過年就是不停吃

今年因為年三十是星期五, 仍然要返工, 加上奶奶不想出門(連來我家都不想), 所以團年飯就食打邊爐.  星馬兩地的華人(除廣東人外)通常團年飯都會打邊爐, 我未結婚前Daddy一家都是打邊爐團年的. 當晚將電磁爐和所有食材搬到奶奶家就可以開飯, 我只需事先醃肉, 方便快捷.  只是平常的打邊爐食材, 無咩特別, 無影相.  食剩好多料, 初一午餐去奶奶家拜年又再食打邊爐做午餐.

初一晚餐又是例牌臘味煲仔飯和南乳炆齋.  其實我到依家都唔明點解初一要食呢兩樣.  今年的臘味是十一月返香港時在安記買的, 好好味呀!  臘鴨脾勁大隻, 潤腸好香酒味, 正到暈.  我今年好懶, 無咩計劃, 連冬菇同枝竹都忘記浸, 所以炆齋似南乳雜菜煲多啲.

初二開年飯, 只有我們一家四口, 但媽咪教落要有至少六樣餸, 於是就樣樣煮少少來湊數.  左上角順時針: 粟米魚肚羮, 冬菇髪菜炆金蠔扒西蘭花, 鹽焗雞扒, 五香肉卷, 蜜糖豆炒帶子, 蒸魚.

五香肉卷是福建人的食品, 用腐皮包着豬肉, 蝦, 馬蹄等, 蒸熟後再炸. 以往年年奶奶都會叫她的姐姐整俾我哋, 今年居然無整, 所以就自己試整, 結果腐皮又鹹又硬, 奶奶話我買錯腐皮喎, 下次成功先再post.

初三就請了我關顧的學生來食飯, 一共五人, 再加我一家四口, 總共九個人.  我煮了八餸一湯, 好豐富架!  由右邊開始: 冬菇金蠔炆海參, 沙薑蒸雞, 蒸石班, 自製燒腩仔, 清炒雲耳西蘭花, 鮑貝扒生菜, 涼拌珊瑚藻, 蓮藕炆豬手. 湯是encore初二的粟米魚肚羮.

學生影的靚相, 我自己影的全部矇查查.

 燒腩仔好脆, 肉爽口, 只切了部份, 底部軟骨部位和邊位留起來第二餐整炆火腩.

 學生中其中四個都是女生, 較鐘意食菜, 所以特別煮多啲菜.  涼拌珊瑚藻加了青瓜絲, 紅蘿蔔絲和新鮮雲耳, 拌以用鎮江醋, 白醋, 豉油, 糖和麻油混合的醬汁, 酸酸甜甜又爽口, 非常啱佢哋口味.  西蘭花本來用來炒帶子, 但好似好多餸, 臨時決定唔整, 變成清炒西蘭花雲耳.

其實蓮藕炆豬手和冬菇金蠔炆海參我都煮了好大煲, 但只拎一部份出來, 另一部份留返初四食, 因為初四又多一場, 一餐煮埋兩餐食, 慳功夫嘛.

初四輪到詩班在我家, 其實這聚餐是初二朝早返完教會後食早餐時臨時決定的, 反正我買落好多食材, 佢哋嚟可以幫我清雪櫃.

今餐有十四人, 不過我也不用花好多時間煮, 因為前一日都煮落兩味, 再加兩個炆餸, 煲老火湯, 南乳炆齋一大煲, 再加個小炒就攪掂.

男人的浪漫 - 韭菜豆腐炆火腩, 在新加坡好少食到的, 所以大受歡迎.

初三煮的冬菇金蠔炆海參, 放隔夜更入味.  今年買的金蠔好好味, 用來炆Daddy和囝囝們都鐘意食, 返而上年用來煎佢哋就唔鐘意.

好大煲的南乳炆齋, 今次有冬菇和枝竹, 但忘了買荷蘭豆.

由香港帶回來兩隻臘鴨脾, 初一煮了一隻, 想快啲食埋另一隻, 費事阻住雪櫃, 所以就煮了煲芋頭油鴨雞煲, 除油鴨脾外, 還加了一隻雞, 多點肉食. 個汁有臘味鹹香又有椰汁香, 細佬當湯飲.

當晚的主角其實是這煲生炒糯米飯, 由詩班指揮主理的, 幾乎料多過飯, 好好味.  呢味我從來無諗過整, 要係咁炒炒到手軟, 都係等人煮俾我食好啲.

仲有碟腰果西芹炒帶子, 因為我想食炸腰果同西芹. 似乎好多人都唔鐘意食西芹, 只食帶子和腰果, 只見到一兩個人夾西芹食. 點解呢?

仲有一煲淮杞響螺煲雞湯, 煲湯甜到漏, 連湯渣佢哋都食埋, 可惜無影相.  還前了一底蘿蔔糕, 一人一片一下子食晒, 太好了, 終於可以清晒蘿蔔糕.  不過都仲有芋頭糕喺雪櫃, 依家我朝朝都食來做早餐,