Tuesday 10 January 2017

兩姊妹首爾行 - Day 4下(汗蒸幕, 東大門, 回基煎餅一條街)

2016.11.17

去首爾的第四日可以說是體驗韓國傳統文化的一日, 上晝穿了韓服遊景福宫, 下晝就去韓劇裏常出現的汗蒸幕感受韓國人的獨有文化.

原本打算行完東大門傍晚才去汗蒸幕, 後來發現晚上八點前去會便宜點, 而且我們都沒甚意慾要在東大門血拼, 所以就改成下晝去了.

我們去了東大門Good Morning City B3 層的SPAREX (스파랙스)汗蒸幕.  坐地鐡至東大門歷史文化站14號出口, 入到Good Morning City後記得要坐電梯才能到B3喔.

SPAREX收費:
0500-2000  成人 8,000 won, 兒童 5,000 won
2000-0500  成人 12,000 won, 兒童  6,000 won

在汗蒸幕內的前半部份不方便影相, 只能用文字介紹.


先去櫃檯付入場費, 職員就會每人給一套衣服, 兩條毛巾和一條locker key . 之後就行去櫃檯旁的一排排放鞋的locker 找自己號碼的locker (號碼在locker key 上, 鞋櫃和後來的衣櫃都是一樣號碼的), 將鞋放入去.  接就赤腳行入男女分開的浴場.  入到浴場首先會有個賣嘢的櫃檯, 需要沐浴露洗頭水等可以在這裏買.

買了梳洗用品後, 又要去找locker, 找到後就把身上所有的衣物脫掉, 把所有隨身物品鎖起 , 只帶沐浴用品和一條毛巾就可以入大浴場了.  首先要沖乾淨涼, 然後就可以去不同温度的水池浸了.  不知道水是不是温泉還是只是清水, 但水温有好凍的十幾度至最熱的四十幾度.  浸完一陣後就可以學當地人捽老泥, 或是付費由阿珠媽代勞.  我們沒有自己捽亦沒有找阿珠媽, 不過見到很多韓國老婦人在池邊用力的捽, 連腳趾間的地方都會捽的. 浴場內有個桑拿房.

浸完浴後用帶入內的毛巾抹乾身體就可以回到locker區換上他們提供的衣服. 拿着沒用過的第二條毛巾和少量現金, 就可以去男女共用的汗蒸室了.

浸完浴感覺有點渴和餓, 先去食堂買去汗蒸幕都要飲和食的甜米露和雞蛋. 見到右邊的毛巾嗎? 我們學韓劇裏的人捲了羊角帽, 很容易, 戴着影相很有feel.


雞蛋特別香, 可以點附送的鹽來吃.


食飽飽就去逛逛, 可以隨意地瞓在地上.  這些小洞好得意, 不過感覺瞓入面會好有壓迫感.


除了有大廳可以瞓外, 還有這種小房.  地上那些是小枕頭. 那時是下晝, 可能不是睡覺時間, 場內開住電視, 都幾嘈, 好難瞓得到.  所以如果打算坐完凌晨機後去汗蒸幕瞓個覺才去酒店check in 的真的要諗諗, 休息下歇下腳是可以, 但瞓覺就有點難,

汗蒸幕其實是指這些不同温度的土窯, 右邊98度, 左邊108度, 裏面是乾的, 和桑拿不一樣.  我打開門就感受到那熱力, 根本不敢踏入去一步.


這三間温度比較可以接受, 四十幾至八十幾度.

我們入了68度的那間, 裏面是這樣的.  

入完火爐後, 可以入凍房解熱.  不過, 12.8度着住短褲短裇, 太凍了吧.  但居然見到兩個韓國男人在裏面瞓着覺, 佩服佩服!

12.8度房內還有多個寒冰室, 真的結冰的.
還有額外收費的各種按摩服務, 當日見到都好旺場, 好多人在按摩 (隔着玻璃可以睇到).

還有入錢的按摩椅

汗蒸幕真的好好玩, 有機會去韓國一定要試試.

去汗蒸幕有以下幾點要注意:
1. 浴湯入口櫃檯的阿珠媽會好落力叫你買沐浴用品, 即棄底褲等.  我們也差點兒笨笨的買了一套.  不過想想我們沒打算要洗頭, 就只買一包沐浴露就算了.  後來才發現原來裏面是有提供香皂的, 不挑剔的其實連沐浴露都不用買.  即棄底褲買不買就自己決定, 穿回自己的我覺得也無所謂.  阿珠媽不停的說衣服是很多人着過, 不穿即棄底褲很不衛生, 當時聽到一頭霧水, 後來真的見到有強國人沒穿底褲而直接着上場內提供的短褲.

2. 浴場內其實和日本浸温泉好似, 所有人都赤裸裸的.  所以就請大大方方的, 不用害羞,  越是想遮遮掩掩越會引來別人的目光啊.

3. 浴場內是沒有地方放私人物品的, 想貴重物品隨身的話就要自備防水的小袋, 沖涼和浸浴時放在池邊.

4. 沖完涼後有梳洗的地方, 記得有簡單的爽膚水, 潤膚乳液, 棉花, 棉花棒等供應.  不過要風筒是要收貴的.

