發緊夢

這是復活節當日煮的咕嚕肉。

賣相不俗，加了超甜多汁的新鮮菠蘿，但忘了買青紅椒，用青瓜頂替。

看得出有什麼問題嗎？

薯條

決定開新的一欄來記錄囝囝們的趣事.

噚日我半日安, 因為下晝要帶大佬去睇牙醫. 

星期六幫大佬刷牙時, 發現他下面的兩隻門牙後面生了兩隻恒齒, 把我嚇了一跳.  那兩隻乳齒仍然十分牢固, 萬一那兩個乳齒唔快啲甩, 那兩隻恒齒以後就生在後面又歪歪斜斜, 點算?  立刻叫我奶奶幫我約牙醫(奶奶的金蘭姊妹的囡囡).

噚日見到牙醫, 她說不怕也不急.  恒齒通常都會長在乳齒的後面, 乳齒拔走後, 恒齒就自然會移向前. 不過她檢查後覺得不用立刻拔走那兩隻乳齒, 因為仍然很牢固, 要打麻醉針才能拔.  但既然囝囝每次看牙醫都很合作, 就無謂要打針拔牙嚇親佢.  她叫我哋等到那兩隻乳齒再鬆啲先番再去拔, 到時只需搽少少含麻醉成分的gel就可以輕易拔出.

所以我就白白浪費了半天假, 不過也好, 至少買個安心.

難得可以單獨和我出街, 大佬說要食完下午茶才返家, 於是去麥記.

叫了一個happy meal, 囝囝揀了芝士漢堡, 薯條和美祿.  他食得好開心, 食晒成個漢堡包, 飲晒杯美祿, 之後太飽只食得落幾條薯條.  剩下的薯條他珍而重之的放入紙盒內帶回家. 

離開麥記時, 他用很感激的眼神望住我, 同我講: "媽咪, 多謝你呀!"

能夠食薯條, 對囝囝來說是大事, 因為我平常很少俾佢哋食.  在我家, 零食汽水全都欠奉, 連果汁餅乾都很少有存貨.  我覺得小朋友要由細養成好的飲食習慣, 所以零食, 糖, 朱古力, 汽水, 薯片, 薯條之類的不健康食品我都不會買, 也不讓他們吃. 囝囝們都習慣了, 就算有朋友給他們, 只要是我在場, 他們都會拒絶, 然後說: "Thanks, but we can't eat this." 我不在時, 就當別論了.

薯條拿回家, 等到夜晚食飯時, 他才拿出來.  細佬瞓晏覺唔肯起身, 佢就同細佬講:"Come, come, I show you something special." 跟住佢就將一半的薯條分俾細佬食.  真的很乖!

大佬仲同細佬講: "You have to be a good boy.  If you're good boy, I give you the fries.  If not, I don't give you."

薯條對囝囝們來說是至寶, 大佬居然拾得將一半分給細佬, 證明大佬真的長大懂事了, 而且仲好錫細佬.

清真牛肉餅

最近愛上了在網上買衫，方便快捷，特別適合平常沒空去逛街的人。
上星期訂了兩件OL返工衫，因第一次光顧那店，只訂減價款，就算不喜歡也不怕心痛嘛。特價每件S$9.9 （原價四十幾一件哩），所以買兩件才花了不到廿蚊。但他們的customer service實在令我感動，打開郵包，除了那兩件包裝得很整齊的衫外，還附上一個小信封，裏面有一條手機繩和一封信。信的內容是感謝我光顧，希望我喜歡那小禮物，以後繼續支持他們。那信並不是電腦打印出來的，而是手寫的喲，就為了這一點點的personal touch, 我以後一定會再幫襯。
返正題，上星期五受難節, 在家樂福看到免治牛很便宜, 買了一盒回家.

想起之前看過網友整清真牛肉餅, 就又試試看.

跟了Cherry Poon 的食譜.

食譜說牛肉要打水, 要盡量加多一點出來餡才會多汁.

我乖乖的加了很多水, 然後加調味, 再拼命的攪呀攪, 攪了很久很久都不會起膠, 而且水汪汪, 應該是水加太多了.

水水的牛肉餡超難包!  包了幾個就算了, 剩下的餡扔到雪櫃裏隔天再打算.

包餡包到沒心機, 連擺盆都懶, 隨便拍張照好了.

家庭日@受難節

放了幾日假, 懶蟲又上身, 拖到今日才update.

其實這裏復活節只有一日假期, 只放受難節, 星期一已經要返工.

受難節當日姐姐放假, 我們朝早去完教會崇拜後就去Suntec逛, 去家樂福敗家一輪後就到翡翠食午餐.

食物未上枱前, 囝囝們就用我們的手機打機.

