Wednesday 4 January 2017

兩姊妹首爾行Day3下(廣藏市場, 梨大, 弘大, 豬腳小姐, Cafe de Paris)

2016.11.16

行完梨花洞壁畫村, 原來的行程應該是去食新村炒辣雞.  不過經過兩日餐餐都食咁多後, 已經覺得好滯, 所以第三日就決定食簡單啲.

朝早喺南大門食早餐, 呢日就去廣藏市場食午餐.  離廣藏市場最近的地鐡站是鐘路5街, 壁畫村就喺惠化站, 只是三個站距離, 但要轉線.  要知道首爾的地鐡上落要行樓梯, 轉線又要行好遠.  所以我哋決定唔坐地鐡行路由去廣藏市場.  開住GPS, 跟住韓巢地圖和Naver Map來行, 途中會經過好多民居同地道市場, 都幾得意, 有啲似行深水埗咁.

行咗十幾分鐘, 兩點幾去到廣藏市場. 入面人山人海!



當時已經好肚餓, 第一時間去揾嘢食. 網上話一定要食綠豆餅和麻藥紫菜卷, 於是想先食綠豆餅, 但實在太多人, 所有賣綠豆餅的檔口都滿座.  算啦, 太餓了, 求其揾檔有位就坐底食住啲嘢先.

呢檔賣好多嘢, 有拌飯, 辣雞腳, 餃子, 飯卷, 炒粉絲, 血腸等, 連生八爪魚都有.


細妹想食血腸, 就叫一碟來試.  聽個名都幾驚, 不過食落係OK的.  裏面是粉絲和少少豬血, 外層就係豬腸, 所以會食到豬腸味, 其實好淡味, 可以點粉紅色鹽來食.  這碟六千won.

食完血腸無咁餓後, 可以去慢慢揾最出名的順熙家綠豆煎餅了.  人哋話好易揾, 但我哋都揾咗一陣先揾到.

順熙家只係網上譯名, 韓文是這樣的, 要認住呢個名同個公仔先揾到.

叫了一個綠豆煎餅, 4千won.  平平哋都有送洋蔥同泡菜, 仲有大大支礦泉水任飲.


來個大特寫.  網上咁多人推介, 以為會好好味, 食一啖就覺得大失所望, 好油膩, 又無咩味, 要點嗰碟洋蔥醬油汁先有味. 食到成口都係油, 最尾好似無食晒, 真係太油啦.


食完血腸同綠豆煎餅後, 都唔係話飽, 但就好滯好漏.  不過都去揾埋麻藥紫菜包飯, 幾乎檔檔都有賣, 隨便揀了一檔買了一包, 都幾貴, 3千won.  食咗一舊就食唔落, 最尾拎返酒店做第二朝早餐. 好味嗎? 其實真係無咩特別, 普通gimbap , 只係多了個芥茉醬來點.


跟住喺市場內逛逛, 路中心都有檔口賣綠豆餅, 啲人就咁坐喺度食, 好得意.


市場就好似我哋啲街市, 有菜有肉有魚賣, 仲有乾貨.


行到另一邊有連布都有得賣, 總之就乜都有啦.


之後就坐地鐡去梨大, 主要係細妹想去買skin care 同去Star 101買牛仔褲.  一出梨大2號出口, 就會見到好多街邊檔, 細妹即時買了一杯炸雞和年糕(唔知正確名字), 我試了一舊都幾好味, 不過我對炸嘢無興趣, 細妹就食得津津有味.  點解啲人正餐又食唔落喎, 呢啲零食又食得咁開胃?  我就同佢相反, 只食正餐, 好少食零食.


梨大我至少去過三次, 但細妹第一次去, 都要影番幾張相.


開始入冬, 日照時間好短, 四點就已經日落了.


Star 101是一間連鎖時裝店, 出名平價的, 位於有隻大大隻粉紅色高踭鞋的商場的地下層, 好易揾到. 其實裏面啲衫同喺Goto Mall 見到的差唔多, 但價錢就貴少少(都仲係平).  之前講過個藍色小手袋一模一樣的在Goto Mall賣一萬won , 呢度賣二萬won. 最後細妹都買唔到牛仔褲, 但就買咗兩件衫.

