環球影城 Universal Studio

上星期五是我公司的週年慶祝和家庭日, 全公司去環球影城慶祝。朝早八點鐘就要到，聽大大大老闆演講，到十點環球影城正式入場時間時就自由活動。

呢邊環球影城開咗咁耐我都係第一次去, 慶幸以前未去過美國的, 所以冇得比較。

新加坡地方細, 環球影城當然也是迷你型, 如果唔坐rides, 唔睇show, 大概廿分鐘就行完一圈。 但係地方細細都有好處, 只少每個景點之間的距離都好近, 唔怕行到攰。

我和同事們第一時間衝去排隊坐Battlestar Galactica human, 少少刺激, 但實在太短, 90秒左右坐完, 但排隊要成半個鐘.  之後去坐Battlestar Galactica Cylon, 成個人吊住跟住360度轉, 夠刺激, 超正! 可惜也是很短, 90 秒坐完.  真想再坐多次, 但當時已經排長龍, 要排95分鐘先有得再坐, 只好作罷。

响我後面的就係Battlestar Galactica, 鐘意坐過山車既就要認住佢, 千萬不要錯過.

跟住去Revenge of the Mummy，外面都好吸引，外面個牌寫住等候時間為25分鐘，比起Battlestar Galactica都快好多，就試試啦。外面入去好似無人排隊，點知條長龍原來收埋喺入面，彎來彎去都見唔到盡頭。 最尾排咗成個鐘先坐到嗰分零鐘既室內過山車，不過好彩個過山車都好玩，有啲unexpected, 裹面黑麻麻見唔到嘢，架車就好快咁衝來衝去，幾刺激， 有啲似Disney的Space Mountain。如果淨係可以揀兩個rides，我會揀Battlestar Galactica Cylon 同埋呢個。

跟住想去睇4D Shrek show，但個牌寫要等一個鐘，梗係唔睇啦。冇得睇，同Shrek影張相算啦。

正在猶豫要去邊時，有職員嚟招我哋去睇Donkey Live Show, 等五分鐘咋，就豉單啦。入到去先知原來俾人呃，極度無聊的show, 唔知點形容啦，總之就係超級白痴，你哋千祈唔好被呃呀， 冇人入去所以先要出嚟坤人入去咋。

俾隻Donkey呃完後，決定先去醫肚。有好多選擇吓，價錢都算相宜，至少俾廸士尼平。我哋揀咗喺Madagascar裏面的Marty's Casa Del Wild，主打咖喱. 我叫beef rendang, 加杯汽水S$15.80, 牛肉炆得好入味，又腍，好味!

另一同事叫了Thai red curry chicken 加冰沙，S$15.30. 同事話好味喎。

食飽飽唔可以即刻去玩，就周圍逛逛。呢幾隻Donkey同火龍混種BB好得意。

全日排隊排得最甘心就係排隊同Puss影相，直頭好似粉絲見到偶像咁興奮！我“登”扮Puss 的人辛苦，大熱天時着住咁厚的衫。

之後周圍都排超長龍，求其揾啲短些少嚟排。呢個叫Enchanted Airways的兒童版過山車都照殺。雖則話係兒童版，其實都有少少刺激，我諗我囝囝玩唔到。

當日熱到飛起，又要晨早起身到場，所以三點幾已經投降番屋企。不過走之前都要重捨吓童真坐埋個氹氹轉(King Julien's Beach Party-Go-Round，排隊時我落足眼力去揀坐邊隻動物，最尾俾我坐到我要的獅子。都話重捨童真，梗係要做V手勢啦。

之前去過的同事話其實平時(星期二至四）去，所有嘢都最多等廿分鐘就得。嗰日可能因為我哋自已公司都咁多人，再加上自費入場的人，所以成個影城擠滿人先要等咁耐啫。可以考慮平日帶囝囝哋嚟玩，咁我就可以玩多幾次Galactica。
嗰日返到屋企攰到趴喺度，夜晚九點就叫囝囝哋入房，祈禱後我話我太攰要瞓，叫佢哋自已搞掂。我入房鎖埋門，細佬就响外面敲門喊晒要我陪佢。估唔到大佬好叻仔，佢就同細佬講：“媽咪好攰喇，你俾媽咪休息啦，嗱，哥哥讀故事書你聽啦”。跟住細佬就跟大佬入房睇書，我就昏迷去了。到十點，大佬望吓個鐘，同細佬講：“十點喇，我哋瞓覺嘞“。咁細佬又好聽話咁上床瞓，大佬就熄燈，所以Daddy返到屋企時（佢嗰晚有應酬）全部人都瞓晒。大佬真係抵讚，大個仔識得照顧細佬哩。