Monday 6 June 2016

天津(1): 狗不理

上星期去了天津開會, 因為新加坡沒直航往返天津(廉航Scoot有直飛, 但唔係每日有), 要坐國泰去香港再轉港龍(其實是Air China 機).  上午6.45班機, 所以四點要起身, 攰爆.

好彩班機overbooked, 我幸運地被upgrade去商務位. 不過呢班機是舊機, 商務位實際上較似premium economy. 早餐先上水果盆和麵包, 麵包好味. 之後可以揀yogurt 或粟米片, 主菜就有奄列或粥. 我揀粥, 好杰撻撻, 我最憎食咁杰的粥.



我一到香港機場又去揾嘢食, 因為之後要坐Air China, 肯定無啖好食, 而且夜晚我諗住早瞓, 午餐食到飽, 之後求其食都得. 揀了翠華, 叫個沙嗲菜薳牛筋腩和一杯奶菜, 盛惠HK$106, 貴到飛起. 味道OK, 但白飯居然係一pat pat的爛飯.


Air China 機上有午餐供應, 我要了海鮮飯, 不出所料, 勁難食, 好彩我在香港機場食飽了.

天津機場似乎很少人飛去, 我到時就只有我坐的那班機, 機場空空的, 連燈都只開一半, 暗暗沉沉的. 之後上了的士去酒店, 的士上沒冷氣又沒安全帶, 司機全程玩飄移, 我只好不停默禱求主保守. 還要踫上繁忙時間塞車, 足足一個鐘頭才到.

今次住的是Marriott 屬下的Renaissance Tianjin Lakeview Hotel, 中文名勁難聽"天津賓館". 房好大好大, 床上面點解要有六個枕頭咁多呢?


 溶室又係好大, 好新好乾淨
 好多酒店浴室內的燈光都不適合化妝, 但呢間就無呢個問題, 還有可着燈的放大化妝鏡, 好方便.
 大大個浴缸, 可惜我連瞓覺都唔得閒, 根本無時間去好好利用.
Unpack完行李後,本來打算叫room service 在房裏食, 然後早點上床, 因為真的好攰.  不過同事們叫我一齊去食, 於是就下樓和他們會合. 當時一大班外國教授正要上小巴去食飯, 我怕被叫去, 於是等了一陣, 然後才偷偷地行去酒店旁邊準備上同事朋友的車, 結果仍然避唔到, 被眼利的天津教授見到, 過來拉了我上小巴和其他外國教授去食飯.  嗚嗚嗚.... 我好眼瞓, 真係唔想去應酬呀, 而且我着住casual 連身裙腳踏涼鞋, 人家個個着老西.

我們去了這間聽講好出名的狗不理, 門面古色古鄉, 一入門口還有張龍椅給人影相. 一班老外輪住坐龍椅影. 影一大輪才捨得入廂房.
菜式沒什麽特別, 只影了幾樣.  秋葵二食.
每碟菜上時侍應都會介紹, 但濃重的口音又講得快, 我一個字都聽唔到. 呢碟應該是牛肉.
右邊的是狗不理包子, 裏面很油, 普通肉包味道, 吃不出有何特別.
七年前去天津開會時都領教過這種酸辣湯, 只是清水加蛋花, 一啖起兩啖止.

好大隻的蝦, 望落夠大體, 可惜鮮味失奉, 煮老了肉好嚡, 還付送大大條黑色泥腸.
典型內地宴客模式, 叫到成枱餸, 根本吃不完, 太浪費.
最後食完成十點幾先返到酒店, 朝早四點起身捱到咁夜,好攞命.

10 comments:

  1. 嘩!四點起床趕飛機!十點先返酒店!實累到爆呢

    ReplyDelete
    Replies
    1. 出差就係咁架, 所以我好怕出差.

      Delete
  2. 咁古怪Lazy Susan上放咗咁多公仔.

    ReplyDelete
    Replies
    1. 我哋覺得怪, 但啲鬼鬼睇到覺得好有特色, 影好多相添.

      Delete
  3. DD 最怕就係去中國,要應酬真攞命

    ReplyDelete
    Replies
    1. 除咗應酬仲有其他方面好恐佈

      Delete
  4. 我發覺大陸通常名氣大嘅老店,都唔好食

    ReplyDelete

Related Posts Plugin for WordPress, Blogger...