Wednesday 29 September 2010

病菌...遠離我!

自從由香港返嚟就開始感冒, 兩個星期仍未完全清. 

喉嚨痛, 跟住發燒, 之後開始咳, 醫生睇咗三次, 抗生素都食咗兩種, 感冒葯, 咳水, 化痰葯食完一樽又一樽, 食葯食到渾渾沌沌. 

今日終於覺得精神返, 喉嚨唔痛嘞, 不過都仲咳.  醫生話要戒食生果, 希望快啲唔咳, 冇得食生果好辛苦.

因為病, 所以冇心機寫blog和巡blog. 

噚晚細佬落樓梯冇捉住扶手跌倒, 我抱起佢捽佢個頭. 

哥哥本來坐响枱度寫緊字, 放低筆就話: "弟弟, 哥哥's coming over".

哥哥行到埋面前時, 細佬就好嗲咁指吓個頭示意撞到頭, 哥哥就摸吓佢個頭, 跟住就話:"Come, hug hug".  兩個就攬埋一齊, 又攬又錫, 好鬼sweet.

好感恩兩兄弟咁相親相愛.

呢張係細佬四個月大時影的.



Thursday 23 September 2010

公幹@Manchester

今朝收到個消息, 一個大學同學啱啱昨日過身, 才三十幾歲, 留下三個年幼細路, 太突然.  希望她的家人節哀順變, 願主安慰他們.

時光倒流番去九月五日到八日.

本來唔諗住寫呢次公幹, 但因為全程過得好開心, 都寫一寫留紀念啦.

今次我哋有七個人同行, 柴娃娃的, 似去旅行多啲.

坐新航經Munich去Manchester, 在Munich的一個小時, 全部人要留喺機上.  到Manchester時才朝早八點幾, 在機場等另外兩個坐英航的同事, 再坐火車去市中心, 到埗時才未到十點.  酒店要兩點先可以check-in, 放下行李, 一行人諗住去飲早茶, 點知原來嗰邊酒樓要十二點先開, 咁去shopping 先啦.  因為星期日, 所有舖頭要十一點先開, 咁我哋成班就只好响市中心閒遊蕩.



Manchester 都有摩天輪喎.


Wednesday 22 September 2010

Daddy 生日 2010

祝大家中秋節快樂!

今日中秋節, 一早起身已經覺得興奮, 因為由細到大都好鐘意過中秋. 細個外婆會買用膠籃裝住的豬仔餅給我們, 跟住全家會去球場玩燈籠食月餅生果, 好似去野餐咁, 好開心.  陣間完晚飯就帶囝囝去樓下玩燈籠食月餅, 好期待呀.

先講番噚日Daddy的生日慶祝, 之前一晚焗了日式芝士蛋糕, 上次佢話我整個心型俾同事都唔整俾佢, 今次就整個大大心型補數.  草草作裝飾就算, 因為成個weekend都病, 冇機會去作好準備, 不過睇在係Daddy份上, 用上好矜貴由香港買番嚟的朱古力生日牌.


生日晚餐的材料是前一晚臨急臨忙在Cold Storage買的, 買了兩塊Rib eye, 一塊striploin, 仲有雞脾.

牛扒用來整steak au poivre, 淋上紅酒汁, 配new potatoes和四季豆.  Rib eye 又淋又好味, 只略略撒上少少鹽已經夠味.  New potatoes 烚熟加olive oil, parsley 和鹽拌勻, 甜又淋.


Tuesday 21 September 2010

甜蜀米

今天是Daddy生日, Happy Birthday to Daddy! 

噚日漏夜整蛋糕, 今日放工早啲走返去煮Daddy至愛的牛扒餐, 聽日先post個生日蛋糕同晚餐.

講番噚日被大老闆點咗去一個meeting, 要去Yishun新開既Khoo Teck Puat Hospital, 山長水遠, 由公司開車去足足一個鐘先到.  個會既內容同我做既嘢係完全九唔搭八, 但俾人arrowed就唔可以say no.

好彩噚日討論既嘢都好有趣, 成個會兩個幾鐘都唔悶.

開完會之後, 個CEO仲帶我哋參觀間醫院.

呢間醫院好靚, 設計好好, 仲好綠化, 有大量植物, 每個病房的窗外都種了植物, 我諗病人見到都會精神啲.  間醫院外觀完全唔似醫院, 感覺似一間大專學府, 好舒服吓.  天台有solar panel, 用太陽能來供應部份電力需求.  Basement都有花園, 還有蝴蝶, 蜻蜓等的繁殖處添.