大佬玩類似scrabble的遊戲.

細佬根本不會玩, 但能模模手機也開心.

潮式蒸魚, 鮮蝦雲吞

這是星期日的晚餐, 煮了兩餸一湯, 全都是家人鐘意的菜式.  開飯時Daddy見到枱上的餸即時好開心, 仲叫囝囝哋快點去洗手食飯, 平時他們要三催四請才會埋位的.

當我不想贊熟油時, 就會整潮式蒸魚, 今次蒸黃鱲鯧. 黃鱲鯧本身好重油份, 用來整潮式蒸清清哋就最啱. 用鹹酸菜, 咸水梅, 冬菇, 蕃茄和豆腐(今次我冇落)一齊蒸, 臨蒸前淋上熱上湯(我只用滾水), 蒸熟後滴少少麻油就好香好好味.  如果覺得味道淡, 可以加些少豉油或鹽.  平時Daddy絶對不會主動去夾魚, 今餐却不停的夾, 還大啖大啖的食, 可見他有多喜歡這道菜. 

另一菜只是簡單白灼油菜. 湯是鮮蝦雲吞湯, 用豬肉和蝦仁包了一盆雲吞.

環球影城 Universal Studio

上星期五是我公司的週年慶祝和家庭日, 全公司去環球影城慶祝。朝早八點鐘就要到，聽大大大老闆演講，到十點環球影城正式入場時間時就自由活動。

呢邊環球影城開咗咁耐我都係第一次去, 慶幸以前未去過美國的, 所以冇得比較。

新加坡地方細, 環球影城當然也是迷你型, 如果唔坐rides, 唔睇show, 大概廿分鐘就行完一圈。 但係地方細細都有好處, 只少每個景點之間的距離都好近, 唔怕行到攰。

我和同事們第一時間衝去排隊坐Battlestar Galactica human, 少少刺激, 但實在太短, 90秒左右坐完, 但排隊要成半個鐘.  之後去坐Battlestar Galactica Cylon, 成個人吊住跟住360度轉, 夠刺激, 超正! 可惜也是很短, 90 秒坐完.  真想再坐多次, 但當時已經排長龍, 要排95分鐘先有得再坐, 只好作罷。

响我後面的就係Battlestar Galactica, 鐘意坐過山車既就要認住佢, 千萬不要錯過.

custard puffs

上星期五去了環球影城（遲啲先寫），已經攰到死，星期六下晝整包包，噚日仲要貪靚踩對三吋高跟鞋返教會，結果今日攰到攤攤腰。成身由上到下都痛，手臂病，背脊痛，成對腳都痛。唔認老都唔得，想當年大學時，着住高跟鞋成日都等閒事，依家着半日都唔掂。

講番噚日下晝整的custard puffs, 本來完全無計劃要整的，但為了消滅整包剩下的吉士醬，就整來做下午茶。

以前都是照英國買回來的食譜整的，今次試試日本人寫的食譜，比以前整的要多焗二十分鐘，總共入爐四十分鐘，真怕會焗燶。出來效果很不一樣，以前的發得少啲，裏面仍有點軟軟的。今次的發到只剩脆脆的外殼，每粒都發到很大，所以吉士醬只夠填滿六粒，其餘的存在冰箱，下次再整吉士醬或其他餡料時再拎出來。

腸仔包，肉鬆包，朱古力吉士包，吉士醬包

每個週末都好似唔夠時間用，有太多事想做，一天廿四小時真的不夠用。

休息了七年，最近終於重返詩班，所以每星期日在崇拜和主日學後還要留多成兩個鐘，返到屋企已經成兩點幾，時間仲更加唔見駛。為免星期日趕喉趕命去整包，家陣整包就轉到星期六整。

噚日整了兩批中種包，一鹹一甜。

鹹的是腸仔包和肉鬆包。之前問大佬今個星期要食咩包，我特登用普通話用佢講，佢話：“我要燒狗包”。   我問：“燒狗？” 原來佢係直譯hotdog, 呢邊啲人hot會說燒，譬如“水很燒”，所以他以為hotdog＝燒狗。

甜的是吉士包，今次吉士醬整雙倍份量，可以整多幾個包。將吉士醬分少少出來，加入朱古力粒做成朱古力吉士醬。早知唔好唧朱古力吉士醬上包面，好醜樣,  不過朱古力吉士醬好好味, 囝囝一定鐘意。

噚日總共整咗廿六個包包，手軟腳軟呀! 

枝竹紅蘿蔔炆柱候牛腩 (附做法)

昨天有幸去了Resorts World Sentosa, 鄉下妹的我可是第一次去哩.

原來去RWS有另一個通道, 不用付入島費 (平常去聖淘沙好像要每人付兩元(?)的入島費).

