酥炸生蠔

噚日嗰單嘢, 我越諗越氣頂.  雖然我知唔應該含怒到日落, 但呢啖氣真係噚晚下完, 今日諗返起又上番.

因為咁, 今日都冇咩心情做嘢, 尤其仍然要繼續做關於個合作項目既嘢.  雖然對方態度差, 又唔願俾錢, 但答應得既我都會盡力去做到最好, 我唔會學對方咁唔專業既, 只不過邊做邊會充斥着負面情緒.

廢話講完, 今日要寫酥炸生蠔, 其實係酥炸蠔仔, 因為啲蠔好細.  我今次只係實驗性質, 隨便在超市買包急凍蠔仔嚟玩下.

某一上youtube揾嘢時, 無意中揾到個酥炸生蠔的video.  好簡單, 於是抄低來試試.

最重要其實係個粉漿, 點樣先可以做到酥脆呢? 原來要用幾樣粉撈埋, 照着做炸出來真的非常酥脆, 就算凍咗都仲脆, 完全冇變腍.  下次要買大大隻的蠔來炸, 會更好味.

剩下的粉漿用來炸百靈菇, 仲正.  咬落去外面卜卜脆, 但裏面的菇菇卻好多汁, 好甜呢. 

我炸嘢一向麻麻, 所以樣唔太靚, 但呢個粉漿做法真係好掂好脆, 大家不妨試試.

Video link: http://www.youtube.com/watch?v=eujkNgeaBok

酥炸生蠔 (都市閒情- 上門教煮餸)

生蠔   1 斤
粉漿:
麵粉  90 g
粟粉  6 g
澄麵  12 g
發粉  9 g
生油  45 g
水 105 g

做法:
1. 生蠔用生粉洗淨, 煲內加水, 薑片和少許酒, 煮滾, 加入洗淨生蠔, 汆水至生蠔邊開始卷起, 撈起, 隔水, 用廚紙印乾.
2. 生蠔用粟粉, 鹽, 糖略醃.
3. 將粉漿材料混合成粉漿, 生蠔沾粉漿落油鑊炸至金黃色, 即可上碟.