泰式紫椰菜蝦沙律, 青咖喱雞

今日又有客到, 囝囝的德國契爺一家到訪. 

佢哋今朝六點半飛到, 因為酒店要下晝兩點先可以check-in, 所以先到我家沖個涼, 休息一下. 

所以今朝我一早起身恭候, 要預備好毛巾和沐浴用品, 還準備了一堆食物給他們做早餐.

他們八點正到我屋企, 見到佢哋真開心.  他們的囝囝比大佬細兩年, 我兩年前到德國時見過佢, 依家個樣都冇咩變, 只係大隻咗啫.  小朋友成十二個半鐘機都冇瞓過, 所以朋友兩公婆都全程冇得瞓, 陰公.

安頓好佢哋我就返工嘞.  姐姐啱啱報告: 大佬和朋友囝囝玩Sudoku(數獨?).  乜六歲半同四歲半細路識玩咩?  佢哋仲要係完全言語不通.  連我都聽唔明朋友囝囝講乜, 平時睇都仲睇得明少少德文生字, 聽就真係一啲都唔掂.

我請咗假聽日陪佢哋去動物園, 三個小朋友一齊去, 一定好好玩, 依家已經好期待. 

講開呢個德國朋友就要post吓泰國菜, 因為我本泰國食菜就係當年佢送俾我既.

上星期六整的紫椰菜蝦沙律, 加了洋蔥和車厘茄, 紫椰菜又甜, 配上泰式醬汁, 好味好開胃.  家裏冇指天椒, 只用普通紅椒, 不夠辣. 

姐姐某日煮的泰國青咖喱雞, 明知我想減肥, 佢仲整啲咁正既, 直情想靠害.  個咖喱都幾辣吓, 攪到我仲食多啲飯添. 

青咖喱雞食譜.