩蕩入秘宛遊覽.  穿着韓服的女導遊英文很標準, 講解好清楚.

第一站叫是芙蓉池, 好靚, 是那種純樸自然美, 沒有精雕玉砌的.

首爾親子自由行-Day2下

09.06.2017

食完午餐, 我們就去慶熙大學參觀. 上年十一月和妹妹去慶熙大學, 剛好遇着紅葉季節, 影相勁靚. 所以今次也帶三父子去欣賞這充滿歐陸色彩的校園.

哥哥午餐食到不滿足, 天氣又熱, 所以沒心情影相.  細佬就仍然好開心地擺甫士影相.  這張是在圖書館門外影的, 也是今次在慶熙大學影的唯一一張相.

發牢騷

今日容許我發一陣牢騷, 因為好火滾, 連續四件事令我陷入爆粗邊緣.

一.
噚晚哥哥發高燒, 喉嚨發炎.
但今日有校際choir比賽, 哥哥不想錯過.
於是我話如果今朝起身無燒, 我就開車送佢去學校, 咁佢可以遲些少起身.
今朝無燒, 6.30叫佢起身.
6.45 居然仍在換校服, "媽咪, 你幫我執choir套制服同鞋襪啦."
好, 見你病, 我忍, 幫你執.
跟住大少爺就好悠閒地邊食早餐邊睇手機.
幾乎七點時, "食咗藥未呀?" "噢"
食完藥, 原來仍未執好書包.
最後7.10出門, 每條路都塞車!
早會時間是7.30!!!
當然阿媽我一上車就不停地哦, 你以為我識開飛機定火箭呀!
7.26到小學部後門(中學部前面勁塞), 唔該自己行過去, 我已盡人事了.

二.
今朝八點半有個deadline, 一定要寄出份文件.
噚日叫同事跟, 做完寄俾我過目下才寄出.
成晚無聲氣, whatsapp加sms才覆話噚晚會做好.
最後係淩晨先寄俾我. 今朝我9.30要去外面開會.
唯有送完囝囝返學後開車返公司, 改完份嘢再寄出, 然後才去開會.

三.
今朝趕時間, 所以一早8.10到公司就去canteen買早餐和咖啡 (平時我自己帶早餐的).
我: "Auntie, 唔該打包炒麵和一杯咖啡"
Auntie: "我仲有好多嘢要拎出嚟先呀...我哋八點半先開始架....(下刪無數字)"
阿姐, 我真係好趕時間呀, 可唔可以求其俾包炒麵我呀, 咖啡無就算啦.
(之前個canteen operator好早就開工, 七點幾到都有早餐有咖啡賣)

四.
邊食早餐, 邊改文件.
跟住又開車去開會.
有另外三個同事, 佢哋由屋企直接去.
(我公司喺好山旮旯的地方, 無人朝早喺外面開會會先返公司再去囉)
呢三位哥哥好勁爆, 開會前連要見的那間公司資料都無揾過, 全程廢噏, 激死!
我唯有盡量幫佢哋兜, 但其實我好想揾窿捐.
開完會10.30.

首爾親子自由行-Day2上

9.06.2017

第二日原來的行程: 首爾路7017 - 南大門 - 梨花洞壁畫村 - 慶熙大學 - 高速巴士轉換站地下商場(GOTO Mall)

後來出途出了意外, 打斷了行程, 下篇再詳述.

首爾路7017今年五月才開放的. 首爾路7017本來是棄置了的行車天穚, 首爾市政府由2015年起開始將這些行車天橋活化, 改建成連接17條路線的首爾路7017步行道 (70: 行車天橋是70年代起的; 17: 17 條路線).  遊客可利用這步行路來往首爾站, 南大門, 明洞和首爾塔等景點.

我們住的Airbnb剛好就在入口對面, 過條馬路就到了.

夜晚會沿路會有燈, 好靚.

首爾親子自由行-Day1

六月頭兩個星期我一家去了馬來西亞和首爾, 所以好耐無寫blog.

馬來西亞的是四日三夜的教會生活營, 兩年一次, 只是聽講座和教會活動, 馬來西亞的渡假酒店只是普普通通, 不值一提, 所以馬來西亞行就不寫遊記了.

上年十一月和妹妹去首爾玩, 哥哥見到相後也嚷着要去. 於是趁六月學校假期一家人去旅行.

