Strawberry shortcake

最近忙新屋裝修, 冇乜時間整嘢食, 連影完的相都唔得閒整埋, 暫時上住舊作先.

呢個士多啤梨忌廉蛋糕係平生整的第二個cream cake.  抆cream係一個好大既學問, 抆來抆去都抆唔平, 呢邊天氣又熱, 好驚未抆完啲忌廉都溶晒. 

呢隻蛋糕見市面上都叫strawberry shortcake, 裏面係海綿蛋糕中間夾士多啤梨.  但在外國的食譜裏, strawberry shortcake 應該係用兩片類似scones的物體, 中間夾忌廉和士多啤梨做成的, 而唔係用海綿蛋糕的. 點都好, 只要好食就得啦.

呢個就係我整的第一個忌廉蛋糕嘞, 夠醜樣啦啩.  細佬一歲生日時整的, 中間夾芒果.  第一次抆cream, 手腳慢, 好明顯睇得出啲cream溶溶哋. 

粉絲蝦煲

八年前泰國友人帶我到曼谷Chao Praya River旁的一間餐廳食泰菜, 其中一道粉絲蝦煲是我食過最美味的, 多年來都找不回那樣的粉絲蝦煲.

偶而想重温那味道, 自己動手煮, 但味道仍差甚遠.

這是前個星期煮的, 雪柜裏只有細蝦, 如果用大一點的會比較好.  不過, 對我來說主角其實是粉絲, 蝦只是配角. 

做法:

收到喇!

收到喇!  好開心呀, 想擁有好耐的DVD終於到手喇!

趁家陣英磅跌咗, 响英國網站Presto Classical訂, 連郵費都比amazon未包郵費前平.

恨咗好耐, 就係佢嘞 - The Magic Flute (Die Zauberflöte) at the Royal Opera House Covent Garden.

星期六一收到就即刻拆嚟睇, 奈何有其他事要辦要出門, 仲未可以一氣呵成睇晒成個劇. 不過兩個囝囝自己喺屋企就已經睇完, 仲好鐘意添.

成個production, 由唱功到舞台設計都非常出色, 如果可以現塲睇就更正.

Diana Damrau 完美演繹Der Hölle Rache, 太太太精采了.


噚日下晝又再睇, 睇到忘記焗緊黑啤包, 結果包包面焗到黑晒, 好彩未燶, 仲食得.

香港迪士尼

農曆新年返香港時, 打算年初二去迪士尼, 但當時得幾度, 凍到騰騰震, 最尾都冇去.

今次返香港因為答應咗囝囝, 唔去都唔得.

以前去過Florida的Disney World, 雖然知道香港既會細好多, 但始終都有少少期望.

在欣澳轉車時, 見到迪士尼線地鐡到時, 大家都好興奮, 因為啲車窗係米奇標誌的.  入到車廂入面, 連手挽都係米奇, 嗰刻我仲諗不如等日得閒就算唔入迪士尼, 淨搭呢線地鐡過吓癮都好噃.

港式麥包

終於整咗喇!

見到其他blog友都整咗, 我上個月就買罐黑啤諗住整, 但拖拖吓到星期日先整.

多得Mommy Dearest提我, 糖量加至60g, 不過我都仲覺得可以再加多啲會仲似响香港食到既味道.

一出爐daddy見到, 問我黑忟忟既係咩嚟架, 我話係黑啤提子包, 佢就好開心話要食, 即時拎一個嚟食.  佢好少可對我整既嘢咁踴躍, 今次應該係因為有提子, 佢係好鐘意食提子包的.  食完仲叫姐姐包起兩個俾佢第二朝帶返工做早餐添.

食譜出自如月.

父親節

噚日父親節, 本來想响香港陪爸爸過埋先返, 但機位勁爆, 訂唔到星期日下晝機, 咁唯有預先整定個蛋糕.

外甥仔話要食朱古力和士多啤梨味, 咁就整strawberry and chocolate mousse cake. 

香港屋企冇焗爐, 只可以整餅底, 今次用朱古力味餅底.  當然在百無情況下又貪方便响二記買包餅底碎用就算嘞.  我細佬上次借返嚟既餅模仲未還, 啱啱可以再用.  交帶佢帶塊方型咭紙俾我, 佢又唔記得, 好彩俾我見到個金莎朱古力既膠盒, 啱啱好用來墊底.

