好餸星期六

過去週末好開心, 因為有時間煮飯仔和焗麵包和蛋糕.
太耐冇煮, 已經好手痕.
上星期見雀后整鹽焗雞脾, 星期六就即刻去街市買幾隻雞脾準備照辦煮碗.  但在昇鬆見到好新鮮的大魚頭, 忍唔住買一個回家, 見到靚蜆又買了.
咁啱Daddy星期六晚有約出街食, 啱晒可以整佢唔食的魚頭. 
最後決定擱置整鹽焗雞脾計劃, 換成梅菜蒸大魚頭和粉絲蒸蜆.  魚頭囝囝哋唔啱食, 另外煮兩隻雞脾, 但只為了兩隻雞脾開爐焗好似好嘥電, 索性放電飯煲裏和飯一隻齊水蒸.  再加碟白灼西蘭花和椰菜花, 就是好好餸的晚餐了.

梅菜蒸魚頭, 勁滑勁新鮮.  大大個魚頭連魚身才S$5.8, 平過香港價錢.  我和姐姐一人食一邊, 食完飽到上心口.

粉絲蒸蜆, 蒸前澆上少許花雕酒, 粉絲吸了蜆的鮮和酒的香, 比蜆更好味.

為囝囝們而設的蒸雞脾, 本來要用鹽焗雞粉來醃, 但原來原本的那樽鹽焗雞粉因為已過期給我掉丟, 所以就只好用懿懿自家品牌鹽焗雞粉來醃.   何謂懿懿鹽焗雞粉?  鹽, 五香粉, 沙薑粉和胡椒粉混合是也.  份量嘛?  好像是鹽一茶匙, 五香粉八分一茶匙, 沙薑粉四分一茶匙, 胡椒粉少許.  另外再加上少少花雕酒來醃, 蒸前加薑汁即可.  味道很不錯, 囝囝們食到 lam lam 脷.  不過, 雞脾的油份很誇張, 蒸完成碟都是雞油.  下次還是用焗的食得安心點.

呢餐全家都食到勁回味, 第二朝姐姐仲話俾Daddy知我哋嗰晚好好餸, 一定好食過Daddy外面食喎.