5. 要穿內衣褲嗎?  這問題我在網上見人問過, 我之前都有相同疑問.  答案是要穿的.  一來着上場內提供的衣服後會去男女共用的地方, 有男人的地方也不好意思不穿內衣吧.  而且如上第一點, 共用的衣服, 不穿內衣褲很不衛生呢.

6. 場內所有費用都是現金收費的.

7. 如果去完汗蒸幕還打算去其他地方影相的話, 建議還是自備卸妝用品和化妝品, 因為浸完蒸完後, 就算沒洗頭, 原本的化妝都會有啲化開.  要以最靚一面見人的話, 就唯有再化過.  我當日咩都無帶, 結果底妝浮晒.



去完汗蒸幕後就隨意地在東大門逛了一陣, 但真的提不起勁在那裏購物.  妹妹買了少少, 我就零收穫.

新的東大門設計廣場(DPP), 我們沒時間入去參觀, 只影相留念.


晚餐就繼續去體驗韓國文化, 我們去了回基站附近的回基煎餅一條街.  這條街上都是煎餅店, 最出名的是姨母家, 很多遊客都會去的.  多遊客去的食店我其實唔太想去, 剛好姨母家滿座, 行了幾間亦都好滿, 唯一有位就是這間在姨母家對面的, 外表夠晒地道.   這間我在網上也見過人介紹的.


裏面極簡陋, 但我覺得這樣才有風味.  店內全是本地人, 旁邊那枱坐了三個男人, 食到一半就出去外面食煙, 煎餅酒等就這樣留在餐枱上, 食完煙又入去繼續食, 店員都唔會理.  換着喺香港新加坡, 早就俾人清枱了.
有樓上位的


店內沒有侍應的, 客人來了就有阿珠媽從廚房出來招呼.  阿珠媽take 完order後就回到廚房裏面煮嘢, 煮好就會送嚟. 阿珠媽只講韓文, 店內的餐牌就是寫在牆上, 也是只有韓文.

來吃煎餅最主要原因是上次去大田時去了韓國傳統酒屋飲馬格烈食煎餅, 好懷念, 所以想再重温下.  這間的餐牌上沒有海鮮煎餅, 但我諗住try my luck, 照叫海鮮煎餅和馬格烈.  我用韓文同阿珠媽講, 佢似乎聽得明, 嗯了聲就入廚房.

等待間好擔心阿珠媽聽錯, 唔知最尾會送咩上嚟. 好彩, 馬格烈和海鮮煎餅都平安送到.

這煎餅超級大塊, 和我哋平時食開的有點不同.  不過我在網上見到姨母家的也是這樣, 可能煎餅一條街上的店的煎餅都是這類型的吧.  這海鮮煎餅裏面只有魷魚, 我諗這店是沒有海鮮的, 只有魷魚, 因為餐牌上有道菜是辣炒魷魚.  煎餅是厚身的, 表面好脆, 不過我嫌太油. 煎餅真的好大塊, 我哋兩個人都食唔晒.

店內還有牛雜煲, 薯仔炆雞, 炒魷魚, 炒豬肉等的菜式, 都是適合送酒的.

這餐盛惠11,000won, 平到笑.  來這裏食煎餅是個不錯的體驗.




14 comments:

  1. 幾年前一位韓國朋友整個一種煎餅俾我食,有辣有唔辣,入面好簡單,都係一D九菜等的蔬菜,因為我地用日文溝通,只知叫"chi-ji-mi"...見佢整好簡單,好好食,但我自己返屋企就整唔到咁好食...請問你所講的煎餅係唔係 chi-ji-mi?

    ReplyDelete
    Replies
    1. 煎餅韓文叫전(jeon), 我上網揾過你講的jijimi지짐이係煎嘢的統稱, 即係煎餅係지짐이的其中一種. 我上次去大田時同韓國朋友講我自己整唔到咁好食的煎餅, 佢都話自己韓國人喺屋企都唔會整到外面食到咁好食喎. 我通常係跟Maangchi 的煎餅食譜嚟整, 你可以試下.

      Delete
  2. 煎餅很大份喎。
    哈哈,我一定唔會去浸溫泉。

    ReplyDelete
  3. 我都試過佢哋啲煎餅好油膩吓,似係半煎炸

    ReplyDelete
    Replies
    1. 我都係鐘意平時食開無咁香脆嗰種, 呢隻半煎炸的太油

      Delete
  4. 我行哂成個東大門,無收穫,D野唔啱我。

    ReplyDelete
    Replies
    1. 好覺得好似行以前的旺角中心咁, 啲衫質素好參差, 亦都混咗好多大陸貨,我完全無心機去睇.

      Delete
  5. 場內提供的衣服唔會洗嘅咩?

    ReplyDelete
    Replies
    1. 梗係有啦, 不過始終都係好多好多人着過嘛.

      Delete
  6. 我都係鍾意去啲細間同本地人去食嘅餐廳仔,好像好食啲,哈哈哈。

    ReplyDelete
    Replies
    1. 雖然小店無靚裝潢, 嘢食又唔會擺靚靚上碟, 但咁先夠authentic.

      Delete
  7. 浸完就走去凍房~~好似好易病咁~

    ReplyDelete
    Replies
    1. 我就唔敢啦, 不過佢哋又唔怕喎.

      Delete

Related Posts Plugin for WordPress, Blogger...