無氈無線, 神仙難變! 又費事特登去買嘢做裝飾, 用唔晒留低都冇人會接手.  於是就拜托細佬帶個父親節牌番嚟, 順便做埋裝飾.  我只係整蛋糕本體, 連模都未甩就留俾佢星期日自己攪, 不過我千叮萬囑叫細妹影低相俾我睇.

最後成品, 靚嗎?

Chocolate buttermilk muffin

呢篇已經响草稿匣六個月嘞, 趁返香港時用來攝吓位啦.

上星期日本來滿懷大志要用雪柜裏的三個熱情果來整戚風, 但嗰朝四點幾俾細佬整醒, 攰到教會都無去, 實在無精力去整.

但又心思思想整疍糕做第二日的早餐, muffin 就最簡單快趣.  見過大少奶和Vanlily 話用buttermilk 整muffin 會鬆軟啲, 就試吓喇.  遷就大仔, 就整chocolate chip buttermilk muffins.

慳家既我梗唔會特登去買buttermilk, 加上buttermilk 好少地方有得賣, 於是在網上揾到方法自製, 用普通奶加白醋五分鐘就ok.

到最後步驟先發覺屋企的chocolate chip 居然已發霉! 所以就變咗chocolate buttermilk muffins.

未出爐已經好香朱古力味, 攤涷之後食真係好鬆軟, 第二朝食都仍然好鬆好香.

呢個食譜非常方便, 只需量杯和量匙.  見網上有啲人話唔鐘意用唔需秤既食譜, 怕唔準. 其實以我經驗, 秤或唔秤分別唔大, 重點係要量啱方法. 正確量法要將量杯快手"畢", 然後用刀掃平, 千祈唔可以"燉"或壓實, 同開奶粉原理一樣, 做媽咪, 爹哋既一定明.

以前在英國留學時, 窮苦學生邊有錢去買磅, 都只靠一隻量杯, 一set量匙嚟整嘢食, 一樣冇問題.  嗰隻量杯好正架, 除咗ml, 仲有面粉, 糖既重量, 可以量粉, 糖, 液體.  隻杯成十年歷史, 我都仲用緊, 唔捨得掉.

食譜:

牛油  半杯
砂糖 一杯
蛋 兩隻
Buttermilk  一杯 (量杯放一湯匙白醋, 加牛奶至一杯, 放五分鐘)
中粉 1-3/4 杯
可可粉  半杯
發粉 半茶匙
梳打粉 半茶匙
盬 半茶匙

做法:

1. 預熱焗爐170度. 混合所有粉類和盬, 過篩備用.

2. 牛油加砂糖打至鬆發, 逐隻蛋加入, 再加入Buttermilk.

3. 加入過篩粉類, 混合, chocolate chips 可以這時加入, 倒入muffin 模, 焗15-18分鐘.

肉骨茶

我現在身在香港, 預先寫定幾篇, 以免餓壞個blog.

這陣子常往Balestier Road跑, 因為要為新屋選購燈飾. 

每次花一兩小時抬頭望天花板上的燈飾後都會眼花撩亂, 頸梗膊痛. 

晚餐就選最近最快的解決, 在我們到的幾間燈飾店附近的食店都賣肉骨茶, 那就食肉骨茶好了.

1. "發起人" 肉骨茶

四月尾時選了"發起人" 肉骨茶, 在Shaw Plaza對面.  我們的室內設計師推薦的.  店內牆上貼滿老闆和中港台新的名人名星照, 印象中有周華健和張韶涵. 既然有這麼多名人光顧, 食物水準大概差不到那裏, 於是我們滿懷期望的等待那碗肉骨茶的到來.

除了肉骨茶, 還叫了滷豆卜, 滷腐皮和菜尾(即咸菜).  肉骨茶湯底比較濁, 除胡椒外還有葯材味, 不是我的那杯茶.  我喜歡的是潮州式胡椒味重沒葯材的清湯.  肉骨茶各人口味不同, 所以不能說煮得不好吃, 只是不合我口味.  但其他的配菜是完全不合格的, 菜尾很咸, 腐皮沒炆夠, 好硬, 滷豆卜也是滷不夠.  有可能店出名了, 客人多了, 煮的反而更求其, 總之這餐大失所望.

packing list

就快要出門了, 都要出呢個post, 因為我覺得好得意.