每個family trip 我都是last minute 才來計劃的, 六月八號飛, 正正五月八號晚才在Daddy的催促下訂機票和住宿, 好彩在限韓令下住宿仍有大把選擇. 因為和囝囝們去住apartment 會較便宜和方便, 所以今次我們從Airbnb 訂了一個有閣樓的apartment, 地點就在首爾站對面, 極方便.

八號早上八點半坐星航機, 下晝三點幾就到仁川機場.  因為住宿就在首爾站, 可以坐機場快線(AREX), 43分鐘車程再過條馬路就到apartment 了.  坐AREX又舒服又快, 比機場巴士快好多, 還便宜一大截.

記得五年前坐星航去首爾, 在飛機上有兩餐食, 所以到埗時不會餓.  但今次只食了一餐早午餐, 落機都開始覺餓.  放低行李就快快出發去食晚餐. 我讓哥哥二選一: 豬腳或生蠔菜包肉.  哥哥選了生蠔菜包肉, 因為他想食三層肉.

今次同樣去了將軍生蠔菜包肉(장군굴보쌈), 坐地鐡去鐘路三街十五號出口, 行入藥房旁的小巷, 再轉右, 就是一整條的生蠔菜包肉一條街.  其實成條街上所有食店都一樣賣生蠔菜包肉(굴보쌈), 如果不是和囝囝們去, 我會試將軍以外的食店.  不過和囝囝們去不宜冒險, 還是去食過覺得好味的.  地點和餐牌上次有詳細介紹過, 有興趣請參考舊post.

哥哥見到有豬腳又想食, 於是叫了半份豬腳半份三層肉. 好大碟肉, 中間有泡菜和醃蘿蔔, 生蠔另外放在右邊的小碟上.  中間那碟是辣炒魷魚, 今次的炒魷魚較失色, 因為不是現炒, 已經凍了, 沒上次的香, 雖然仍然好味.

蒜蓉蒸竹蚌

兩個星期沒寫blog, 快要被列為網上失踪人口了.

最近有點懶, 有點忙, 也因為生病了. 哥哥上星期六發高燒和咳, 結果我亦被傳染. 不過我只是微燒, 但就咳到甩肺. 睇了兩次醫生, 換了強效點的藥, 已經好點, 但副作用就是手震和身痕. 現在邊打字邊手震, 好似個老太婆一樣.

以前細個我的福州籍舅母常常會買蟶子來蒸, 把蟶子排在深碗內, 倒入紹興酒, 蒸幾分鐘即可, 清甜又有酒香. 可惜, 在新加坡很難買到新鮮蟶子, 所以很久沒嚐過了.

超市有急凍的蟶子賣, 大大隻的, 叫竹蚌. 剛好最近有特價, 買來試試. 逐隻剪開洗乾淨, 以確保沒沙. 加金蒜來蒸三分鐘, 撒點蔥花即可.  味道還算滿意, 當然不能和新鮮的相比, 但有得食已經好開心.

芫荽皮蛋魚片湯

星期三是這邊的佛誕, 叫做Vesak Day, 放假一日.

前一日Daddy己經講好要去東海岸公園踩單車.  不過, 朝早起身天陰陰, 似乎要落雨.

但Daddy都決定照原計劃出發.  我們有兩架單車, 一架Daddy 的, 一架哥哥的.  細佬就帶他的scooter.  那我呢?  我就只有行行企企呆等他們囉. 一到東海岸, 已經落微微雨, 兩父子都照去踩單車, 丟低我和細佬. 無耐就已經行雷閃電, 於是我和細佬就入cafe坐低飲嘢來等兩父子.

踩完單車後就去附近商場食午餐, 跟住就返屋企了. 可能淋了少少雨, 呢兩日都好似有啲作病咁.

返到屋企開雪櫃, 見到有包芫荽, 買了幾日, 再唔食就要丟. 煮咩好呢? 諗起芫荽皮蛋魚片湯, 即刻去超市買多兩包芫荽和一包鮫魚肉(呢邊無鯇魚).  晚餐就滾了N年無飲過的芫荽皮蛋魚片湯了, 只用鹽調味已經好好味, 因為重點是芫荽味.

