Club Med Bintan 第一日(下)

 玩完carrom後仍然落住毛毛雨, 加上當日要早起身出發, 所以就返房午睡片刻.

哥哥瞓一個鐘就醒了, 開始覺肚餓, 就帶佢去Terrace Restaurant食下午茶, Daddy 就留喺房陪細佬繼續瞓.

Club Med Bintan只有兩間餐廳, 主餐廳叫Waterfall, 提供早, 午, 晚自助餐.  主餐外的時間如果想食嘢, 就可以嚟Terrace, 日間亦是自助式, 有各式沙律, 簡單的薯條, 雞扒, 腸仔, 公仔麵, 意粉, 蛋糕, 麵包, 曲奇, 芝士, 生果之類, 質素一般, 但勝在選擇算多. 這餐廳是沒冷氣的, 有雀仔飛來飛去, 見過有雀仔飛到碟餅乾上面, 所以我只選熱食, 因為有廚師守在熱盆區, 雀仔唔敢飛過去. 





哥哥食至愛烤雞扒, 我逼佢食埋椰菜花, 唔可以淨食肉嘛.

食飽返房細佬啱啱起身, 又嘈要去泳池, 但啱啱先停雨, 風又大, 水應該會好凍, 所以唔敢俾佢哋游水, 就帶佢哋去行沙灘.

冇帶沙灘玩具, 囝囝們只可以用樹枝來在沙上寫字.




天陰陰, 好大浪, 細佬行一陣都成身震, 都係要返回室內玩遊戲.

呢日晚餐有壽司, 睇個樣都麻麻, 但有三文魚, 哥哥都食得好開心, 拎完又拎.

自助餐每餐都有中式, 日式, 印度食品, 西餐, 基本上是international buffet.  呢日有越南春卷.

飲品無限量供應, 紅酒要叫侍應斟, 啤酒就自己拎, 質素普通, free flow的不能要求太高.



印度烤羊架, 又腍又香又好味, 咁多餐最好味就係佢, 有啲後悔冇拎多次.

乜都試少少, 有韓式炒雞肉和泡菜之類.

甜品好多選擇, 望落好吸引, 但食落真係勁麻麻.  生果都係普通西瓜, 蜜瓜, 橙之類.  但 每日都有蛇皮果, 你哋食過未呀? 我第一次食, 覺得味道怪怪, 唔鐘意.

嚟Club Med其中一個好處就係餐餐自助餐, 唔駛諗要揀邊間餐廳食啲乜, 尤其帶住小朋友就更方便, 咁多選擇, 點都有啱食既.  細佬就最鐘意食炒麵.



食飽飽後去樓下lounge (主餐廳喺二樓) 坐陣, 九點就有show 睇嘞.  呢晚主題係K-Pop, 係由GO們表演的.  好佩服啲GO, 無論日頭負責reception, bar, 教打波, 照顧小朋友都好, 夜晚都會上台表演, 簡直十項全能.



播K-Pop歌, GO們跳舞, 跳得好好.

女GO們都不弱啊.

細佬好鐘意睇, 睇到眼都唔眨.

表演完例牌叫啲小朋友上台, 台下觀眾都一齊跳舞, 好熱鬧.




表演完已經十點鐘, 節目仲未完.  呢晚有個multi-cultural food fair, GO們表演完極速換衫再嚟擺檔, 有中, 日, 韓, 印尼, 澳洲和南非食物攤.



晚餐都未落隔, 只試了少少韓式BBQ豬腩, 好正!

還有竹竿舞表演.

室內酒吧開到淩晨十二點, 還有小食供應, 喺呢度唔怕餓, 只怕食唔落.

飲飽食醉就返房休息了, 張king bed夠大又舒服, 我哋三母子瞓到唔會逼.