最精彩係天台有花園和果菜園, 真的有靚蔬果呢, 見到有車厘茄, 蕹菜(空心菜, kankong), 辣椒, 茄子等等, 全部都又靚又新鮮, 真正有機種植.  個CEO對每一棵植物都非常熟悉, 如數家珍咁一樣一樣介紹, 仲即席摘了幾支蜀米給我們試, 每支都好靚.  即剝即食, 原來蜀米可以生食, 仲好甜好多汁添.  佢就係响呢幅田度摘俾我哋, 上面一片片的便是solar panels.  我偷偷影了一幅相, 唔好意思再影.

呢啲果菜園係由住喺附近的志願人士(volunteer)去負責種植的, 而且係開放俾公眾入內參觀的,有興趣去開北面可以入去睇吓, 聽講夜晚有人去嗰度天台花園拍拖添.

雖然最尾搞到成六點幾先可以離開, 但我一啲都唔介意, 個會既內容都好有意義, 參觀新醫院亦都令我大開眼界.

衰在回途中轉錯一個彎, 去咗舞雷公咁遠先可以掉番轉頭, 跟住仲要去Cold Storage買今晚的牛扒和配菜, 返到屋企成八點, 整得蛋糕嚟成十一點幾.

Monday 20 September 2010

一啲都唔似既Outback dark bread

由香港返嚟兩日就開始病, 成個weekend都渾渾噩噩地過, 大部份時間都瞓响床上.

噚日我沒去教會, 自己仍未好番, 無謂出去撒播細菌.  趁Daddy番教會時, 快快趣試食譜. 

如果你哋有去過Outback Steakhouse的話, 一定會試過那裏的dark bread, 用來搽牛油, 超級回味.  在網上揾到一個無添加食素的食譜, 要用dark molasses 和rye flour, 呢兩樣都要去大超市先買到.

可能用了molasses, 麵糰勁痴手, 好難操作, 噚日未病好仲有啲手軟腳軟, 簡直攞苦嚟呻. 

一半用來整loaf, 另一半加cranberry給囝囝做呢個星期的茶點.  學Mommy Dearest整Mickey Mouse, 不過耳仔太細, 似熊仔多啲.  懶搽蛋液, 所以面層啞色.


未入爐未放朱古力粒前兩個囝囝經過見到, 大仔嗌:"Yeah, Mickey Mouse", 細仔嗌:"Yeah, Elmo". 

一出爐大仔就話要食, 跟住話: "Mommy, I like the rye bread".  吓, 佢點知係rye bread? 佢話睇到我個食譜名喎.  家陣啲細路真係醒目!  佢仲要未學過rye呢個字噃, 居然又識讀.

咁辛苦搓既包包, 一啲都唔似應有既樣, 色太淡了, 等我下次加黑啤去試吓先.

Daddy 由教會返嚟見到個發緊酵既麵糰就吚吚哦哦話我未病好就整麵包, 跟住我就被禁入廚房整其他嘢. 

細佬噚日玩時, 我帮佢影相, 呢張我好鐘意.





Sunday 12 September 2010

2010 生日蛋糕

明天是我的生日, 因為之前要去英國出Trip, 跟住返香港, 所以九月三日先整個蛋糕拎返公司和同事預先慶祝, 順便慶祝另一同事的生日 (和我生日差四日).

其實嗰晚好攰, 食完晚飯都諗吓要唔要整, 最尾都的起心肝整. 今次整榛子薄脆綠茶凍餅(hazelnut crunchy green tea mousse cake), 跟文妮登的食譜.

一切順利, 直至整mousse時就出事, 啲牛奶蛋黃魚膠糊加入打起忌廉時, 魚膠gel起, 所以就便咗有綠色一點點, 唔駛撒綠茶粉做裝飾了, 幾驚啲mousse唔set, 好彩最尾都ok, 同事都話好食.


個朱古力裝飾係朝早六點幾起身快快手整的, 好彩用由香港買番嚟已調温的朱古力, 五分鐘就搞掂. 本來淨係放pat紅豆蓉, 超醜, 放塊朱古力裝飾當堂靚晒.

呢個食譜真係好正, 令我學咗好多嘢. 之前整海綿蛋糕蛋加糖要放熱水坐熱至40度, 我以為真係坐熱水, 但次次點解啲蛋黃好似熟埋, 原來係要double boil, 依家識嘞, 真係易搞好多. 六吋蛋糕原來啲蛋糕片要切成6-1/8" x 6-1/8"先啱啱好, 又學到嘢嘞.

Thursday 9 September 2010

第一餐生日飯 - 2010.08.30

今朝由英國返嚟, 聽日就返香港探家人, 星期三先返新加坡.

今年生日我會在香港, 所以好朋友提前兩個星期請我食生日飯. 

朋友遷就我可以早啲返屋企陪囝囝, 選了在我家附近的日本餐廳 Megumi. 


這店店內只有三至四張四人枱, 但室外還有幾張枱, 可以alfresco. 

我們叫了兩份套餐和兩份小食, 套餐包前菜和主菜,和"free flow of ocha and ice-cream". 

