賀年食品

今日年三十, 先同大家拜年.

新年快樂!

萬事如意!

財源廣進!

身體健康!

心想事成!

步步高升!

今日仍然要返半日工, 所以團年飯一切從簡, 照新馬傳統食打邊爐算了. 

每年農曆新年前都好忙好忙, 淨係買餸都要走幾轉先買得齊.  年年都同自己講不如簡簡單單算啦, 唔好攪咁多. 但係最尾都係整呢樣整嗰樣, 都係晚晚唔夠瞓先安落.

今年我終於整好鳯梨酥過年了, 不過只整了一小罐, 只夠自用.  過咗年先再做來送人.  

炒菠蘿饀時, 開油鑊炒蝦片.  既然開了油鑊, 索性炸多樣嘢, 於是就整笑口棗.  第一次整, 都有爆開口, 都幾靚.  哥哥即日食讚好味, 不過隔咗夜就唔脆了.  我諗我加太多水來搓好粉糰, 下次再試.

網上見到Zoe的鹹蛋黃曲奇, 好易整, 又整了兩大盆.  做成細細塊的, 好好味, 可以一塊接一塊食唔停.

星期一晚上整的, 鋼琴老師教完囝囝們後, 貪得意用牙籤劃花, 又幾靚喎.

最後當然有蒸糕bell啦, 蘿蔔糕加芋頭糕, 年廿八晚蒸到成十一點先蒸好, 攰爆. 蘿蔔糕和芋頭糕都是自用和送奶奶的, 所以唔會加蔥, 芝麻等在上面裝飾.

仲差年糕未整, 晏啲有時間就整埋啦.

2016年11月香港行(一)

2016.11.19

我去完首爾後, Daddy就帶囝囝們來香港會合我.  我星期五半夜才到香港, 他們就下晝到, 所以住Disneyland Hollywood酒店住一晚.  我落機後就返屋企瞓, 星期六朝才去廸士尼陪他們玩.

對上一次去廸士尼已經是四年前, 囝囝們再入廸士尼玩勁開心.

兩姊妹首爾行 - Day 5 (昌德宫, 南山韓屋村)

首爾行已經寫到第八篇, 我怕你哋睇到悶. 不過, 悶都要唔可以俾呢個遊記爛尾的.

2016.11.18

在首爾的最後一日, 我本來好想早點起身, 早點出門(睇埋下面就知點解).  但係姨甥女朝朝晨早就morning call我細妹, 喊晒話掛住佢, 我都被嘈醒.  之後再瞓番, 醒時都成九點了.

將所有之前買的生果, 餅等食完做早餐後, 執好行李, check out, 將行李寄存在酒店的自助locker, 終於十點左右出門.

第一站要去在安國站的昌德宫, 入場費每人3千won, 逢星期一休息.

敦化門是昌德宫的正門.

兩姊妹首爾行 - Day 4下(汗蒸幕, 東大門, 回基煎餅一條街)

2016.11.17

去首爾的第四日可以說是體驗韓國傳統文化的一日, 上晝穿了韓服遊景福宫, 下晝就去韓劇裏常出現的汗蒸幕感受韓國人的獨有文化.

原本打算行完東大門傍晚才去汗蒸幕, 後來發現晚上八點前去會便宜點, 而且我們都沒甚意慾要在東大門血拼, 所以就改成下晝去了.

我們去了東大門Good Morning City B3 層的SPAREX (스파랙스)汗蒸幕.  坐地鐡至東大門歷史文化站14號出口, 入到Good Morning City後記得要坐電梯才能到B3喔.

SPAREX收費:
0500-2000  成人 8,000 won, 兒童 5,000 won
2000-0500  成人 12,000 won, 兒童  6,000 won

在汗蒸幕內的前半部份不方便影相, 只能用文字介紹.

兩姊妹首爾行Day4上(租韓服, 景福宫, 明洞)

2016.11.17

來到首爾的第四日, 今次旅程真的好幸運, 除了到埗那天落雨外, 每日都陽光普照.

原本計劃呢朝去麻浦農水產市場食海鮮, 不過細妹話唔想食咁多, 咁就無謂去啦.  於是就改去第一日因為落雨而skip咗的景福宫.

出發前一直都想去租韓服着, 但又擔心天氣凍着唔到.  到首爾後發覺其實都唔太凍, 所以最後都去了租韓服着.  好開心, 完成了心願!

穿着韓服去任何一間首爾內的宫殿都可以免費入場, 省了3千won.

我的那件韓服, 真係好靚呀!  韓服好新, 做工非常仔細的. 租韓服時阿珠媽還幫我綁頭髪.

兩姊妹首爾行Day3下(廣藏市場, 梨大, 弘大, 豬腳小姐, Cafe de Paris)

2016.11.16

行完梨花洞壁畫村, 原來的行程應該是去食新村炒辣雞.  不過經過兩日餐餐都食咁多後, 已經覺得好滯, 所以第三日就決定食簡單啲.

朝早喺南大門食早餐, 呢日就去廣藏市場食午餐.  離廣藏市場最近的地鐡站是鐘路5街, 壁畫村就喺惠化站, 只是三個站距離, 但要轉線.  要知道首爾的地鐡上落要行樓梯, 轉線又要行好遠.  所以我哋決定唔坐地鐡行路由去廣藏市場.  開住GPS, 跟住韓巢地圖和Naver Map來行, 途中會經過好多民居同地道市場, 都幾得意, 有啲似行深水埗咁.

行咗十幾分鐘, 兩點幾去到廣藏市場. 入面人山人海!

兩姊妹首爾行-Day3上 (南大門, 梨花洞壁畫村)

新年快樂!

繼續首爾遊記

16.11.2016

呢朝一早起身(其實係已經幾乎十點)就好興奮, 因為等咗四年終於可以再去南大門食燒餅啦!

四年前去開會時和同事去南大門逛, 見到呢檔賣燒餅的排長龍, 貪得意去排, 原來好好味.  之後就念念不忘呢檔啲燒餅.  後來再去首爾兩次都無時間去南大門行, 所以一直都食唔到.

坐酒店免費shuttle bus去到南大門, 即刻向gate 2前進, 見到檔口前條長龍就知去啱地方.

排了十幾分鐘就買到了, 一個蜜糖味(韓文寫蜜糖燒餅꿀호떡 , 但應該係黑糖), 一個野菜味(야채호떡), 每個1千won.  外皮酥脆, 裏面熱辣辣, 一向唔鐘意食炸嘢的我都食過翻尋味.  其實這種燒餅喺首爾好多街邊檔都有, 不過呢檔係唯一我見過有人排隊, 而又淨係賣燒餅的檔口.