這湯應該是下火的, 因為細個每逢牙肉痛, 媽咪都會煮呢個湯, 還會加茶瓜(當然呢邊又係無啦).
囝囝們最討厭芫荽味, 一聽到芫荽湯即時面露厭惡.  但一聽到我話下火和對牙肉痛有用, 哥哥就好乖地飲了一碗, 因為他覺得自己熱氣, 牙肉有些少唔舒服.  算佢醒目啦.

偷步版越南牛河

星期六午餐通常都是簡單的湯麵, 炒粉, 炒飯之類.

去超市見到有金不換, 當時沒想到要煮什麽, 買了先算. 同日又在街市買了新鮮牛肉.

回到家, 想來想去, 煮越南牛河吧.  說時遲, 那時快(最近陪囝囝温習時學到的一句), 牛肉就煮好了, 只用了十幾分鐘就攪掂.  沒買牛丸, 用了雪櫃裏的魚蛋.

這碗是細佬的, 怕他不吃生芽菜, 所以先稍灼過.  這張相是細佬影的, 他自己決定筷子要放碗上面.

脆皮焗雞脾

上年開始見到Cold Storage 有賣緬甸蔬菜, 說是幫助窮困山區的. 每包S$1.99, 但只見過三樣選擇: 山葵, 青瓜仔和紅蘿蔔仔.

紅蘿蔔仔好少見有賣, 即刻買包試試. 為了那包紅蘿蔔仔, 我決定整焗雞.  冰箱裏有四隻雞脾, 簡單用鹽, 黑椒和香草來醃, 放在薯菜面焗. 焗了大概四十分鐘, 雞脾皮脆肉嫩, 兩位少爺極滿意.

好可惜, 我太懶, 沒有將薯仔和紅蘿蔔先烚才入爐, 兩樣都半生熟.  其實我以前都試過, 但諗住紅蘿蔔仔細細條, 薯仔又切細塊點, 應該OK吧, 反正很多外國食譜都是這樣直接入爐嘛.  但人家入爐焗個幾鐘, 我就只焗了四十分鐘, 所以就這樣囉.  南瓜和洋蔥就焗熟了, 好味.  剩下的半熟紅蘿蔔和薯仔第二晚用來煮蕃茄薯仔紅蘿蔔湯.

未入爐前的樣子, 只用鹽, 黑椒, 香草和橄欖油撈勻.

那緬甸紅蘿蔔仔味道又如何呢? 普普通通, 不夠甜, 有點乾.

新加坡LC開倉2017

長週末唯一的節目就去年度LC開倉了.

開倉為期三日, 星期五至星期日.  這裏的LC開倉沒香港的那麽瘋狂, 以往幾年我去都從來未排過隊, 不過星期五在FB見到有人PO相條隊好長, 於是我都不敢怠慢, 十點半開門, 我十點就去.

去到真的已經有人排隊, 好彩我仍然是第一批入內的.  其實我唯一想要的是花花煲, 不過據經驗, 這裏開倉從未出現過花花煲, 所以我根本是沒目標, 純粹陪朋友去買, 如果見到啱心水的就買, 沒有也無所謂.

朋友想買黑咪, 很多人都在找黑咪, 但都只有白裡媽咪, 售貨員也說賣完了.  但朋友仍不放棄, 找遍全場, 居然找到一個22cm粉藍色的黑咪, 真好彩!

以往開倉都沒有粉色系, 今年就好多.  Chiffon pink buffet casserole超令我心動, 但我已經有一個cobalt的了. 最後, 我好叻, 好忍得手, 只買了一個20cm的chiffon pink skillet, S$118.

昨日為這平底鍋開光, 煮了滑滑炒蛋, 完全唔痴底.

今年的開倉每日都有個特別item, 四拆發售, 但限量的, 先到先得, 前一晚才會在FB給提示.  星期六是22cm媽咪鍋 (白裡), 但只限紅和橙.

星期六晚FB見到星期日的特別item是花花煲!!!  星期日我要去教會, 偏偏星期日才出花花煲, 太過份了!  還要是四折, 只賣S$339!

到底要不要崇拜完立刻衝去買呢? 應該10.30以前可以趕到, 但花花煲多人搶, 恐怕那條隊會很誇張, 排到入去時可能都已經給搶光, 於是還是放棄了.

冬菇魚肚炆雞翼

由星期一開始期待的三日連假正式開始了, yeah!!!

其實三日假期大部份時間將會是陪讀, 因為細佬下星期考試.