前日我寫定張packing list叫姐姐帮手執行李, 大仔見到又有樣學樣寫自己的packing list.

啲字寫到東歪西倒, 但都睇得明.  佢已經將隻Elmo和library books入箱了, 個big red pillow係好大個既, Daddy話唔俾帶, 佢好傷心. 

佢噚日整咗架飛機, 話要送俾表弟, 絶對係廢物利用呀.

啱啱細佬俾Daddy鬧, 跟住就去嗲哥哥, 兩個攬埋一齊, 好攪笑呀.

好嘞, 要出門了, 香港見.

白酒忌廉花甲意粉

聽日就返香港一個星期, 太開心啦! 

今次成家人一齊返, 囝囝上個星期已經開始倒數, 佢話今日要自已執行李喎, 不過佢執既係只係自已啲書和玩具.

上次(兩個月前)返香港親自下廚煮的晚餐, 拖到依家都未出post, 如果今日再唔出睇怕要變倉底貨了.

之前為咗氹細路, 買了忌廉來整strawberry panna cotta 和 blueberry yought mousse cake, 剩下的忌廉就用來煮白酒忌廉花甲意粉. 

原來在香港酒係免稅的, 真好, 價錢比在呢邊的便宜一大截.  在百佳買了一瓶平價南非白酒, 反正用來煮的,  沒必要買貴價的. 

煮意粉唔需要用一整瓶, 於是一邊煮, 一邊飲.  自從由英國返嚟後都未試過咁豪地一邊煮一邊飲, 因為新加坡啲酒比較貴.  雖然係平價酒, 但都好好飲, 下次都會再買呢隻酒.

    
做法好簡單, 先爆香洋葱碎, 洋葱開始變透明時加入蒜蓉, 炒一炒, 落花甲, 炒幾下, 洒入香草碎, 倒入白酒, 冚蓋, 煮到花甲熟, 加入忌廉, 用鹽和黑胡椒調味, 最後加入已煮好的意粉. 

Student recital (學生音樂會)

不經不覺跟老師學聲樂已經有十年, 由未結婚就開始學. 

可惜中間有六年時間因為生兩個囝囝, 成日做逃學威龍, 所以學咗咁耐都係停濟不前. 

見到其他學妹學弟都考到八級, 實在覺得太慚愧.  好彩老師都仍好有耐心咁等我, 唔介意我打遊擊方式上堂, 一個月先去上一堂兩堂.

年頭老師問我要唔要參與學生音樂會, 當時都好猶豫.  最後答應咗, 主要係想俾自己一個動力, 逼自己勤力啲去上堂, 上練歌.  但當時唔知姐姐五月會返鄉下, 知道既話, 我一定唔唱.  就因為咁, 呢次實在太大壓力, 五月時要返工, 要湊仔, 要煮飯做家務, 已經攰到死仲要去上堂練歌, 真係好辛苦.

個音樂會响過去個星期日舉行, 呢張就係老師讀設計既囡囡整既poster. 

地點: YMS Arts Centre. 

公司家庭日

上星期五下晝我公司攪咗個家庭日, 目的係俾屋企人嚟公司參觀, 等佢哋了解吓我哋既工作.

Daddy要返工冇嚟, 只有姐姐和兩個囝囝來參加. 

公司在禁區來, 閒人免進, 所以之前都要申服資料攞准證先可以入嚟.

路上姐姐一路話乜你公司咁遠架, 好似返印尼咁.

一嚟到兩個囝囝就好似甩繩馬騮咁跑來跑去, 我要班多個同事一齊去追住佢哋先掂.

細佬想拆咗啲信箱門呀!

挑裙腳

最近發現一樣很好用的東西, 和大家分享一下. 

有時買到的褲和裙長度唔啱時, 都需要自己修改, 但挑褲腳, 裙腳都非常花時間心機. 

而有些薄或delicate的布料根本唔可以自已去挑, 好易整壞. 

最近要著一條有十年歷史的晚裝裙, 裙腳有少少開口本來諗住用雙面膠紙痴番就算.  突然諗起曾經聽過一樣叫iron-on hemming tape既嘢, 好似宜家有.  最尾冇去宜家, 但响Spotlight俾我揾到.  原來仲有好幾種, 適合唔同布料用的.

