記得小學一年級中文書第一篇開頭就係呢兩句, 下面係乜就唔記得喇.
噚日係呢邊的開學日(新加坡幼稚園至預科都係一月開始新學年的), 兩個囝囝都返新學校. 哥哥開始小學生涯, 細佬返幼稚園Nursery 1, 所以我和Daddy請假一日嚟倍太子們開學. Daddy陪哥哥, 我陪細佬.
呢邊啲小學係倒"塔"咁早返學的, 七點半開始, 咁哥哥就要六點三十五分落樓下等校車. 一早六點就剷醒哥哥, 天都未光就要佢食早餐, 因為唔食早餐的話, 放學返到嚟成兩點幾會餓扁.
第一日返學, 我和Daddy一齊送佢上校車, 跟住我就開車送Daddy去間小學度"陪"哥哥返學嘞 (校車唔俾家長一齊上車). 其實所謂"陪"只係叫啲家長留喺一個指定位置離遠咁望啲細路咋, 所以陪唔陪都分別唔大. 叫咗Daddy响學校幇佢影番啲相, 但Daddy話離太遠影唔到.
第一日返學俾佢試吓自己買嘢食, 所以冇預備麵包俾佢帶去. 學校安排每個小一生都有一個五或六年級的師兄照顧, 個師兄小息時間就帶哥哥去買嘢嘞. 學校飯堂有好多檔架, 好似hawker centre咁, 有雞飯, 西餐, 麵, 飲品之類. 結果, 佢噚日用咗S$1.60, 買啲咩呢? 一杯蘋果汁, 一杯啫喱和一杯美祿, 全部都唔飽肚既, 俾佢激死! 佢一向唔受得甜和凍嘢, 返到屋企就係咁咳, 所以噚日下晝我就即刻整啲腸仔包俾佢今日帶返學食, 亦同佢講明今日唔準買嘢!
唔明呢邊啲校服點解咁奇怪, 條褲係冇橡筋頭亦唔可以帶腰帶的, 只靠褲頭兩邊兩粒紐嚟較鬆緊. 前一晚幇佢改三條褲, 改咗我鬼咁耐, 褲頭有好多層布, 支針好難至篤得入架.
送完Daddy去間小學, 我又要調頭返屋企陪細佬上校車. 幼稚園校車冇咁嚴, 俾我陪佢上車. 細佬以前日日送哥哥上校車時都話要返學, 依家終於輪到佢, 勁興奮哩.
入到班房初時要我陪响佢旁邊, 後來開始玩玩具, 我就靜靜走出班房外面.
玩一陣玩具就去食堂食早餐, 一人一碗粥, 細佬好叻, 自己食. 佢旁邊個光頭仔好犀利, 好快就食完一碗要再添, 但有啲細路就要老師餵, 或者完全唔肯食.
食完嘢就去花園淋花, 有水玩, 細佬幾開心, 已經唔再在意我有冇喺附近.
返班房聽故事, 佢大部份時間响度玩佢掛喺頸上的name tag.
講完故事就到唱歌跳舞, 佢即時成個生猛晒, 又唱又跳.
頭兩日只係俾佢哋適應吓, 只返兩個鐘頭, 聽日就要返足四個鐘喇.
放學喇, 啲小朋友要排隊等校車.
細佬話返學好開心, 放學之後都係咁話佢要返學喎.
我要講: I'm so proud of my boys!
佢哋兩個都好叻, 轉新環境都完全冇問題, 細佬一滴眼淚都冇流添.
F
ReplyDelete