別誤會, 我是不會花一百塊進賭場的, 何況我從來不賭.  去那裏是要開會, 活動範圍就只在其中兩個Ballrooms.  太多公司高層在, 帶了相機也不好意思拿出來拍照.

或者RWS是馬來西亞的雲頂集團經營, 室內裝飾很"馬來西亞", 有點"娘", 完全沒有豪華高貴的感覺.

昨天的會包早餐, morning tea break 和午餐, 吃完三頓我還覺肚餓, 食物質素就不用我多說了吧.

這是星期六晚煮的柱候牛腩, 忘了買白蘿蔔, 用紅蘿蔔來代替.  其實我也沒買牛腩, 只是急凍牛展, 但這次買到的很多筋, 炆完又滑又多汁. 

炆之前和媽咪傾電話, 我話"今晚炆牛展, 放埋腐竹". 媽咪即刻話"吓, 腐竹定枝竹呀?"  Oops, 應該是枝竹.  點解我會說腐竹? 因為這裏沒有腐竹和枝竹的分別囉.  煲糖水一片片的叫腐竹, 一枝枝用來炆的也是叫腐竹!

做法:

1. 牛腩(牛展)原塊飛水, 切成小塊.

2. 燒紅鑊, 下油, 爆香薑片, 蒜頭(原粒略拍), 蔥頭(原粒略拍)和蔥白段, 加入適量花椒八角爆香, 加入牛腩兜至每舊牛腩的表面都轉色, 贊酒, 加入柱候醬, 甜麵醬, 兜勻, 加水(蓋過肉), 水滾後轉細火, 加入一點冰糖, 加蓋炆至牛腩夠腍, 中途要睇火和加水.

3. 炆至中途才加入紅蘿蔔, 待蘿蔔夠腍時加入枝竹炆至牛腩夠軟身 (太概兩個鐘頭), 試味, 如有需要略加生抽, 勾芡上碟.

註: 不同牌子的柱候醬鹹度各異, 請自行試味.  我大概500g牛腩用1.5tbsp柱候醬和大半茶匙甜麵醬, 兩小粒單晶冰糖.  今次的紅蘿蔔很甜, 連帶炆完的汁也稍嫌太甜, 所以額外加了少許生抽和鹽.

肉醬意粉

最近幾日懶蟲上身，有點不想寫blog.

昨天因為有維修工程，家裏下午三至五時停電。這邊天氣這麽熱，囝囝們又怎能忍受沒有風扇的兩個小時，所以我請了半日假帶他們出去。

一開始停電我們就出門，開車去宜家。先把囝囝們安置在兒童游戲室，我和姐姐就去對面的Anchorpoint血拼。飾物有減價，快快選好要還錢時，宜家打電話來：”你的小兒子在哭，說不要留在這裏“。以為可以有點自由時間，最後還是要把細佬帶在身邊。大佬和其他小朋友玩得很開心，要繼續留下來玩。

我們帶着細佬又過天橋回去Anchorpoint繼續血拼，最後我買了三條褲，六對耳環和兩條頸鏈，很滿足的回去宜家領大佬出來一起去食tea. 

過完一個盡興的下午，回到家已經幾乎六點。晚餐都完全沒準備，於是叫姐姐煮意粉，快捷方便，反正囝囝們和Daddy都鐘意。

昨天煮的是煙肉車厘茄鏍絲粉，沒影相。

下面的是肉醬意粉，是姐姐幾個星期前煮的。

姐姐剛來我家時是不吃意粉的，後來教她煮蕃茄醬，現在煮得似模似樣，味道和我煮的一樣。

我開玩笑的跟她說：“以後你回印尼可以去開一間cafe賣chiffon cake, muffins 和簡單的意粉”。想不到她很認真的說她就是有這個打算， 哈哈，如果她以後真的開得成，我這個師傅也有點功勞! 

金華火腿鮮蝦炆魚肚, 海帶瑤柱排骨湯

囝囝們上星期四開始病, 連我都被感染, 星期五和六晚都有少少燒. 

今日全家都好得七七八八, 只剩細佬仲有傷風咳.  細佬可能因為咳和鼻塞, 夜晚瞓唔好, 連累我都冇覺好瞓, 所以今日好攰.

噚日亦都好攰, 所以唔想用腦諗煮咩餸, 隨口叫姐姐煮炆魚肚, Daddy 和囝囝們都好鐘意食的.

姐姐今次冇用罐頭雞湯, 自己用豉油, 糖, 魚露來調味, 加埋金華火腿, 魚肚吸晒啲鮮味, 可惜姐姐落魚露時重手咗少少, 稍嫌鹹咗啲啲, 不過送飯食都尚可接受.