我條裙係satin料, 所以我選了專門用於delicate布料的.

拆開後係咁既樣, 好似薄紗咁.

可以剪出所需長度和濶度, 放在兩層布料中間, 用蒸氣熨斗熨一熨, 待涼十分鐘就攪掂, 可以耐水洗和乾洗.  以後如果需要再更改, 只需用蒸氣熨斗熨一熨, 就可以拆開還原.

以後唔得閒挑褲腳裙腳, 拎呢卷嘢出嚟就攪掂, Yeah!

呢卷只需六蚊坡紙, 可以有排用.

甜品餐

上星期四無端端俾大老闆"欽點"代佢去參加一個committee meeting, 個committee係同我既工作一丁點關係都冇既.  好慘呀, 以後幾個月每兩, 三個星期就要去開一次會.

每次開會都會係committee chairman個office度開, 係CBD範圍, 去又麻煩, 走仲煩, 因為會撞着放工時間, 會塞車.

上星期四個會應該係四點鐘開到六點, Daddy 懶得煮飯(係淨煮飯啊, 餸我已經之前煮好) 就帶埋兩個囝囝去Raffles City Shopping Centre 會合我食晚餐.  結果個會拖到六點九先完, 去到Raffles City Shopping Centre 已經人山人海.

帶住兩個囝囝揾食真係唔容易, 好彩俾我哋揾到間無乜人既餐廳, 可能因為喺响新既extension 內, 冇咁就腳.

間餐廳叫Aerin's.  拎部相機出嚟, 點知居然冇電, 所以只好用手機影.

個餐牌內啲食物都好吸引, 不過最後只揀了啱兩個囝囝食既嘢.  問個侍應份量大唔大, 個侍應話都好大吓, 叫我哋叫兩個主菜就夠.

就睇吓有幾咁大, 原來係咁"大". 呢碟係Banger and mash, 兩條英式香腸加薯蓉.

乾炒牛河

繼雪菜火鴨絲窩米後, 又一午餐碟頭 - 最愛的乾炒牛河.

這是趁姐姐回來前一日煮的, 因姐姐唔食牛, 所以無謂留舊牛肉在冰箱, 趁佢未番快啲煮埋佢.

雪柜有隻買咗成個星期的青椒, 炒埋落去.  嗰日我好努力咁清雪柜的存貨, 因為有啲嘢真係放咗好耐.

姐姐唔喺度時, 我可以盡情咁煮牛肉食, 家陣佢番嚟, 我哋又回復一月煮一次嘞, 因為等佢放假我先煮.  當然出街我會食, 突然好想食Morton 添.

雖然姐姐返咗嚟, 但呢幾日都係好忙, 都係唔夠瞓, 仲好似想作病, 作喉嚨痛添.  唔得呀, 唔病得架, 唔該等下星期先病啦.

雪菜火鴨絲窩米

上個月姐姐返鄉下時, 我留在家裏湊仔就三餐都要煮.

午餐簡簡單單炒飯麵之類, 其中一日煮了雪菜火鴨絲窩米.

直至四月以前, 我都從來未見過未切碎未煮的雪菜.  四月返香港時, 同媽咪話我要買雪菜返新加坡, 因為呢度冇得賣.  去街市先知原來雪菜都有兩種, 有綠色同啡黃色的, 綠色貴啲, 就買綠色啦, 雖然我都唔知兩隻有乜分別.

我自己的簡單煮法: 米粉先浸軟. 雪菜浸水以免過咸, 切碎, 用油加薑片和少許糖炒香, 加入火鴨絲, 兜勻, 下米粉和上湯煮滾冚蓋焗至米粉夠軟和入味. 起鍋前再加入預先炒熟的銀芽.

我鐘意放好多好多銀芽, 你哋見到既只係小部份, 有好多銀芽放咗係碗底.  不過每次摘銀芽都要摘好耐, 但呢樣嘢我每次都堅持的, 因為我唔鐘意見到有芽菜頭和尾在我的食物裏.  嘻嘻, 呢方面我係比較挑剔. 

我囝囝同我一樣, 嗰日有條漏網之芽菜連住芽菜頭在他的碗中, 佢就用有少少質問既語氣問我:"媽咪, 點解呢條芽菜你冇摘咗個頭去呀?" 俾佢激奀.