香港台灣之旅 - Day 2-4

2018年一開始就諸事不順, 心情一直都麻麻.

每次開了blog 想寫, 寫幾句又放低了.  這篇一月第一個星期寫的, 寫了一半就停.  今日要起心肝寫完.

Daddy今年上半年會常常飛, 前個星期就飛了, 下個星期才回來. 然後二月過了農曆新年又飛,  唉...

我要自己攪掂兩隻馬騮, 新來的姐姐又勁唔醒目, 我幾乎日日放工都仲要顧好多嘢, 所以真係好攰好煩. 公司嘢亦令我好煩, 2018年應該係唔容易的一年.

26.11.2017-28.11.2017

星期日朝早約細妹一家去牧牛餐廳食早餐.  牧牛的炒蛋炒得好滑, 囝囝們每次都要去食.

早餐實在太大份, 食完飽到午餐都食唔落.

下午茶時間撇低了三仔爺, 和中學同學聚舊.  好難得約得到齊人出來一聚, 三十幾年舊同學了, 仍然好好傾, 說說笑笑就幾個鐘.

本來晩餐打算去街市買餸回家煮, 但和舊同學傾得太耐, 唯有出街食.  細妹說大角咀市政樓上熟食中心的大牌檔食物很不錯, 就去試試.  我還是第一次在熟食中心的大牌檔食飯呢, 星期日晚好旺, 幾乎滿座.

大大煲的支竹羊腩煲, 媽咪最鐘意食的. 跟煲還有一大堆菜, 有西洋菜, 生菜和另一樣忘了什麽菜. 照片是剛上枱仍未滾起時影的, 勁大的一煲, 超多料, 最尾都食唔晒.

雜錦豆腐煲, 細細煲但料多到滿瀉, 有豬肝, 豬腰, 鮮魷, 土魷和肉片, 好好味, 抵食.

生炒排骨, 唔錯.

雖然是大牌檔, 服務都算幾好, 哥哥要用羮叉和碟 (不慣用碗筷), 阿姐們都有求必應.

星期一在樓下的茶餐廳食早餐, 食飽飽才出發去海洋公園.

依家有地鐡直達海洋公園, 真的方便好多, 好快就去到.

海洋公園去了好多次, 所以影好少相. 今次去發覺比上次去多了好多大陸遊客, 一車車一團團咁到, 好嘈, 排隊又打尖, 令到我哋都不想久留.

玩完返到屋企媽咪已經煮好飯了, 美味的住家餸.

星期二約了Daddy在香港的同事食飯, 我帶囝囝們跟着去, 因為他們在灣仔食飯, 我們可以順便遊電車河和坐天星小輪. 特別鐘意坐電車和小輪, 每次回港都要坐的.

坐完電車行去碼頭坐天星小輪, 途經IFC, 我這大鄉里居然從未入過IFC, 反而Daddy因為前幾年常來港公幹, 所以好熟路, 於是就由一個新加坡人帶香港人妻去行IFC.

IFC的聖誕佈置有這個小時候去fun fair 都會有的玩意, 囝囝們玩得好開心.

剛好天朗氣清, 維港景色真美.