行完梨大就去弘大, 好熱鬧, 比梨大熱鬧好多.


行咗一陣, 對腳已經攰到唔識郁了.  除了在廣藏市場食嘢時坐低, 全日都係行路.  唯有揾個地方坐低食晚飯. 原本計劃是要去食貝殼倉庫食buffet, 當然食到咁滯就唔去啦.  臨時用韓巢app 揾下附近有咩好食, 見到有間食豬手的似乎好正.  去到時六點左右, 已經滿座要等位, 好彩只等咗一陣就有位.

就係呢間Myth Jokbal (미쓰족발), 中文見到有人譯做豬腳小姐, 可能因為佢個logo係隻着住高踭鞋的豬吧.

叫了一個細份的豬腳餐, 只知道有豬腳和沙律.  Menu 上面有紫菜飯, 好吸引, 於是叫了一盆.

點知落單後侍應就先送上一鍋湯和一碟手切麵, 點解會有麵架? 今餐睇怕又係食唔晒了.  啲麵條有彈性, 湯辣咗啲啲, 但其實都好好味架.


紫菜飯, 上面鋪滿紫菜和明太子(?).

每枱都有一包即棄手套, 可以戴上來撈飯和食豬手.  用手撈撈撈再捏成飯團, 一口一個, 超級美味.  就算最後食唔晒, 我都覺得點呢樣係無錯的.


餐餐都會有的小菜, 左邊的是用來配豬腳食的醬料.


主角出場, 好大碟的豬腳.


還有大大碟的沙律, 這枱食物夠震撼了吧. 沙律的醬汁鹹鹹酸酸的, 好開胃.


細妹食了三至四片的豬腳就話食唔落, 成餐淨係食飯團同沙律, 其餘我一個人包, 依家睇番相都覺得自己好勁, 點樣可以食到咁多? 最後食淨咁樣, 係咪好犀利呢? 我連骨頭都吮埋架. 啲豬手滷得好入味, 豬皮好有彈性, 完全唔覺肥膩.  咁多嘢食都係3萬4千won 咋 (~HK$220).


呢餐又再食到捧住個肚, 於是又要再逛下街消化下. 行行下就見到Cafe de Paris, 雖然仲飽, 但都要入去食出名的bon bon系列甜品.


裏面坐位好舒服


芒果bon bon, 好大杯呀! 啲芒果甜到漏, 裏面有忌廉和冰沙, 好正呀!


本來想兩個人share 一杯bon bon, 但收銀話要堂食就要一人叫一杯, 唯有叫多杯綠茶latte來湊單.  喺韓國飲咖啡食甜品其實都好貴, 呢兩杯埋單就2萬2千won.


雖然日日都食好多, 不過都唔怕肥好多, 因為每日都行好多路(閒閒哋2萬幾步一日), 仲行好多樓梯.  好似我哋坐地鐡返酒店, 由乙支路四街站行上路面就要行呢條咁長的樓梯了.


10 comments:

  1. 我估唔到你食到咁多喎

    ReplyDelete
  2. 天氣凍,吃完東西一陣就餓,你那時可能不太凍

    ReplyDelete
    Replies
    1. 仲未好凍, 最凍嗰日都只係兩, 三度左右.

      Delete
  3. 個豬腳我真係流口水,而家都仲流緊!!如果我同你去,一定一人一隻呀!(笑)
    我見到朋友去韓國次次都影D生蟹,燒肉之類... 我反而最想食係你介紹呢個豬手!!
    妹妹係減肥?定係唔食肉?

    ReplyDelete
    Replies
    1. 一人一隻咁犀利? 我都無去食生蟹, 反而覺得呢餐豬手最好味. 細妹怕肥, 同埋佢平時都係食多菜少肉.

      Delete
  4. "正餐又食唔落零食又食得" 我食正餐食同零食, hahahaaa.

    ReplyDelete
    Replies
    1. 我唔鐘意食甜, 又唔食得熱氣嘢(好易喉嚨痛), 所以無乜食零食.

      Delete

Related Posts Plugin for WordPress, Blogger...