不過, 明早會去LC 開倉, 雖然沒有明確目標, 亦未必會有收穫, 但諗起去開倉就興奮.

最近每次煮炆餸都好開心, 因為可以用我的新寵cool mint 黑咪.

今次煮冬菇魚肚炆雞翼, 平凡的冬菇炆雞翼, 加了魚肚來炆, 即時升呢了.

八隻雞全翼就煮了一大煲, 好味到個個食到lam lam 脷.

因為最近的巴西凍肉事件, 我才發現原來大部份的凍肉都是從巴西入口.  雖然呢邊政府和超市等都話入口的凍肉不受影響, 但始終為了心安, 最近都沒買凍肉, 寧願花多點錢買新鮮肉.  話說回來, 新鮮肉又真係較好味.

做法方面約略跟了Christine的食譜.

簡單但美味的晚餐

Daddy出國的日子, 星期日就只有我和囝囝們, 一早起身返教會, 回到家都好攰了, 晚餐時間就會煮些簡單點的.

超市見到減價的flank steak, 於是煮了一小碟的清酒牛扒.  這菜以前煮過, 食譜可參考舊post.

之前醃好, 每面煎兩分鐘, 很快就完成. 煎牛扒鑊一定要夠熱, 所以我會用de Buyer鑄鐡鑊.  這鑊我其實好多少, 姐姐絶對不會用的(易潔鑊當然她是首選), 仍然未夠黑.

一塊二百幾克的牛扒, 我怕囝囝們不夠吃, 另外加多一小碟的蒸魷魚. 之前見Mommy Dearest 煮過, 有樣學樣, 不過我買不到BB魷魚, 用普通魷魚都OK.  魷魚加薑絲和蒜蓉來蒸, 蒸熟後將大部份水倒掉, 撒上蔥粒, 灒熟油, 淋點豉油即成. 清清哋都好好味, 細佬連蒜蓉和蔥粒都掃得乾乾淨淨.

晚餐我都不想吃太多肉, 所以預備兩碟蔬菜, 烚小棠菜和簡單沙律.  有些家庭姐姐放假那日都會出街食, 但其實自己在家煮也可以很快很方便, 又可以食得健康.

DIY 食具便携袋 (cutlery roll)

幾個月前, FB見到朋友在一間賣布藝手作的FB店留言問BB食具便携袋的價錢, 不知道最後她有沒有買. 當時心諗其實自己車都非常易, 打算遲些車一個送她做禮物.

拖了好多個月, 由她仍大肚到現在BB都四個月, 我都仍未扚起心肝去整.  BB應該快要開始食固體食物, 所以星期六終於決定開工.

還特地買了套Hello Kitty 的BB餐具, 和粉紅波點的袋都好襯呢.  袋身我特別預長些少, BB大些時用大點的餐具都可以放.  上面車了條花邊的是可以掀開用來蓋着餐具, 就不怕跌出來了.

韓國大醬炆枝竹排骨

Daddy 出差後, 我日日要自己自掂兩隻馬騮, 好攰呀!

細佬還好, 哥哥就真的讓我很頭痛.

星期二朝早, 因為哥哥, 我牙未刷, 面未洗, 頭未梳就衝出門.

哥哥學校規定每星期二要打呔. 六點廿分我突然醒起是星期二, 即刻想提醒佢, 點知佢已經出門, 於是就叫姐姐將條呔拎去巴士站俾佢. 再打手機叫佢唔好上巴士住.  幾分鐘後, 佢就出現喺門口, 喊晒咁問姐姐喺邊.  懞查查的姐姐唔知係咪去錯第二個巴士站, 又無帶手機, 唯有叫佢落樓下, 等姐姐行返嚟.  我就嗱嗱臨入房拎銀包, 手機, 鎖匙, 叫細佬拎書包着鞋出門, 打算叫細佬自己在樓下等校車, 我就去巴士站揾姐姐, 再開車送哥哥返學(驚搭巴士會遲到). 好彩姐姐都醒目, 識得行返轉頭, 我落到樓下就見到佢, 即刻鬆一口氣.  開車送哥哥去學校, 回到家才梳洗換衫返工.

呢次係我平生第二次未刷牙, 未洗面, 未梳頭出門, 第一次都係因為哥哥, 佢歲幾時發好高燒, 半夜送入醫院.