我掛住食, 忘了影相, 只影了幾樣.


Wednesday 8 September 2010

綠茶紅豆包

跟仙姐的十七小時包包整的綠茶紅豆包.

我那整餅師傅細佬給我綠茶粉, 勁綠亦很香, 整形後好似放大版的綠茶雪球.




成品好靚仔, 食落好軟熟, 綠茶和紅豆幾時都係最佳拍檔.




Tuesday 7 September 2010

魚唔新鮮點算?

新加坡街市係冇游水魚賣的, 剛來的香港人一定會唔習慣, 總覺得魚要見到游下游下先算新鮮. 

住久了就開始慣, 對新鮮既定義會放寬些少, 只要摸落肉實, 魚身有光澤, 魚眼比較亮晶晶的, 都算是新鮮, 都會用來蒸.

但有時真的買到唔多新鮮的魚, 點算呢?

上個星期就咁啱買唔新鮮既石斑, 一定唔可以蒸, 姐姐就炮製酸甜魚, 開胃又唔腥, 我連魚頭都"鱗"埋.



我屋企好少炸嘢既, 姐姐只係撲粉用油煎.  姐姐好叻架, 兩條魚都係佢煮架, 個汁都係佢自己調的.

Monday 6 September 2010

泰式燒豬頸肉

你哋睇呢篇時, 我正身在曼聯的基地Manchester了, 星期四晚先返到, 今次去公幹, 係冇機會玩的, 所以應該唔會出遊記.

預先寫定幾篇, 等你哋唔好忘記我. 

想整咗好耐既泰式豬頸肉, 跟大少奶第二本書內的食譜.


姐姐正要落叉燒醬醃舊pork shoulder時, 俾我叫住, 不如換換口味, 整泰式啦. 

姐姐: 食譜話要檸檬葉喎, 屋企冇噃, 點算?

我: 嗄, 豉單啦, 有香芧係咪, 落香芧代檸檬葉, 差唔多啩.

就係咁攪掂碟泰式豬頸肉嘞, 味道都應該差唔多啩.

不過最緊要都係呢碟汁, 係靈魂所在哩.


今次就用蔥來代替檸檬葉, 我煮嘢就係咁, 求求其其唔會照食譜十足十的, 廚房有乜就落乜囉.

泰式豬頸肉, 好好味, 大大碟一下子食晒, 三父子食肉獸上身一件接一件食唔停口.





Friday 3 September 2010

有朋自遠方來, 不亦樂乎 (3)

朋友一家來新最後一日, 29/8 星期日.

早上下了滂沱大雨, 他們就只好到酒店旁的Marina Shopping Centre閒逛.  待他們十二點check out後, 去酒店接他們去吃肉骨茶.

想着如果星期日到黃亞細或發起人吃肉骨茶, 可能要等位, 帶着四個小朋友, 等位就太麻煩了.  好彩Daddy想到在Keppel Road的歐南園亞華肉骨茶, 那裏靠近中央金融區, 應該會比較少人, 而且還有地下停車場, 下雨也不怕.

雖然還是很多人, 但仍然一到就有位, 店員還為我們換上一張大枱, 小朋友又有high chair 和小朋友餐具, 服務真不錯.


點了六碗肉骨茶, 一碗豬腰豬肝湯, 滷粉腸, 滷豬手, 豆卜, 油菜, 咸菜各一碟.  當時忙住照顧小朋友, 情況有點亂, 就只影了一部份食物.


Thursday 2 September 2010

有朋自遠方來, 不亦樂乎 (2)

第三日, 即星期六, 朋友一家去Wild Wild Wet玩, 咁熱咁曬, 咪攪我, 留在家裏等他們玩完call我好了.

下晝四點半才收到電話, 飛車到Pasir Ris接他們來我家. 

時間倉促, 隨便煮幾道小菜招呼他們.

蒸金目鱸


1.5 公斤貢貢, 下晝我親手用小刷逐粒逐粒刷乾淨的, 花了我半個多鐘, 特地調了個泰式醬汁來蘸.


Wednesday 1 September 2010

有朋自遠方來, 不亦樂乎 (1)

有朋友自遠方(都唔係遠, 香港啫)來, 當然要盡地主之誼, 熱情款待.

為食的我, 招待方式離不開食, 食和食.

第一晚到老巴刹 (Lau Pa Sat), 未夠六點就到, 路還未封, 只能坐裏面, 亦看不到沙爹檔烤沙爹.  但他們一家大清早起身上飛機, 都已經好攰, 等不了再晚一點去.

他們之前下午茶時間吃了點, 還飽, 就隨便點了沙爹, 炒粿條和蠔煎, 一人一杯鮮搾庶汁.



三蚊碟炒粿條, 大大碟, 熱辣辣, 抵食, 最重要味道唔會甜.


Related Posts Plugin for WordPress, Blogger...