日本行(4) - 京都

終於行到清水寺嘞, 有個女僧人化緣喎, 好似細個時睇啲日本卡通片咁.

入面其中一條走廊.

呢樣我覺得好有趣呀, 個柜枱專賣"守", 我諗係平安符之類啩.  有頭痛, 買頭痛, 腳痛買腳痛, 長壽, 學業, 總之要乜有乜, 500 yen 起.

經過個香爐, 煙火鼎盛, 我見到都行遠啲, 因為好怕朕味, 但嗰啲人居然行埋去撥啲煙埋塊面.  可能係我少見多怪吧.

清水寺最獨特就係下面既原木支柱.  如果天氣暖啲, 滿山都有櫻花就會好靚.

再向前行有個應該係專為求姻緣而設的地方, 我哋梗係冇入去喇.

最鐘意呢張相, 啲花好靚.  最愛白色小花.

見唔見有少少櫻花?  天氣凍, 所以未開晒.

行完之後已經腳仔軟, 仲要行番落山, 真係上山容易落山難呀!

攰到行唔郁, 雖然唔肚餓, 但都同波士講要揾地方坐低.  看中呢間舖頭, 店名應該係壹錢洋食啩, 門口上面大大個字寫住既.  呢個就係餐牌嘞, 只賣壹錢洋食, 其餘三樣相信係飲品, 但我唔識日文. 

間店啲裝潢幾傳統, 但有樣好奇怪既, 每張枱其中一個位都會坐咗個舊式時裝店既模特兒 (假人) (Mannequin), 仲係著和服既, 可能已經好舊, 啲頭髮亂亂哋, 好似鬼片裏面既畫面, 睇到都毛骨悚然, 所以我冇影低.  响網上見到有人寫呢間店, 有興趣可以去睇吓啲假人.

呢個就係壹錢洋食喇, 裏面有蝦仔, 蛋, 好多好多蔥, 竹輪和牛肉, 好好味.  食完之後夠晒飽.  依家睇番張相都想再食過.  特別提提千萬不要再加醬料, 因為己經夠咸, 再加就要灌水, 但放心, 店內有免費冰水供應.

食完之後有返少少力, 行返去火車站搭車返大阪. 

晚餐在HEP Navio 上面的一間拉麵館解決.

呢set我揀既, 豬骨湯麵, 湯飲得出豬骨味, 但對我嚟講太濃了, 我比較鐘意清湯.  炸蝦好正, 少啲沙律醬就更好, 餃子好難食, 個芒果布甸就好味.  碗麵有樣最啱我 - 有好多新鮮蔥花, 而且湯裏面唔似喺新加坡食到既加上乾蔥油 (我最最最憎既, 搞到成碗又油又濁).

波士既, 一樣既麵, 不過佢鐘意濃味, 成碗湯飲晒.    我連啲麵都食唔晒.  蝦春卷, 都唔錯.