Daddy改早咗機票, 星期日朝早就返到.  太開心啦.

見到EE用韓國大醬煮餸, 我又跟, 用來炆枝竹排骨, 好好味呢, 只用了大醬, 冰糖就好夠味.

新買的22cm 黑咪已經成為我的至愛, 太太太好用了, 大細剛好, 窩底弧度用來炒餸好就手, 煎嘢又唔痴底, cool mint顏色又靚, 教我如何不愛它呢?

做法: 先煎排骨, 然後原鑊(黑咪)加少少油爆香薑片和蔥頭, 加大醬, 灒油, 排骨回鑊, 兜勻, 加適量水和冰糖, 加蓋炆半個鐘, 再加浸軟枝竹繼續炆至排骨和枝竹都夠腍, 原煲上枱.

初嚐層層疊海鮮塔

香港hit了一排的層層疊海鮮塔, 終於來到了新加坡.

我們行完國立博物館就會合在旁邊大學讀書的學生去試食海鮮塔.

由博物館步行十分鐘以內就可以到達這間叫Captain K Seafood Tower的餐廳.

我們只有五個人, 只能叫4-5個人的set, 只有四層海鮮.  落order後, 待應就送來每人一碟泡菜, 醬料就自助, 有好多種選擇, 泰式, 韓式, 日式, 本地的醬汁都有.

新加坡國立博物館

三月學校一個星期的term break時, 我和Daddy請了半日假陪囝囝們外出.

當日落雨, 只可以選室內活動, 於是去了好耐無去過的新加坡國立博物館 (National Museum of Singapore).

我去旅行都鐘意去博物館的, 但好奇怪地新加坡的我只去過兩次.

上次去已經七, 八年前, 展覽全部更新了.

我們先去了Singapore History Gallery (新加坡歷史展).  展館用了多媒體和各種展品生動地敍述了過去700年的本地歷史. 哥哥睇得特別津津有味. 好像在温習他的歷史課.

好耐以前當新加坡仍未被英國人發現, 當時只有土著/原居民.

地道早餐

這星期屋企人逐個病, 星期二我開始發燒喉嚨痛, 然後到姐姐, 昨晚哥哥都發高燒喉嚨痛.

本來我都幾乎好番, 但昨晚要醒幾次幫囝囝探熱叫食藥, 攪到無覺好瞓, 今朝起身喉嚨又有些少唔舒服, 又攰又頭痛.

等哥哥睇完醫生, 我和Daddy才返工 (其實Daddy一早六點已經在家teleconference 了).

返工前先食早餐, 去了屋企附近的一間小店.  裏面裝潢都幾別緻, 座位都好舒服.  所以我真係好鐘意住緊呢區, 靜中帶旺.

撞手神的馬卡龍

馬卡龍這樣甜品, 食譜材料都好簡單, 但就是有一點點出竅門要注意, 至少理論上.

最重要就是攪拌過程, 要知道幾時可以停, 攪拌過頭, 蛋白漿會太瀉, 拌得不夠, 又會太挺身, 馬卡龍出來表面不平滑.  據個人經驗, 要攪拌到蛋白漿拎起時會好似慢慢瀉下, 留下痕跡, 好似整海綿蛋糕時打起的全蛋, 亦都好似整戚風時好似ribbon的樣子.

另一重點就是一定要等到表面乾, 不黏手才入爐, 馬卡龍才不會裂, 裙邊才會出來.

基本上就是這樣, 但實際做時其實好睇當日手神.

十二月時細佬突然說要食馬卡龍, 於是整了一盆.  本來是芒果味和士多啤梨味, 但芒果buttercream整多了, 所以變成全部都是芒果味.  呢次好成功, 又靚又好味.

買到媽咪鍋了!

一直以來, 最最最想要的LC煲就係黑裡媽咪鍋.

等黑裡媽咪鍋減價真的望穿秋水, 新加坡開倉好少會有的, 上次我找到個32cm 黑色的, 我都開心咗好耐.

不過, 32cm真的好大個, 不可能煮完直接上枱.

所以, 仍然想買個細細個的, 用來煮小炒用.

最近高島屋和伊勢丹都有LC減價, 有22 cm marmite, 星期日就衝去.

先去高島屋, 只有淺紫, 橙和紅, 都不是我想要的, 失望!

