Club Med Bintan 完結篇

終於寫到完結篇了.

第四日朝早仍然陽光普照, 太好了.

今日早餐全家都狂食蛋, 哥哥又奄列又荷包蛋.

我就食荷包蛋和今次旅程至愛的日本米飯.

細佬本來話食"circle egg", Daddy就拎隻荷包蛋俾佢.  點知見到隻荷包蛋又話唔要, 要"oval egg" (即烚蛋).  但餐廳沒供應烚蛋, 撞下彩問問侍應可以叫廚房幫忙烚一隻.  侍應幾分鐘後就送來兩隻烚蛋, 服務好好.

其實如果有任何特別要求, 廚房能做到的佢哋都會肯做的.  我見另一枱人叫廚房炒飯(當日buffet只有炒麵), 廚房都即時炒碟一人份的.
 

呢個位置係細佬最鐘意的, 每餐都要去開下個雪櫃, 慢慢揀杯yogurt.  呢個其實係baby corner, 有一樽樽的baby food, 又有牛奶, 上面還有個微波爐和bottle warmer, 可以翻熱食物和坐暖牛奶.

中午十二點要check out, 仍可以玩一次行鋼線.  兩個一早去霸頭位.  細佬橋住手, 因為佢嬲哥哥拎咗個波波.  哥哥話俾番佢, 佢話"I don't want.  I'm angry." 攪笑!

哥哥本來排第一, 但佢有啲驚, 就叫細佬打頭陣.  細佬前一日已經玩過, 信心滿滿咁爬上個台度.

睇個招積樣, 擺明想向哥哥示威.

哥哥真係有啲驚, 全程要個GO姐姐傍住.

臨走點都要去泳池玩多次.



三父子响泳池, 我就周圍行影下相. 

呢度啲房就係咁一楝楝的, 全部都有露台.  只有三層高, 但冇lift的, 所以如果小朋友需要用bb車出入的, 記緊要訂房時要求一樓的房間.

天氣好可以玩風帆同游水.

泳池後面的就是main building, 餐廳, 劇場, 精品店, reception, kids club都在這裏.

這條就是由泳池行返房必經之路, 左邊就是我們住的block D, 右邊就是Terrace Restaurant, 所以囝囝們每日都要去食一轉下午茶.

呢度好多甲蟲, 有大有細, 但唔駛怕, 因為好少見到啲甲蟲飛來飛去, 通常都係趴喺地上面, 就快死咁樣唔多識郁.

游完水返房沖涼, 就將行李放喺房門口, 跟住我哋就去reception check out.  我們的船是下晝兩點半開, 酒店安排好我哋坐一點的車去碼頭, 叫我哋十二點之前將行李放喺房門口, 佢哋就會有人幫我哋將行李運去碼頭.  咁既服務太方便了, 唔駛自己拎行李去櫃台.

Check out 完後又未到食晏時間, 就坐低飲杯嘢, 呢個trip兩個囝囝愛上了ice lemon tea, 日日都要飲.  平日佢哋唔會有機會飲的, 但放假就俾佢哋放縱少少啦. 

兩兄弟自己去bar度叫嘢飲.

細佬大大聲咁話: "Can I have a lemon tea please?"

雖然早餐都未消化, 但要坐一點車走, 逼住十二點要食午餐.  哥哥話最後一餐可唔可以食薯條同chicken nuggets, 見佢咁乖問過我先拎, 就准佢食多一次咁大把啦.

哥哥的午餐

我的午餐, 真的未食得落.

Daddy 的麵包蛋糕午餐

Rum and raisin 雪糕, 好重酒味, 好味.

哥哥話蛋糕好食喎, 我叫住佢咋, 如果唔係佢唔止拎三塊呀.

食飽飽就去四樓reception等車, GO們陸續來送行.  Mini Club Med  的GO來給小朋友証書.

GO們夾道送我哋上車.  全部人上車後, 其中一個GO上嚟數人頭, 確保沒漏低任何人, 跟住就派登船証(boarding pass), 唔駛自己去到碼頭時攞.  有一位職員跟我哋一齊去碼頭, 有咩突發事可以即時有人幫忙.

去到碼頭時, 已經見到我哋啲行李擺响Club Med 櫃台前了, 應該是之前已經先運過去.

我想先買手信, 於是叫Daddy先睇住囝囝們和行李.  未幾Club Med職員就過嚟話叫我哋先check in 行李, 仲跟我哋一齊去到Emerald class lounge入口處交待清楚, 確保我哋啲手續全部攪齊佢先離開哩, 服務極週到.

原來坐emerald class係唔駛自己過海關的, 只需在lounge前將護照和行李交俾職員, 佢哋就會幫我哋辦理寄行李和過關手續.  我哋只需舒舒服服咁坐喺lounge入面等就得喇.



有免費飲料提供, 可以睇報紙和電視.



手續辦好後, 職員就會俾番張寄行李的單和己蓋印的護照我哋, 我哋仲可以優先登船.

嗱, 所以就算去時唔坐emerald class, 回程都一定要坐呀, 方便好多架.

仲有到達新加坡時又可以先落船, 行李又會先出, 可以一馬當先去排隊等的士.  因為碼頭位置幾偏僻, 好少的士會入去, 通常條的士隊都超長架.

本來我哋係第一個過關的, 照理可以排到最前面等的士.  點知嗰日唔知係咪有乜線報, 當船駛入新加坡海域時, 就已經俾水警折住, 上船搜咗一陣.  到步後行李亦等了好耐先出, 到條行李帶開始轉時, 其他坐普通位的乘客都陸續出嚟.  好彩始終都有少少優勢, 條龍都未算太長, 不過都係要電召, 因為真係唔見有的士.  你睇好多人都喺度打緊電話, 就算電召都要等好耐先揾到的士.

回程時仍天朗氣清, 我冇暈船浪.  但當我哋坐上的士後, 天氣開始轉暗, 之後仲落起大雨, 雷電交加.  所以好感恩我哋已經返到呢邊, 如果遲一班船, 我可能會嘔到七彩.  感謝主!

總括今次旅行好開心, Club Med服務好好, 包飲包食包玩, 唔需花心思精神去plan, 大人細路都能照顧到.

Daddy已經話要再試其他的Club Med, 囝囝們日日都話想再去. 

有網友問點book, 可以通過旅行社訂, 亦可直接從Club Med網上book, 價錢一樣的, 所以我建議直接自己去Club Med book. 

不過, Club Med個網上冇upgrade去emerald class 的選擇.  如果想坐emerald class 就要打1-800-CLUBMED呢個電話去book, 都好方便.  佢哋間中會有promotion, 可以上佢網上留意下.

我訂時剛好有promotion, 住三晚或以上成人每位減S$250, 小朋友減S$150, 另外用VISA俾錢仲可以每人多減S$100, 所以今次四日三夜一家四口埋單只需S$2,636, 包船票和一切費用.