煲了海帶瑤柱排骨湯, 湯裏還加了綠豆, 扁豆, 赤小豆和紅蘿蔔, 好甜好鮮味.  我諗呢煲湯應該係清涼下火作用, 因為有海帶和綠豆, 實際上我唔太清楚, 煲佢只因好味.

因為我實在太攰, 又忙着整麵包, 成餐都是姐姐煮的, 所以湯裏面有浮油.  如果我煲, 我會煲至中途開始間中撇走浮油, 因為我好怕湯太油. 

菜薳牛肉

兩個囝囝都發燒傷風咳，害我晚上不能睡好，現在好累。

連續寫了幾篇麵包蛋糕, 怕你們以為我只會用焗爐, 我也是會煮飯的, 只是星期一到五要返工, 廚房才讓了給姐姐.

上星期六煮的晚餐, 主菜是菜薳牛肉.

這是我最愛吃的菜式之一, 以前小時候家裏常煮的.  可惜, 在新加坡這菜就變了特別日子才能吃到.  因為這裏牛肉不是這麼容易買到, 很多本地人都不吃牛肉, 所以不是每間超市都有得賣.  在街市賣牛肉的通常都是馬拉人, 賣的也是冰凍牛肉, 而且馬拉人一般都是用來炆, 不會炒, 所以不會幫你切片的.  在超市賣的大部份是給人用來煎牛扒, 買來炒好像有點大才小用, 薄薄的一片要切片也不容易.

好長的廢話, 回正題.  這次買的是超市的急凍牛肉片, 牛肉味道是有, 但那個切牛肉的人切錯了, 所以有點韌.  下次還是買一大塊回來自己切比較好.

不自量力 - 士多啤梨卷蛋

整了幾次成功的卷蛋後, 有點沾沾自喜, 自以為已掌握好了技巧.

見到Honney整了漂亮的士多啤梨卷蛋, 以為憑自己的功夫應該沒問題.

星期二晚教會小組來我家聚會, 於是就想做一條士多啤梨卷蛋給他們作聚會後的茶點.

星期一放工後立即焗蛋糕, 用回上次 dark brown sugar swiss roll 的食譜.  蛋糕焗出來很厚表面很平滑, 以為會比上次更好, 但入膠袋放涼後, 表面就變成皺皮.

跟着打開雪櫃拿淡忌廉來打發, 居然... 僅餘的一小包淡忌廉是過期的!  點算? 想起在冰格還有給我遺棄了多時的甜忌廉, 雖然我越來越抗拒用人造甜忌廉, 但沒選擇下就將就用用吧.

上次的蛋糕放涼後表面也是有少少皺皮, 以為卷起就會拉平, 但今次卷起了還是皺皺的.  唉, 真是不自量力, 早知做反卷就好了.  不可以因為有少少成功就自滿，我要繼續向其他高人虛心學習!

外皮皺皺的, 實在礙眼, 就把剩下的甜忌廉在上面唧花再放上士多啤梨.  姐姐說像怪獸, 我也覺得! 

肉鬆包，吉士醬包

今個星期六整了兩款麵包，一鹹一甜。

既然買了豬肉鬆整蛋卷，順便用來整麵包給囝囝。

問囝囝要肉鬆放在包面或包在裏面，他選包在裏面，更好，不怕邊食邊把肉鬆掉到地上。中種法做的麵包特別鬆軟有彈性，不是我自賣自誇，這包真的很好吃。

蒽花肉鬆蛋糕卷

見Samwei整了蒽花肉鬆蛋糕卷, 原來卷蛋都可以有鹹味。 卷蛋有蒽花在面, 賣相已經好吸引。

貪新鮮的我, 第一時間去買豬肉鬆, 上星期五晚就試整。

靚仔啊!  還很好吃哩!

卜卜脆燒腩肉

昨晚焗了我最愛的燒肉, 腩肉從Mmmm買, 一大片足有斤半重.

一向都照T&P的做法, 但可能是要放一層鹽在皮上面過夜, 豬皮焗出來有時會好鹹.

今次決定試試不鋪鹽, 豬腩肉搽上醃料後, 用豬插在皮上刺孔, 然後放雪櫃過夜.  第二日下晝將腩肉取出, 吊起風乾.  為了確保皮夠乾, 焗之前我還用吹風筒來吹豬皮.  入爐前搽少少醋.  不確定是那種醋, 家裏有淅醋和白醋, 每樣搽一次, 沒錯了吧.

入爐兩分鐘後, 皮已經爆得很厲害, 放上層fan grill八分鐘後, 見皮已經焗好, 就轉下層180度焗55分鐘.  旁邊有少少燶的, 不怕, 用小刀刮幾下就好了.

結果, 今次實驗算合格, 下次不用鋪鹽了.