Daddy提議也去伊勢丹望望, 其實當時我着了一日的尖頭高跟鞋, 腳痛不想走了. 但泊車頭兩個鐘都一樣價錢, 就去行下.

伊勢丹減價的是cool mint (薄荷綠), 好靚呀!  即買!  已經是除了display set 外最後的一個.  然後Daddy自告奮勇碌卡俾錢, 多謝晒!  多得Daddy提議行埋伊勢丹, 亦多謝佢俾錢, 靚靚細媽咪鍋終於跟我返屋企.

味噌煮鯖魚 saba misoni (附食譜)

食日本餐或韓國餐, 好多時都會食到煎鯖魚.

最近去Yayoi 發現除了煎的, 還有用味噌煮的, 好味, 我還連繼續兩次都叫一樣的.

睇樣應該好易煮, 上網找食譜, 果然非常容易.

呢味完全係快, 靚, 正呀!  細佬食到停唔到手.  不過, 可能我的味噌比較淡味, 相對個汁甜咗少少, 下次要落少啲糖. 

美男廚房之吉列雞扒便當

又到美男廚房時間, 今集大少示範吉列雞扒便當.

雞胸肉腌好後沾上麵粉, 再上蛋漿, 最後沾上麵包糠.

雜果撻Fruit tart

以前曾經提過在我家對面有間好好味的蛋糕店, 它的撻做得最出色, 其中我家最愛的是雜莓撻.

不過, 隨着物價上漲, 那雜莓撻的價錢亦節節上升, 現在一個小小的四吋撻賣幾乎S$10. 哥哥每次經過都望着那雜莓撻, 好感歎地說: "That tart looks so good but it's so expensive."

趁着最近莓類當造, 上星期就買了些覆盆子(raspberries)和黑莓(blackberries), 用來做雜莓撻, 滿足一下囝囝們.

沒有小的撻模, 最小的也有八吋.  結果兩盒莓都不夠舖滿撻面, 見到窿窿, 美中不足.

九唔搭八的中韓混合晚餐

每逢星期六、日的午、晚餐都由我出主意, 盡量煮些平時姐姐不會煮的, 因為週一至五食姐姐煮的都已經好厭。

但我每次都會拖到最後一分鐘才會拿定主意, 然後臨急臨忙去摷冰箱或去超市買, 所以永遠唔會有周詳的計劃.  有時候朋友話下次煮乜乜乜時叫她, 她想跟我學做. 但真的不好意思, 不是我不教, 只是我從來都是臨時, 很難一早約定.

星期日返完教會, 三點才回到家, 姐姐已經問晚餐要煮什麼.

問三仔爺想食乜, 又沒人有主意.

終於四點半突然想起生煎包, 好, 就煮生煎包.  解凍豬肉, 才發現家裏沒適合做饀的菜, 又撲去超市買.

皮搓好, 饀預備好, 開始包時才記起其實我不會包中式包的.  試了幾個後, 仍然無辦法包到一摺摺的, 最後求其捏埋收口就算.  邊包邊駡自己: 明明已經攰到飛起, 仲攪咁多花臣, 攞苦嚟辛!

好彩最尾生煎包除了樣衰點外, 都好成功, 囝囝們食唔停口, 猛讚好味.

Hotel Jen 自助餐

26.02.2017

今年細佬生日無生日會, 不過我都趁機去食餐好的, 生日前一日我們去了Hotel Jen@Tanglin食自助餐.

我最鐘意就係海鮮, 有波士頓龍蝦拑, 蟹拑, 蝦和青口.  刺身就只有三文魚, 極肥美, 食一片都覺漏, 不過細佬超鐘意.  龍蝦拑大大隻, 好鮮味, 慢慢剝殼, 呢碟我都食咗好耐.

細佬九歲生日

細佬九歲喇!  實在太快了, 有時會想回到BB時期呢.

問細佬今年要甚麽款的蛋糕, 答案居然是和兩年前的那個一樣, 即是Angry Bird朱古力和現成糖霜裝飾, 蛋糕就要朱古力和raspberry慕絲.

其實我已經好唔想整Angry Bird, 整過好多好多次, 可以整其他嗎? 不如Minion, Pokemon ....

唔得! 一定要Angry Bird, 要一樣的紅色那隻.

點解佢咁專一呢?!

今年沒有攪生日會, 只是一家人在家切蛋糕, 所以只做了一個六吋的.

今年的蛋糕明顯比以前整的求其, 因為真係無時間.  以前會一早計劃定, 印好圖案, 預備好材料.  不過上星期哥哥測驗週, 今個星期輪到細佬測驗週, 只可以趁他們星期六去了學golf的短暫時間整, 材料也是臨急臨忙那天才去買.

紅色雀晝得太大隻, 因為我無事先上網揾圖案調較大細再打印出來, 臨時找了細佬的一件Angry Bird T-shirt 用牛油紙來晝.

今次的紅隻雀表面唔平, 因為整時用了保鮮袋來做底, 但又無舖平, 所以就皺皮了.

他要的糖霜裝飾缺貨, 找了兩間烘焙店都沒有. 不過, 他仍然好滿意. 哥哥好錫細佬, 放學去買了個小玩具給他做禮物.  細佬是很容易滿足的一個小朋友, 他完全沒有要求任何禮物, 只要有個蛋糕就夠開心.

可愛廚房小物

農曆新年後Daddy臨時被派去美國公幹, 去了兩個星期, 昨日終於回來了.

每次Daddy去美國, 我都會上網看看有什麽可以叫他買.  今次就在Amazon看了一些很可愛的廚房小物, 訂了寄去美國朋友家再轉交給Daddy帶回來.

都是Tovolo的silicone (矽膠)廚房用品.  左邊的鑊鏟是特地買給囝囝用的, 因為他投訴我現有的好難用.

砂窩雲吞雞

星期六和媽咪傾電話時, 佢話冰箱有包燕皮, 我上次返香港忘記俾我.  我先記起自己冰箱都仲有兩包燕皮, 係時候要整燕皮雲吞了.

之前又見到Mommy Dearest整砂窩雲吞雞, 所以我又照版煮碗, 星期一晚煮了一窩砂窩雲吞雞, 不過不是上海雲吞, 而是福州燕皮雲吞, 來個上海福州菜crossover.

用了一隻雞和一小片金華火腿來煮, 湯底好鮮味.  雞和金華火腿出水後加入滾水中, 再滾後慢火煮45分鐘.  其實應該要再煮耐啲, 湯頭會更濃.  不過我想連雞肉都食埋, 所以縮短煮湯時間, 額外加了一小包的史雲生瑤柱上湯. 食時雞肉仍然嫩滑.

燕皮雲吞的做法我以前介紹過, 可以參考舊post. 燕皮雲吞要先蒸熟才放湯裏的, 所以我先將津白煮熟, 最後才放入雲吞.  用燕皮雲吞有個好處就係唔怕浸在湯裏太耐而爛或溶.  冰箱有鮮腐竹, 也加入湯裏, 腐竹吸收了雞湯味, 勁好味.

呢煲砂窩雲吞雞真的十分好味, 一煲有齊菜，肉，湯, 呢餐唔駛煮其他餸.

小小美男廚房

上星期日, 我家少爺們負責煮晚餐, 我可以印印腳等食飯, 幾爽!

哥哥本身對食好有興趣, 但對煮就無咩興趣.  但今年中一開始要上家政堂, 上星期的那堂要整漢堡包, 老師會逐個評分.  因為會有食譜照住整, 漢堡扒不會出錯, 最難將會是煎的部份, 因為哥哥仍然好驚煎嘢時會彈油.  所以上星期日就決定先給他練習煎漢堡扒.  我好懶, 只買了現成的漢堡扒來煎.

唉, 睇哥哥拿鑊鏟的姿勢就知佢平時有無煮嘢食啦.  煎頭兩塊時我要在旁幫手, 後來的兩塊佢就自己攪掂.

晚餐唔想食包, 所以漢漢堡煎完當餸.  就咁放四塊啡色物體在碟上好難睇, 索性也教囝囝擺盆.  臨時洗其片生菜和一些車厘茄做個沙律, 上碟就靚得多.

娘惹賀年食品: Kuih Bangkit 茨粉餅/番婆餅

Daddy最鐘意食的賀年食品並非鳯梨酥, 腰果酥, 年糕, 蘿蔔糕之類, 而是一種叫kuih bangkit的娘惹食品.

每年我整賀年食品時, Daddy都會問點解唔整kuih bangkit.  原因係: 1. 我唔識整. 2. 我唔鐘意食.
當然原因2係主因啦, 無理由唔鐘意食又嘥功夫嚟整嘛.

不過, 見佢講咗咁多年, 我又逼佢食咗咁多年港式食品, 今年就試整.

Kuih bangkit的材料好簡單, 主要有木薯粉, 椰漿同糖.  味道就係微甜有椰香.  口感是入口即化但又有點粉粉的感覺.  其實好難去形容, 總之呢種口感我係唔鐘意的, 但偏偏就係這樣餅的特點亦是最難做到的.

做法又唔難, 只係有啲煩.  木薯粉原來係幾濕, 所以第一步要先用白鑊炒, 炒到啲粉乾身同夠鬆. 一路炒啲粉就一路飛, 好彩有姐姐幫手善後.  炒完後攤凍就可以加入打發的蛋黃和糖同埋椰漿.  我睇咗好多個食譜, 個個做法都大同小異但又有啲唔同, 最後粉糰的乾濕度就人人唔同.  第一次整唯有靠估.

登登登登....

成品就是這樣, 表面有裂痕的是較乾身的粉糰整的, 平滑的是濕一點的.  因為用曲奇模吸時, 粉糰慢慢會變乾啲, 途中會加少少椰漿, 所以有啲乾啲有啲會濕少少.  外面賣的通常會用食用色素在餅上加一個紅點做裝飾, 但我的是自己食就費事多此一舉.

一次過整了兩大盆, 168塊, 有排食.

今次的嘗試是半失敗的, 味道係無問題, 但做唔到應有的口感.  表面多裂痕的較近似, 表面平滑的就唔掂啦.  所以我估粉糰是要偏乾先可以達到應有的口感.

失敗乃成功之母, 以後再嘗試, 不過真係唔知幾時會再整.

過年就是不停吃

今年因為年三十是星期五, 仍然要返工, 加上奶奶不想出門(連來我家都不想), 所以團年飯就食打邊爐.  星馬兩地的華人(除廣東人外)通常團年飯都會打邊爐, 我未結婚前Daddy一家都是打邊爐團年的. 當晚將電磁爐和所有食材搬到奶奶家就可以開飯, 我只需事先醃肉, 方便快捷.  只是平常的打邊爐食材, 無咩特別, 無影相.  食剩好多料, 初一午餐去奶奶家拜年又再食打邊爐做午餐.

初一晚餐又是例牌臘味煲仔飯和南乳炆齋.  其實我到依家都唔明點解初一要食呢兩樣.  今年的臘味是十一月返香港時在安記買的, 好好味呀!  臘鴨脾勁大隻, 潤腸好香酒味, 正到暈.  我今年好懶, 無咩計劃, 連冬菇同枝竹都忘記浸, 所以炆齋似南乳雜菜煲多啲.

賀年食品

今日年三十, 先同大家拜年.

新年快樂!

萬事如意!

財源廣進!

身體健康!

心想事成!

步步高升!

今日仍然要返半日工, 所以團年飯一切從簡, 照新馬傳統食打邊爐算了. 

每年農曆新年前都好忙好忙, 淨係買餸都要走幾轉先買得齊.  年年都同自己講不如簡簡單單算啦, 唔好攪咁多. 但係最尾都係整呢樣整嗰樣, 都係晚晚唔夠瞓先安落.

今年我終於整好鳯梨酥過年了, 不過只整了一小罐, 只夠自用.  過咗年先再做來送人.  

炒菠蘿饀時, 開油鑊炒蝦片.  既然開了油鑊, 索性炸多樣嘢, 於是就整笑口棗.  第一次整, 都有爆開口, 都幾靚.  哥哥即日食讚好味, 不過隔咗夜就唔脆了.  我諗我加太多水來搓好粉糰, 下次再試.

網上見到Zoe的鹹蛋黃曲奇, 好易整, 又整了兩大盆.  做成細細塊的, 好好味, 可以一塊接一塊食唔停.

星期一晚上整的, 鋼琴老師教完囝囝們後, 貪得意用牙籤劃花, 又幾靚喎.

最後當然有蒸糕bell啦, 蘿蔔糕加芋頭糕, 年廿八晚蒸到成十一點先蒸好, 攰爆. 蘿蔔糕和芋頭糕都是自用和送奶奶的, 所以唔會加蔥, 芝麻等在上面裝飾.

仲差年糕未整, 晏啲有時間就整埋啦.